កម្ពុជា គ្រោង​អ​ញ្ញើញ​អ្នកជំនាញ​មកពី​ជប៉ុន ធ្វើ​សិក្ខាសាលា​ទីផ្សារ​ដល់​ក្លិប​បាល់ទាត់​ក្នុងស្រុក

​យោង​តាម​សេចក្តី​ជូនដំណឹង​គណៈកម្មការ​ប្រកួត​បាល់ទាត់​ជាតិ​កម្ពុជា (CNCC) បាន​បញ្ជាក់ថា​ សហព័ន្ធ​កីឡាបាល់ទាត់​កម្ពុជា (FFC) និង​គណៈកម្មការ​ប្រកួត​បាល់ទាត់​កម្ពុជា​ នឹង​អញ្ជើញ​អ្នកជំនាញ​ពី​លី​គ​កំពូល​ជប៉ុន (J-League) ចូលរួម​ធ្វើ​បទ​បង្ហាញ​ក្នុង​សិក្ខាសាលា​ស្ដីពី​ទីផ្សារ​ដល់​ក្លិប​ទាំង​១២​នៅ​ក្របខណ្ឌ​លី​គ​កំពូល​ក​ម្ពុ​ជា (Metfone Cambodian League)​។

លោក ឈី កុល​បុត្រា ប្រធាន​ការិយាល័យ​ទីផ្សារ និង ផ្សព្វផ្សាយ​ព័ត៌មាន​នៃ​គណៈកម្មការ​ប្រកួត​បាល់​ទាត់​ជាតិ​កម្ពុជា បាន​បញ្ជាក់​ថា ​គម្រោង​នេះ​អាច​នឹង​ធ្វើឡើង​អំឡុង​ខែសីហា​នេះ​ក្នុង​គោលបំណង​ពង្រឹង​ហេដ្ឋារចនាសម្ព័ន្ធ​ទីផ្សារ​បាល់ទាត់​នៅ​កម្ពុជា​ឱ្យ​ទាក់ទាញ​ចំណាប់អារម្មណ៍​កាន់តែខ្លាំង​ពី​មហាជន​និង​ម្ចាស់​ឧបត្ថម្ភ​នានា​។



ប្រភព​ខាងលើ​បន្តថា «​នេះ​ជា​លើក​ទី​១​ដែលមាន​ការបង្កើត​សិក្ខាសាលា​ទីផ្សារ​សម្រាប់​ក្លិប​ទាំង​១២​នៅ​កម្ពុជា​។ គោលបំណង​សំខាន់​គឺ​ដើម្បី​ផ្ដល់​បទពិសោធ​ដល់​ក្លិប​ទាំងអស់​នៅ​ក្របខណ្ឌ Metfone Cambodian League ស្ដីពី​ជំនាញ​ទាក់ទាញ​អ្នក​ឧបត្ថម្ភ​, ការចរចា​ជាមួយ​ក្រុមហ៊ុន​, ការរៀបចំ​ព្រឹត្តិការណ៍​នៅ​កីឡដ្ឋាន និង អំឡុង​ការប្រកួត​ដើម្បី​ស្រូប​ទាញ​អ្នកទស្សនា​ឲ្យ​កាន់តែ​ផុសផុល​។ ជាមួយគ្នានេះដែរ ក្លិប​ទាំង​១២​ក៏​នឹង​ទទួលបាន​បទ​បង្ហាញ​ល្អៗ និង ជជែក​ពិភាក្សា​ជាមួយ​អ្នកជំនាញ​ពី J-League»​។

​ដើមចម​ដែល​បណ្តាលឱ្យមាន​វគ្គ​សិក្សា​នេះ​ឡើង​គឺ​ដោយសារតែ​ភាគី​កម្ពុជា ធ្លាប់​ចូលរួម​សិក្ខាសាលា​ខាងលើ​នៅ​ប្រទេស​ជប៉ុន​អំឡុង​ឆ្នាំ​២០១៧​កន្លងទៅ ដោយមាន​ការអញ្ជើញ​ពី​ក្របខណ្ឌ J-League ផ្ទាល់​តែម្ដង​។ លោក ឈី កុល​បុត្រា រំពឹងថា សិក្ខាសាលា​នេះ​មិន​ត្រឹមតែ​ជា​ប្រយោជន៍​ខ្លាំង​ដល់​ក្លិប​ទាំង​១២​ប៉ុណ្ណោះ​ទេ តែ​ក៏​ជា​ផ្នែក​នៃ​ការអភិវឌ្ឍ​វិស័យ​បាល់ទាត់​នៅ​កម្ពុជា​។​ សម្រាប់​កាលបរិច្ឆេទ​សិក្ខាសាលា​ទីផ្សារ​នេះ CNCC នឹង​ជូនដំណឹង​នាពេល​ក្រោយ៕

 

Source: Kampuchea Thmey Daily