កម្ពុជា នឹងរៀបចំពិព័រណ៍ម្ហូបអាហារ ភេសជ្ជៈ និងបដិសណ្ឋារកិច្ចអន្តរជាតិដ៏ធំបំផុតនៅខែកញ្ញាខាងមុខនេះ
ភ្នំពេញ ៖ ក្រុមហ៊ុនAMB Tarsus Events Group សហការជាមួយសហព័ន្ធទេសចរណ៍កម្ពុជា សមាគមសណ្ឋាគារកម្ពុជា សមាគមភោជនីយដ្ឋានកម្ពុជា សមាគមចុងភៅកម្ពុជា និងសមាគមន៍អ្នកជំនាញស្រាក្រហមកម្ពុជា នឹងរៀបចំពិព័រណ៍ម្ហូបអាហារ ភេសជ្ជៈ និងបដិសណ្ឋារកិច្ចអន្តរជាតិ ដ៏ធំបំផុតនៅកម្ពុជា(CAMFOOD'18 / CAMHO TEL'18)ចាប់ពីថ្ងៃទី១៩ដល់ថ្ងៃទី២១ខែកញ្ញាឆ្នាំ២០១៨នៅមជ្ឈមណ្ឌលពិព័រណ៍និងសន្និបាតកោះពេជ្ររាជធានីភ្នំពេញ។
លោក អ៊េន ឌ្រូស្យេវ ប្រធានក្រុម AMB Tarsus Events Groupដែលជាអ្នករៀបចំពិព័រណ៍នេះបានថ្លែងនៅក្នុងសន្និសីទកាសែតកាលពីរសៀលថ្ងៃទី៨ ខែសីហា ឆ្នាំ២០១៨ថា ពិព័រណ៍នេះមានក្រុមហ៊ុនចូលរួមជាង ៣៥០ ក្រុមហ៊ុន និងម៉ាកផលិតផលល្បីៗមកពី ៣០ ប្រទេស នៃតំបន់អាស៊ី ដែលនឹងដាក់បង្ហាញ ផលិតផលថ្មីៗដ៏សម្បូរបែបដូចជា ផលិតផលផ្នែកម្ហូបអាហារ ផលិតផលភេសជ្ជៈជាច្រើនប្រភេទ សម្ភារៈផ្គត់ផ្គង់សេវាកម្មម្ហូបអាហារ សម្ភារៈផ្គត់ផ្គង់សណ្ឋាគារ ភោជនីយដ្ឋាន និង ហាងកាហ្វេ ក៏ដូចជាបច្ចេកវិទ្យាទំនើបចាំបាច់ក្នុងការប្រើប្រាស់សម្រាប់វិស័យនេះទាំងមូលផងដែរ។
លោកបានបន្តថា ព្រឹត្តិការណ៍ពិព័រណ៍រយៈពេលបីថ្ងៃនេះ នឹងមានវត្តមានក្រុមហ៊ុនមកពីប្រទេសចំនួន ៩ មានដូចជា ប្រទេសចិន ប្រទេសបារាំង ប្រទេសអ៊ីតាលី ប្រទេសកូរ៉េខាងត្បូង ប្រទេសម៉ាឡេស៊ី តៃវ៉ាន់ ប្រទេសថៃ សិង្ហបុរី និង សហរដ្ឋអាមេរិក។
ពិព័រណ៍ពាណិជ្ជកម្មនេះ ត្រូវបានរៀបចំឡើងក្នុងគោលបំណងផ្តល់អោយអ្នកនៅក្នុងវិស័យបដិសណ្ឋារកិច្ច ម្ហូបអាហារ និងភេសជ្ជៈអាចស្វែងរកនូវគំនិតថ្មីៗសម្រាប់អាជីវកម្ម ប្រភពនៃការស្វែងរកអ្នកផ្គត់ផ្គង់ថ្មី ក៏ដូចជាផលិតផលថ្មីៗ និងដំណោះស្រាយផ្សេងៗ ព្រមជាមួយនឹងការស្វែងយល់ពីនិន្នាការចុងក្រោយនៅក្នុងវិស័យនេះផងដែរ។
លោករំពឹងថាពិព័រណ៍នេះនឹងមានអ្នកចូលរួមទស្សនាជាង៨០០០នាក់សុទ្ធសឹងជាអ្នកជំនួញមកពីវិស័យបដិសណ្ឋារកិច្ច និងវិស័យម្ហូបអាហារ និងភេសជ្ជៈ។
ពិព័រណ៍ពាណិជ្ជកម្មនេះ អ្នករៀបចំកម្មវិធីពិព័រណ៍ក៏បានបង្កើតឡើង នូវពិព័រណ៍មួយផ្សេងទៀត គឺពិព័រណ៍វិស័យកាហ្វេ ម៉ាស៊ីន សំភារៈ និងការផ្គត់ផ្គង់គ្រាប់កាហ្វេ លំដាប់លេខមួយនៅកម្ពុជា (CAMCAFE 2018) ដើម្បីបំពេញតម្រូវការទីផ្សារវិស័យកាហ្វេ ដែលកំពុងរីកចម្រើន និងពេញនិយមក្នុងប្រទេសកម្ពុជានាពេលបច្ចុប្បន្ននេះ។ ចំនួនហងកហ្វេបានកើនឡើង គួរអោយកត់សម្គាល់ជាមួយនឹងការចូលមកដល់នូវម៉ាកកាហ្វេល្បីៗពីទីផ្សារអន្តរជាតិដូចជា Starbucks និង Amazon។
ពិព័រណ៍ CAMFOOD'18 / CAMHOTEL18 នឹងក្លាយជាវេទិកានៃការប្រកួតប្រជែងផ្នែកធ្វើម្ហូប ផ្នែកបដិសណ្ឋារកិច្ចប្រចាំឆ្នាំ២០១៨ ដែលរៀបចំឡើងដោយ សហព័ន្ធទេសចរណ៍កម្ពុជា ដែលជាវេទិកាប្រកួតប្រជែងដោយមានការចូលរួមពីសំណាក់ចុងភៅជំនាញជាច្រើននាក់ និងបុគ្គលិកជំនាញផ្នែកបដិសណ្ឋារកិច្ច នឹងធ្វើការប្រកួតប្រជែង ដើម្បីទទួលបានពានរង្វាន់ និងកេរ្តិ៍ឈ្មោះក្នុងវិស័យរបស់ខ្លួន ដែលមានវិញ្ញាសារប្រកួតប្រជែងជាង 10 វិញ្ញាសា។
វិញ្ញាសាទាំងនោះរួមមាន ការប្រកួតរៀបចំគ្រែគេងសម្រាប់សណ្ឋាគារ ការប្រកួតភ្លក់រសជាតិស្រាក្រហម (Sommelier) ការប្រកួតរៀបចំតុអាហារ ការប្រកួតរៀបចំផ្កា ការប្រកួតឆុងកាហ្វេ និងការប្រកួតក្រឡុកស្រានៅកម្ពុជា។ វិញ្ញាសានៃការប្រកួតប្រជែងទាំងនេះ មានគោលបំណងដើម្បីបង្ហាញ ពីសក្ដានុពលនៃភាពរីកចម្រើនក្នុងវិស័យបដិសណ្ឋារកិច្ច របស់ព្រះរាជាណាចក្រកម្ពុជានៅលើឆាកអន្តរជាតិ ក៏ដូចជាការអភិវឌ្ឍនៃការផ្ដល់សេវាកម្មម្ហូបអាហារអោយកាន់តែប្រសើរឡើង និងបង្ហាញជំនាញវិជ្ជាជីវៈរបស់អ្នកជំនាន់ក្រោយក្នុងឧស្សាហកម្ម ផងដែរ។
លោកស្រី ហាក់ លីណា ប្រធានសមាគមភោជនីយដ្ឋានកម្ពុជាបានមានប្រសាសន៍ថា ពិព័រណ៍នេះខាងសមាគមបានរៀបចំការប្រកួតចំនួន៣រួមមានការប្រកួតចាកស្រាឬលាយស្រា ការប្រកួតឆុងកាហ្វេ និងការប្រកួតរៀបចំតុអាហារ។
ចំណែក លោកសុងតេង ប្រធានសហគមន៍ចុងភៅកម្ពុជាបានឲ្យដឹងដែរថា សម្រាប់ពិព័រណ៍នេះសហគមន៍បានបង្កើតការប្រកួតប្រជែងចុងភៅថ្នាក់ជាតិដើម្បីស្វែងរកអ្នកមានទេពកោសល្យក្នុងការចម្អិនម្ហូបអាហារប្រចាំនៅប្រទេសកម្ពុជា ដោយក្នុងនោះមានប្រកួតចំនួនប្រកួតគឺការប្រកួតចម្អិនអាហារស្រស់ ការប្រកួតចំអិនសាច់ ការប្រកួតចំអិនគ្រឿងសមុទ្រ ការប្រកួតចំអិនម្ហូបបួស ការប្រកួតចម្អិនម្ហូបខ្មែរ ការប្រកួតតុបតែងនំ ការប្រកួតធ្វើបង្អែមដាក់ចាន ការប្រកួតដាក់តាំងបង្ហាញនំបុ័ង ការប្រកួតឆ្លាក់បន្លែនិងផ្លែឈើនិងការប្រកួតធ្វើនំអាពាហ៍ពិពាហ៍៕
Source: Kampuchea Thmey Daily
0 Comments