ខ្សែប្រយុទ្ធមកពីខេត្តកោះកុង ជិន ជុំ (ឬ ជួន ជុំ) សមាជិករបស់ក្លិបបាល់ទាត់អគ្គីសនីកម្ពុជា បានសម្រេចចិត្តចូលនិវត្តន៍ពីអាជីពបាល់ទាត់របស់ខ្លួនហើយ កាលពីដំណាច់ជើងទី១ នៃពានរង្វាន់លីគកំពូលកម្ពុជា Metfone Cambodian League 2018 ក្រោយចាប់អាជីពជាកីឡាករបាល់ទាត់អស់រយៈពេលជាង១៤ឆ្នាំមកនេះ។
កីឡាករវ័យ៣២ឆ្នាំរូបនេះ បានបញ្ជាក់ពីមូលហេតុដែលខ្លួនមិនទាន់ដាច់ស្រេចពីអាជីពបាល់ទាត់នេះថា «ខ្ញុំចូលនិវត្តន៍ហើយ ខ្ញុំមិនបានលេងជុំទី២លីគទេ។ ខ្ញុំចាស់ហើយ រត់មិនសូវបាន ព្រោះកាយសម្បទាលែងអំណោយផល កម្លាំងខ្សោយ។ ខ្ញុំចាស់ហើយ ទុកឲ្យក្មេងៗបង្ហាញសមត្ថភាពម្ដង។ ទោះយ៉ាងណា ខ្ញុំក៏មិនទៅណាឆ្ងាយពីបាល់ទាត់ដែរ គឺខ្ញុំនឹងឆ្លៀតពេលធ្វើជំនួយការលោកគ្រូ វុទ្ធី ជួយបង្ហាត់ក្មេងៗ ក្នុងពេលទំនេរពីការងារនៅអគ្គិសនីកម្ពុជា»។
យ៉ាងណាក្តីក្រោយចូលនិវត្តន៍ ពីបាល់ទាត់ ជិន ជុំ នឹងនៅតែបម្រើការងារនៅអង្គភាពអគ្គិសនីកម្ពុជា និងរូបគេឆ្លៀតពេលជួយការងារបង្វឹករបស់លោក ប្រាក់ វុទ្ធី គ្រូបង្វឹកប្រចាំក្រុមអគ្គីសនីកម្ពុជា បច្ចុប្បន្ន ដូចជាបង្ហាត់ក្មេងៗ ជាដើម។ ម្យ៉ាងរូបគេកំពុងសិក្សាវគ្គគ្រូបង្វឹកកម្រិត C Licenseផងដែរ។
កីឡាករ ជិន ជុំ ក្រៅពីប្រកបអាជីពតាមក្លិប រូបគេក៏ធ្លាប់បានជាប់ឈ្មោះក្នុងក្រុមជម្រើសជាតិកម្ពុជា ដែរ។ រូបគេចាប់អាជីពបាល់ទាត់ដំបូងនៅឆ្នាំ២០០៤ ដោយចូលរួមជាមួយក្រុមជម្រើសខេត្តកោះកុង ខណៈនៅឆ្នាំ២០០៦ គេបានចូលរួមជាមួយក្រុមភ្នំពេញក្រោន ហើយនៅឆ្នាំ២០០៨ ដល់២០១៦ បានចូលរួមជាមួយក្រុមណាហ្គាវើល ស្របពេលឆ្នាំបន្ទាប់បានចូលរួមជាមួយក្រុមអាស៊ីអឺរ៉ុប និងចុងក្រោយនៅឆ្នាំ២០១៨ នេះចូលរួមជាមួយក្រុមអគ្គីសនីកម្ពុជា។ រូបគេធ្លាប់ឈ្នះជើងឯកលីគកំពូលកម្ពុជា ជាមួយក្រុមណាហ្គាវើល នៅឆ្នាំ២០០៩ និងឈ្នះជើងឯកពានរង្វាន់សម្តេចតេជោ ហ៊ុន សែន នៅឆ្នាំ២០១៣ ជាមួយណាហ្គាវើល។ នៅឆ្នាំ២០១៣ រូបគេទទួលបានពានរង្វាន់កីឡាករឆ្នើមប្រចាំពានរង្វាន់សម្តេចតេជោ ផងដែរ៕
Source: Kampuchea Thmey Daily
0 Comments