គិតមកដល់ថ្ងៃទី ៣១ ខែកក្កដានេះមានប្រទេសធំៗចំនួន ៧ បូកនឹងសហគមន៍អឺរ៉ុបបានជំទាស់ចំពោះការបោះឆ្នោតនៅកម្ពុជា ដោយចាត់ទុកថា ការបោះឆ្នោតនៅកម្ពុជាមិនសេរីនិងយុត្តិធម៌។ ប្រទេសទាំង៦ នោះរួមសហរដ្ឋអាមេរិក បារាំង អូស្ត្រាលី អាល្លឺម៉ង់ កាណាដា អង់គ្លេស និង ប្រទេសនូវែលសេឡង់។
មានសំណួរលើកឡើងថា ហេតុអ្វីប្រទេសស្ទើរតែ ២ ភាគ ៣ នៅលើពិភពលោក គេបានវាយតម្លៃថា ការបោះឆ្នោតនៅកម្ពុជា សេរី យុត្តិធម៌ មានតម្លាភាព គ្មានអំពើហិង្សា តែប្រទេសមួយដំបរស្វានោះ បែរជាសម្តែងការមិនពេញចិត្ត នេះក៏ដោយសារថាកម្ពុជាមិនបានធ្វើទៅតាមបំណងរបស់ពួកគេចង់បាន គឺគ្មានវត្តមានកូនចឹងរបស់គេគឺគណបក្សសង្គ្រោះជាតិចូលរួមបោះឆ្នោត និងដោយផ្អែកទៅលើមនោគមវិជ្ជាជាធំផងដែរ។
តាមពិតប្រទេសទាំងប៉ុន្មានខាងលើនេះ មិនមែនទើបតែអាណត្តិនេះនោះទេ តាមពិតតាំងពីការបោះឆ្នោតឆ្នាំ ១៩៩៨ , ២០០៣, ២០០៨, និង ២០១៣ បើទោះថា ការបោះឆ្នោតប្រព្រឹត្តទៅត្រឹមត្រូវយុត្តិធម៌ យ៉ាងណាក៏ដោយ ក៏មិនដែលត្រូវចិត្តរបស់ប្រទេសទាំងនោះដែរ។ ព្រោះការបោះឆ្នោតពុំសមតាមបំណង ដែលពួកគេចង់បានគឺ គណបក្សប្រឆាំងឈ្នះឆ្នោត នេះគឺជាគោលបំណងចម្បងរបស់ពួកអ្នកប្រទេសប្រជាធិបតេយ្យទាំងអស់នោះចង់បាន។ ដូចនេះ ដរាបណាបក្សប្រឆាំងមិនឈ្នះឆ្នោតទេនោះ ពួកគេគ្មានថ្ងៃមកអបអរសាទរជោគជ័យនៃការបោះឆ្នោតរបស់កម្ពុជានោះទេ។
មួយទៀត ដោយយោងទៅលើមនោគមវិជ្ជាដែលពួកគេបានសាបព្រួសមកលើមនុស្សរបស់គេក្នុងគោលបំណងផ្តួលរំលំគណបក្សប្រជាជនកម្ពុជាដែលគេគិតថា ជាមនុស្សដែលស្និតទៅនិងប្រទេសចិនគឺ សម្តេចតេជោ ហ៊ុន សែន។ មួយវិញទៀត បើយើងពិនិត្យឲ្យជ្រៅជាងនេះបន្តិចសមាជិកគណបក្សសង្គ្រោះជាតិរាប់ចាប់ពីមេកំពូលមកភាគច្រើនសុទ្ធតែមានសញ្ជាតិ អាមេរិក បារាំង អូស្រា្តលី ញូហ្សេឡែន ដូចនេះចង់មិនចង់គេច្បាស់ជាកាន់ជើងមនុស្សដែលមានសញ្ជាតិរបស់គេ ហើយដើម្បីនៅពេលដែលពួកនេះកាន់អំណាចគេអាចប្រើប្រាស់បានក្នុងផលប្រយោជន៍ណាមួយសម្រាប់ប្រទេសគេ។ អ្វីដែលធ្វើឲ្យអាមេរិកកាន់ តែស្អប់គណបក្សប្រជាជនកម្ពុជាថែមទៀតនោះ គឺដោយសារតែរាជរដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជាបានបំផ្លាញចោលនូវការប៉ុនប៉ងធ្វើបដិវត្តន៍នៅកម្ពុជាដែលគេបានចំណាយពេលជាយូរមកហើយនិងបានប្រើប្រាស់មនុស្សរបស់គេគឺ កឹម សុខា។
មួយវិញទៀត អ្វីដែលជាប្រតិកម្មរបស់ប្រទេសទាំងនោះ វាហាក់ដូចជាការធ្វើបែបបុរេវិនិច្ឆ័យ ដោយសារប្រទេសទាំងនោះពុំបានបញ្ជូនមនុស្សមកធ្វើការសង្កេតការណ៍បោះឆ្នោតនៅកម្ពុជាសូម្បីតែម្នាក់។ ក៏ប៉ុន្តែលទ្ធផលបោះឆ្នោតមិនទាន់ទាំងចេញស្រួលបួលផង ពួកគេបានសម្ដែងការខកចិត្តជាមុនបាត់ទៅហើយ ។ ដូចនេះ មានន័យថា សេចក្តីថ្លែងការណ៍របស់ពួកគេបានធ្វើទុកតាំងពីមុនពេលបោះឆ្នោតរួចស្រេចទៅហើយ ដោយសារតែគេបានដឹងរួចស្រេចទៅហើយថា ប្រទេសកម្ពុជាដែលមានអធិបតេយ្យភាពពេញលេញ និងជានីតិរដ្ឋច្បាស់ជាមិនអនុញ្ញាតឲ្យគណបក្សសង្គ្រោះជាតិដែលត្រូវបានតុលាការកំពូលរបស់កម្ពុជាចេញសាលដីការំលាយចោលនោះ អាចចូលរួមបោះឆ្នោត។ ដូចនេះ ការយល់របស់ពួកគេពុំបានមើលឲ្យឃើញនូវការពិតជាក់ស្តែងក្នុងការអនុវត្តន៍ច្បាប់របស់កម្ពុជាដែលជារដ្ឋអធិបតេយ្យមួយនោះទេ។ អ្វីដែលគេមើលឃើញនោះ គឺកូនជឹងរបស់គេមិនបានចូលរួមបោះឆ្នោត។
ទាំងអស់នេះហើយ ដែលជាមូលហេតុធ្វើឲ្យប្រទេសទាំងអស់ខាងលើនោះមិនពេញចិត្តចំពោះលទ្ធផលនៃការបោះឆ្នោតនៅកម្ពុជា ខណៈពេលប្រទេសជាច្រើនដែលបានបញ្ជូនមនុស្សមកសង្កេតការណ៍បោះឆ្នោតនៅកម្ពុជា រួមមានប្រទេសវៀតណាម ប្រទេសឥណ្ឌា ម៉ាឡេស៊ី ថៃ ឡាវ ចិន ហ្វីលីពីន ឥណ្ឌូណេស៊ី ប្រទេសរុស្ស៊ី ជាដើម។ ពួកគេបានថ្លែងនៅក្នុង សម្លេងតែមួយថា ការបោះឆ្នោតនៅក្នុងប្រទេសកម្ពុជាបានប្រព្រឹត្តទៅដោយសេរី ត្រឹមត្រូវ យុត្តិធម៌ និងធ្វើឡើងក្នុងបរិកាសល្អប្រសើរ។
សរុបមកវិញ ការមិនពេញចិត្តចំពោះលទ្ធផលនៃការបោះឆ្នោតនៅកម្ពុជារបស់ប្រទេសបិតាប្រជាធិបតេយ្យទាំងអស់ខាងលើ កើតចេញពីកម្ពុជាពុំបានធ្វើទៅតាមអ្វីដែលគេចង់បាន និង កើតចេញចរិតនយោបាយនិងមនោគមវិជ្ជាដែលពួកប្រទេសបិតាប្រជាធិបតេយ្យប្រកាន់យក។ វាគ្មានអ្វីចម្លែកនោះទេ ប្រទេសនៅលើលោកនេះតែបាត់បង់ផលប្រយោជន៍របស់គេហើយ អ្វីក៏គេហ៊ានធ្វើដែរ។ តែបើចង់ឲ្យប្រទេសទាំងអស់នោះឈប់ប្រតិកម្ម ឈប់រិះគន់កម្ពុជា គឺមានតែបោះឆ្នោតឲ្យគណបក្សប្រឆាំងឈ្នះទើបធ្វើឲ្យពួកនោះឈប់ ទិតៀនកម្ពុជា។
ទោះបីយ៉ាងណាក៏ដោយ ការបោះឆ្នោតនៅកម្ពុជាបានបញ្ចប់ ដោយទទួលបានលទ្ធផលយ៉ាងត្រចះត្រចង់បំផុត ប្រជាជនទៅបោះឆ្នោតចំនួនជាង៨២ ភាគរយ។ការបោះឆ្នោតជ្រើសតាំងតំណាងរាស្ត្រនៅកម្ពុជាគឺជារឿងផ្ទៃក្នុងកម្ពុជានិងជាព្រឹត្តិការណ៍នយោបាយសំខាន់ក្នុងជីវិតនយោបាយរបស់ប្រជាជនកម្ពុជា៕
Source: Kampuchea Thmey Daily
0 Comments