ក្រោយ​បញ្ចប់​កិច្ចសន្យា​ជាមួយ​ភ្នំពេញ​ក្រោ​ន កាលពី​ជើង​ទី​១​រដូវ​កាល​នេះ Jorrin John វិវត្តន៍​ខ្លួន​ធ្វើជា​គ្រូបង្វឹក​បាល់ទាត់​ម្តង

​អតីត​ខ្សែបម្រើ​ប្រយុទ្ធ​ភ្នំពេញ​ក្រោ​ន​កីឡាករ Jorrin John បាន​ចាក​ចេញពី​ក្លិប​កាលពី​ជើង​ទី​១ រដូវ​កាល​ឆ្នាំ​២០១៨ នេះ​ ដោយសារ​របួស​កាលពី​ប៉ុន្មាន​ខែ​មុន នៅ​ពេល​នេះ​បាន​ទៅ​ចូលរួម​ធ្វើជា​គ្រូបង្វឹក​ក្នុង​អង្គការ​បង្ហាត់​បាល់ទាត់ Elite Soccer Coaching-Cambodia ដែល​មាន​មូលដ្ឋាន​នៅ​រាជធានី​ភ្នំពេញ​។​

យោង​តាម​ការ​បញ្ជាក់​ពី​អង្គការ​បាល់ទាត់​ខាងលើ កីឡាករ​រូប​នេះ​ធ្លាប់​ទទួល​បាន​សញ្ញាបត្រ​គ្រូបង្វឹក​កម្រិត ២ (FA Level 2 coach) ពី​សហព័ន្ធ​បាល់ទាត់​អង់គ្លេស អំឡុង​លេង និង​ហ្វឹកហាត់​នៅ​ក្លឹប​លី​ក​កំពូល​អង់គ្លេស Leicester City បូករួម​ជាមួយ​បទពិសោធន៍​លេង​បាល់​នៅ​ជម្រើសជាតិ​កោះ Antigua​របស់ខ្លួន បទពិសោធន៍​នៅ​ប្រទេស​ថៃ និង​ពិសេស​នៅ​ភ្នំពេញ​ក្រោ​ន​មួយរយៈ​ផង​ដែរ​។



បើ​តាម​វេ​ប​សាយ Elite Soccer Choaching-Cambodia កីឡាករ​រូប​នឹង​ក្លាយជា​គ្រូ​បាល់ទាត់​អាជីព​ចាប់ពី​សប្ដាហ៍​ក្រោយនេះ​តទៅ​។ កីឡាករ Jorrin John លេង​ភ្នំពេញ​ក្រោ​ន​ក្នុង​លីគ​កំពូល​កម្ពុជា​អំឡុង​ជើង​ទី​១​រដូវ​កាល​២០១៨​គឺ​កើតឡើង​អំឡុងពេល​ក្រុម​ភ្នំពេញ​ក្រោ​ន ចាញ់​ម្ចាស់ផ្ទះ​ព្រះខ័ន​រាជ​ស្វាយរៀង កាលពី​ថ្ងៃទី​២២ ខែមេសា ឆ្នាំ​២០១៨ លើ​ទីលាន​កីឡដ្ឋាន​ខេត្តស្វាយរៀង​។ ប៉ុន្តែ​របួស​នេះ​បាន​ព្យាបាល​រួចរាល់​កាលពីពេល​ថ្មីៗ​នៅ​ប្រទេស​វៀតណាម​។



កីឡាករ Jorrin John ធ្លាប់បាន​ឆ្លងកាត់​ការហ្វឹកហាត់ និង​បង្ហាញខ្លួន​ជាមួយ​ក្រុមយុវជន​រប​ស់​ក្លិប Leicester មួយ​លើក​បន្ទាប់មក​ត្រូវបាន​ខ្ចី​ជើង​ឲ្យ​ទៅ​ក្លិប Kettering Town កាលពី​ឆ្នាំ​២០១១ មុននឹង​ប្តូរ​មកលេង​ឲ្យ​ក្លិប Muangthong United របស់​ប្រទេស​ថៃ និង​បន្ត​ខ្ចី​ជើង​ទៅលេង​នៅ​ក្លិប Suphanburi នៅ​ប្រទេស​តំបន់​អាស៊ាន​មួយ​នេះ​។ សម្រាប់​រដូវ​កាល ២០១២-២០១៣​កន្លងមក រូបគេ​បាន​ទៅលេង​នៅ​ក្លិប​Nonthaburi លុះ​នៅ​ឆ្នាំ​២០១៤ បាន​ផ្ទេរ​ទៅ​ក្លិប Nuneaton Town និង​លេង​ឲ្យ​ក្លិប NK Domzale ក្នុង​ឆ្នាំ​២០១៥ និង​នៅ​ឆ្នាំ​២០១៦-១៧ រូបគេ​លេង​នៅ​ក្លិប​Harrowby United មុន​មកកាន់ប្រទេស​កម្ពុជា​៕

  

Source: Kampuchea Thmey Daily