ភ្នំពេញ ៖ អគ្គនាយករដ្ឋាករទឹកស្វយ័តរាជធានីភ្នំពេញបានឲ្យដឹងថា បច្ចុប្បន្ននេះការផ្គត់ផ្គង់ទឹកស្អាតនៅរាជធានីភ្នំពេញ មានការខ្វះខាតនៅឡើយ ដោយផ្គត់ផ្គង់បានតែជាង៥៦ម៉ឺនម៉ែត្រគូបប៉ុណ្ណោះក្នុងមួយថ្ងៃ ខណៈតម្រូវការប្រើប្រាស់ទឹកស្អាតមានរហូតដល់ទៅជាង៦០ម៉ឺនម៉ែត្រគូបក្នុងមួយថ្ងៃ។
លោក ស៊ឹម ស៊ីថា អគ្គនាយករដ្ឋាករទឹកស្វយ័តរាជធានីភ្នំពេញ បានឲ្យដឹងកាលពីថ្ងៃទី០៧ ខែសីហា ឆ្នាំ២០១៨ ក្រោយពីលោកស្រី អេវ៉ា ង្វៀនប៊ិញ ឯកអគ្គរដ្ឋទូតបារាំងប្រចាំកម្ពុជា បញ្ចប់ធ្វើទស្សនកិច្ចរោងចក្រទឹកស្អាតនិរោធ នៅភូមិបឹងឈូក សង្កាត់និរោធ ខណ្ឌច្បារអំពៅឲ្យដឹងថា «សព្វថ្ងៃហ្នឹងយើងមានលទ្ធភាពក្នុងការផលិតទឹក និងចែកចាយទឹកទូទាំងរាជធានីភ្នំពេញ ៥៦ម៉ឺនម៉ែត្រគូប ក្នុងមួយថ្ងៃ ហើយមួយឆ្នាំៗរដ្ឋាករទឹកក្រុងភ្នំពេញផលិតទឹកស្អាត ជូនពលរដ្ឋនៅភ្នំពេញប្រើប្រាស់ប្រមាណ១៧០លានម៉ែត្រគូប ដូច្នេះពលរដ្ឋទទួលបានសេវាកម្មពីរដ្ឋាករទឹកប្រមាណ៣៣០ពាន់គ្រួសារ។ ចំនួននេះនៅមានភាពខ្វះខាត នៅឡើយសម្រាប់ពលរដ្ឋប្រើប្រាស់»។
ប្រទេសបារាំងបានជួយដល់រដ្ឋាករទឹកក្រុងភ្នំពេញ មានផ្នែកបច្ចេកទេស ផ្នែកឥណទាន ផ្នែកហិរញ្ញប្បទាន ដែលនៅរោងចក្រផលិតទឹកស្អាត និរោគត្រូវបានបារាំងផ្តល់ប្រាក់កម្ចី សម្រាប់សាងសង់ស្ថានីយបូមទឹកឆៅ ពីទន្លេមេគង្គនាពេលបច្ចុប្បន្ននេះ។
លោក ស៊ឹម ស៊ីថា បញ្ជាក់ថា បារាំងបានផ្តល់ជំនួយឥតសំណងជាដំណាក់កាល គឺទី១៖បានផ្តល់ប្រាក់ជំនួយប្រមាណ៣០ម៉ឺនអឺរ៉ូ និងក្រោយមកប្រមាណ៥០ម៉ឺន អឺរ៉ូក្នុងគម្រោងបដិភាគសិក្សាប្លង់មេជាដើម។
លោកអគ្គនាយក បានបន្តថាថាការផ្គត់ផ្គង់ទឹកស្អាតនៅរាជធានីភ្នំពេញ មិនគ្រប់គ្រាន់នេះជាធ្វើឲ្យខ្វះខាតទឹកប្រើប្រាស់នៅជាយក្រុងព្រោះកាលណានៅជាយក្រុងប្រើប្រាស់ទឹកច្រើន បានធ្វើឲ្យសំពាធទឹកនៅកណ្ដាលក្រុងភ្នំពេញ មានការថយចុះមួយកម្រិត ដោយសាររោងចក្រផលិតទឹកស្អាត នៅរាជធានីភ្នំពេញ មាន៤កន្លែងប៉ុណ្ណោះ។
លោក ស៊ឹម ស៊ីថា បានឲ្យដឹងទៀតថា រដ្ឋាករទឹកស្វយ័តរាជធានីភ្នំពេញ ក៏មានគម្រោងកសាងរោងចក្រផលិតទឹកស្អាតធំៗបន្ថែមទៀត ដើម្បីទាន់តម្រូវការពលរដ្ឋប្រើប្រាស់នៅរាជធានីភ្នំពេញ និងជាយក្រុងផងដែរ។
សូមរំលឹកថា រដ្ឋាករទឹករាជធានីភ្នំពេញ បានចាប់កំណើតឡើងនៅឆ្នាំ១៩៥៩ ដោយមានការតែងតាំងជាផ្លូវការ តាមព្រះរាជក្រឹត្យរបស់ព្រះករុណា ព្រះបាទ សម្ដេចព្រះ នរោត្តម សីហនុ ព្រះមហាក្សត្រកម្ពុជា កាលពីថ្ងៃទី២៤ ខែមីនា ឆ្នាំ១៩៦០ ជាអង្គភាពផលិតកម្ម និងអាជីវកម្មរបស់រដ្ឋចំណុះផ្ទាល់សាលាក្រុងភ្នំពេញ ហើយដែលបានប្រសិទ្ធនាមជាផ្លូវការថា «រដ្ឋាករទឹកភ្នំពេញ»។
អង្គភាពនេះ មានភារកិច្ចផលិតទឹកស្អាត និងផ្គត់ផ្គង់បម្រើតាមសំណូមពរប្រើប្រាស់របស់ពលរដ្ឋនៅរាជធានីភ្នំពេញ ព្រមទាំងធានាតុល្យភាពចំណូល-ចំណាយ លើការងារផលិតកម្ម និងវិនិយោគផងដែរ។ បច្ចុប្បន្នពលរដ្ឋរស់នៅរាជធានីភ្នំពេញ បានកើនឡើងដល់ប្រមាណ១,៧លាននាក់ ក្នុងចំណោមពលរដ្ឋជាង១៥លាននាក់ នៅទូទាំងប្រទេស៕
Source: Kampuchea Thmey Daily
0 Comments