តាកែវ ៖ អាជ្ញាធរស្រុកបូរីជលសារ បើកប្រតិបត្តិការបង្ក្រាបបទល្មើសនេសាទជាលើដំបូងនារដូវបិទការនេសាទដោយខុសច្បាប់ព្រមទាំងរឹបអូសឧបករណ៍នេសាទខុសច្បាប់មួយចំនួនយកមកដុតបំផ្លាញចោល។
អាជ្ញាធរស្រុកបូរីជលសារកាលពីថ្ងៃទី០៧ ខែសីហា ឆ្នាំ២០១៨ បានដឹកនាំកម្លាំងជំនាញចុះធ្វើការផ្សព្វផ្សាយ និងពន្យល់ណែនាំប្រជាពលរដ្ឋកុំឲ្យធ្វើការនេសាទជាលក្ខណៈអាជីវកម្មដោយប្រើប្រាស់ឧបករណ៍នេសាទខុសច្បាប់នៅរដូវបិទការនេសាទ នៅឃុំកំពង់ក្រសាំង ស្រុកបូរីជលសារ ខេត្តតាកែវ និងបានបន្តចុះបង្ក្រាបបទល្មើសជលផល ដោយបានឆូត និងកាត់ចោលសាច់ឈឹប សៃយ៉ឺនស្បៃមុងដែលបានដាក់នេសាទខុសច្បាប់ប្រវែង៥៨០ម និងរឹបអូសយកឧបករណ៍ល្មើសជា វត្ថុតាងទាំងនោះរួមមាន កន្ទុយសៃយ៉ឺន២១កន្ទុយ បង្គោលឬស្សី៨៧ដើម ដុតបំផ្លាញចោលនៅមុខសាលាស្រុកបូរីជលសារផងដែរ។
បន្ទាប់ពីប្រតិបត្តិការបង្ក្រាបបទល្មើសជលផលដោយអាជ្ញាធរស្រុករួចមក អាជ្ញាធរបានលែងកូនត្រីជាប្រយោជន៍សាធារណៈប្រមាណ២៦គ.កទៅក្នុងទឹកផងដែរ។
សូមរំលឹកផងដែរថា សមាជិកក្រុមប្រឹក្សាខេត្តតាកែវកាលពីថ្ងៃទី០២ ខែសីហា ឆ្នាំ២០១៨ បានស្នើឲ្យលោក អ៊ូច ភា អភិបាលនៃគណៈអភិបាលខេត្តតាកែវចាត់វិធានការណ៍ឲ្យមានប្រសិទ្ធភាពពាក់ព័ន្ធទៅនឹងការធ្វើនេសាទខុសច្បាប់នៅក្នុងរដូវបិទការនេសាទដែលជារដូវត្រីកំពុងពងកូន នៅក្នុងកិច្ចប្រជុំក្រុមប្រឹក្សាខេត្ត។
ឆ្លើយតបទៅនឹងការលើកឡើងរបស់សមាជិកក្រុមប្រឹក្សាខេត្ត លោក អ៊ូច ភា អភិបាលខេត្តតាកែវបានថ្លែងថា អាជ្ញាធរខេត្តបានដាក់បទបញ្ជាយ៉ាងម៉ឺងម៉ាត់ដល់អាជ្ញាធរស្រុកដែលនៅជាប់ផ្ទៃទឹកជាពិសេសមន្ត្រីរដ្ឋបាលជលផល ធ្វើយ៉ាងណាទប់ស្កាត់ឲ្យបានចំពោះបទល្មើសនេសាទគ្រប់ប្រភេទនៅលើដែនទឹកក្នុងខេត្តតាកែវជាពិសេសនៅរដូវត្រីពងហើយអាជ្ញាធរក៏និងធ្វើសកម្មភាពតាមរយៈពន្យល់ដល់បងប្អូនប្រជានេសាទពីផលប៉ះពាល់នៃការធ្វើនេសាទខុសច្បាប់នេះផងដែរ៕
Source: Kampuchea Thmey Daily
0 Comments