ភ្នំពេញ ៖ ដូចដែលមហាជនមហាជនបានដឹងគ្រប់គ្នាហើយថា រវាងតារាចម្រៀងប្រុសពីររូបគឺលោក ម៉ៃ សុគន្ធ និងលោក ខេមរៈ សិរីមន្ត កាលពីថ្មីៗនេះ បានផ្ទុះរឿងរ៉ាវដ៏រសើបក្រោយពេលតារាចម្រៀងរបស់ផលិតកម្មហង្សមាសលោក ខេមរៈ សិរីមន្ត បានប្រកាសព្រមានប្តឹងលោក ម៉ៃ សុគន្ធ ឡើងតុលាការលើករណីរិះគន់មួយចំនួន។
ទន្ទឹមគ្នាលើករណីនៃការប្រកាសប្តឹងរបស់លោក ខេមរៈ សិរីមន្តមកលើតារាចម្រៀងលោក ម៉ៃ សុគន្ធ នេះដែរ ភ្លាមៗនោះ បានធ្វើឲ្យមហាជនជាច្រើនមានការភ្ញាក់ផ្អើល និងចាប់អារម្មណ៍តាមដានចំពោះដំណឹងមួយនេះ។ ប៉ុន្តែជាលទ្ធផលត្រូវបានលោក ម៉ៃ សុគន្ធ ឆ្លើយតបថា លោកមិនបានខ្លាច ឬភ័យព្រួយលើការប្រកាសដាក់ពាក្យប្តឹងនោះឡើយ ផ្ទុយទៅវិញលោកបែរជាប្រកាសថាអាចព្រមកំដរបានទៅតាមអ្វីដែលលោក ខេមរៈ សិរីមន្ត ចង់ប្តឹង ប្រសិនបើអញ្ចឹងមែន។
ថ្វីត្បិតតែរឿងរ៉ាវនេះ ទើបត្រូវបានស្ងប់ស្ងាត់មិនទាន់បានមួយចម្អិនកំពឹសផង ក៏ស្រាប់តែតារាចម្រៀងលោកម៉ៃ សុគន្ធ ក៏បានបន្តចេញរិះគន់ជាថ្មីលើតារាចម្រៀងលោក ខេមរៈ សិរីមន្ត ជុំវិញនៃការចេញបទចម្រៀងថ្មីរបស់លោក ដែលជាការច្រៀងរួមគ្នាជាមួយតារាថៃ លោក Tik Shiro ហើយត្រូវបានផ្សព្វផ្សាយនៅលើបណ្តាញសង្គមកាលពីថ្មីៗកន្លងមកនេះ។
ផ្អែកតាមសំណេរសរសេរភ្ជាប់ជាមួយឃ្លីបវីដេអូ និងរូបភាពលោកម៉ៃ សុគន្ធ បានលើកឡើងថា ឆ្ងល់…! សួរតាមត្រង់ហេតុអ្វី អត់ព្រមអោយចាស្ទីនកូពី កាន់ឧបករណ៍តន្ត្រីអញ្ចឹង ឬមួយគាត់អត់ចេះ ឬ គាត់លាក់កំនួចជ្រុល តែសហការគ្នាហើយ គួរណាស់តែអោយ ប៉ារូលដំបូង ខ្មែរច្រៀងមុន (មូលហេតុព្រោះគាត់ជាម្ចាស់ផ្ទះ ទោះហៅភ្ញៀវទៅ ពិសារបាយក៏ទុកកិត្តិយសចាប់ម្ហូបជូនភ្ញៀវមុនដែរ)។
បន្ថែមពីនេះ តារាចម្រៀងលោក ម៉ៃ សុគន្ធ បាននិយាយប្រាប់ឲ្យដឹងទៀតថា ទាក់ទងចម្រៀងរួមគ្នារវាងខ្មែរនិងថៃ ខ្ញុំឃើញថាដូចជាមានលក្ខណៈលើសបន្តិច ព្រោះត្រង់MVជ្រួល តែច្រៀងរួមគ្នាគួរតែថតស្រុកខ្មែរខ្លះ ស្រុកថៃខ្លះទៅ ហើយមួយវិញទៀតបានជាគាត់(Tik Shiro )សហការអញ្ជើញយើងទៅច្រៀងជាមួយគាត់គួរណាអោយប៉ារ៉ូលទីមួយខ្មែរច្រៀងមុន។ ម្យ៉ាងទៀតតារាចម្រៀងថៃម្នាក់នោះគាត់ច្រៀងផងនិងលេងឧបករណ៍តន្ត្រីផង(វាយស្គរ) ប៉ុន្តែតារាចម្រៀងខ្មែរយើង(ខេមរៈ សិរីមន្ត)គាត់ឈរតែចម្រៀងតើត្រង់ចំណុចនេះវាត្រូវឬខុស៕
Source: Kampuchea Thmey Daily
0 Comments