រតនគិរី ៖ អ្នកទោសជនជាតិវៀតណាម ជាប់ចោទពីបទជួញដូរថ្នាំញៀនម្នាក់ បានធ្វើអត្តឃាត ដោយចង.កសម្លាប់ខ្លួនមិនទាន់ដឹងពីមូលហេតុច្បាស់លាស់នៅឡើយ។
ហេតុការណ៍នេះ បង្កការភ្ញាក់ផ្អើលកាលពីវេលាម៉ោង២រសៀលថ្ងៃអង្គារ ១១រោច ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៧ ខែសីហា ឆ្នាំ២០១៨ នៅចំណុចពន្ធនាគារភ្នំស្វាយ ស្ថិតនៅក្នុងភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរី។
លោក អ៊ុក គឹមជុន ប្រធានពន្ធនាគារខេត្តបានឲ្យកម្ពុជាថ្មី ដឹងនៅព្រឹកថ្ងៃទី៨ ខែសីហានេះ ថា រឿងបញ្ហាជនជាតិវៀតណាមស្លាប់នេះ លោកមិនបានដឹងទេ ឲ្យទៅសួរតុលាការទៅ លោកជាប់រវល់ប្រជុំ បានន័យថា លោកមិនទទួលខុសត្រូវលើជនជាតិវៀតណាមដែលស្លាប់នោះទេ បែរជាឲ្យអ្នកកាសែតទៅសួរតុលាការទៅវិញ លោកជាប្រធានពន្ធនាគារខេត្តឆ្លើយបែបនេះគឺយករួចខ្លួន។
អ្នកទោសជនជាតិវៀតណាមឈ្មោះ ចូវ វាងដាំង ភេទប្រុស អាយុ៦១ឆ្នាំ ជនជាតិវៀតណាម ជាប់ពន្ធនាគារពីបទជួញដូរថ្នាំញៀន ដោយជាប់ឃុំឃាំងកាលពីឆ្នាំ២០១២ នៅភ្នំពេញ ហើយបានផ្ទេរមកខេត្តរតនគិរី កាលពីឆ្នាំ២០១៦ ដែលមានទោសពិន័យ៣០ឆ្នាំ។ អ្នកទោសរូបនេះធ្វើអត្តឃាត (ចង.កសម្លាប់ខ្លួន) ក្នុងបន្ទប់ទឹក ត្រង់អគារB ចំណុចបន្ទប់B4 ក្នុងពន្ធនាគារខេត្តរតនគិរី ហើយការធ្វើអត្តឃាតនេះ រកមូលហេតុមិនឃើញនោះទេ។
សមត្ថកិច្ចជំនាញបច្ចេកទេសវិទ្យាសាស្ត្រនៃស្នងការដ្ឋាននគរបាលខេត្តបានពិនិត្យរួចរាល់ ទើបធ្វើលិខិតប្រគល់សពជូនសាច់ញាតិយកទៅចាត់ចែងតាមប្រពៃណីនៅប្រទេសវៀតណាមវិញ៕
Source: Kampuchea Thmey Daily
0 Comments