ភ្នំពេញ ៖ លោកជំទាវកិត្តិសង្គហបណ្ឌិតម៉ែន សំអន បានសម្ដែងការសាទរនាល្ងាចថ្ងៃទី០៨ ខែសីហា ឆ្នាំ២០១៨ ដោយបានថ្លែងនូវការសាទរចំពោះការប្រកាសកិច្ចសហប្រតិបត្តិការគ្រប់ជ្រុងជ្រោយលើការវិនិយោគរួមគ្នា រវាងក្រុមហ៊ុនពីរគឺក្រុមហ៊ុនថាកូនិងក្រុមហ៊ុនហ័នអាញយ៉ាដាយ ហើយមិនត្រឹមតែនៅក្នុងប្រទេស វៀតណាមកម្ពុជានិងនៅក្នុងតំបន់ប៉ុណ្ណោះទេ ប៉ុន្តែ នឹងក្លាយទៅជាមជ្ឈមណ្ឌលពាណិជ្ជកម្ម សេដ្ឋកិច្ច ទេសចរណ៍ អាចបង្កើតការងារ ពិសេសប្រាក់ចំណូលយ៉ាងច្រើនជូនប្រជាពលរដ្ឋ ដើម្បីរួមចំណែកដល់ការអភិវឌ្ឍន៍សេដ្ឋកិច្ចនៃប្រទេសទាំងពីរប្រកបដោយចីរភាព។
ក្នុងនាមរាជរដ្ឋាភិបាលកម្ពុជា និងក្នុងនាមលោកជំទាវកិត្តិសង្គហបណ្ឌិតផ្ទាល់ សូមបញ្ជាក់តាមរយៈលោកចាប សុថារិទ្ធឲ្យដឹងផងដែរថា កិច្ចការទាំងនេះគ្រាន់តែជាចំណុចនៃការចាប់ផ្តើមប៉ុណ្ណោះ។ ដូចនេះ ដើម្បីជោគជ័យនៃការអនុវត្តគម្រោង ក៏ដូចជាជោគជ័យនៃការប្រកួតប្រជែង ក្រុមហ៊ុន ថាកូនិងដៃគូគឺជាក្រុមហ៊ុនដែលមានបទពិសោធន៍ស្រាប់លើការងារវិនិយោគជាច្រើន នៅទីក្រុងហូជីមិញនៃសាធារណរដ្ឋសង្គនិយមវៀតណាមត្រូវចាប់ផ្តើមធ្វើផែនការសកម្មភាពលម្អិត ស្តីពីការអភិវឌ្ឍន៍លើគម្រោងនេះ។
លោកបន្តថា កិច្ចការនេះធ្វើទៅតាមផែនការ តាមជំនាញ និងបទពិសោធន៍របស់ខ្លួន សំដៅធ្វើយ៉ាងណាជំរុញការអភិវឌ្ឍន៍នៃក្រុមហ៊ុនទាំងពីរសម្រេចចេញលទ្ធផលជាផ្លែផ្កា និងឈានទៅចាប់ផ្តើមដំណើរការយ៉ាងល្អក្នុងពេលដ៏ខ្លីខាងមុខនេះ។
លោកក៏សូមស្នើ ឲ្យអាជ្ញាធរដែលពាក់ព័ន្ធនានា សូមបន្តតាមដាន និងសម្រួលបែបបទនានា សម្រាប់ការអភិវឌ្ឍន៍នេះប្រកបដោយប្រសិទ្ធភាពនៃក្រុមហ៊ុនទាំងពីរ។
ជាទីបញ្ចប់នេះ ដើម្បីជាការអបអរដល់ការប្រកាសកិច្ចសហការវិនិយោគរួមគ្នាគ្រប់ជ្រុងជ្រោយ រវាងក្រុមហ៊ុនទាំងពីរ លោកចាប សុថារិទ្ធតំណាងលោកជំទាវកិត្តិសង្គហបណ្ឌិតម៉ែន សំអនថ្លែងនូវការជូនពរឲ្យកិច្ចសហប្រតិបត្តិការនៃក្រុមហ៊ុនទាំងពីរនេះទទួលបានជោគជ័យក្នុងការបណ្ដាក់ទុនវិនិយោគដ៏ធំនេះ៕
Source: Kampuchea Thmey Daily
0 Comments