ភ្នំពេញ ៖ លោក កី ម៉ានេរ៉ា អនុ ប្រធានសាលាដំបូងរាជធានីភ្នំពេញ កាលពីល្ងាចថ្ងៃទី ០៧សីហា ឆ្នាំ២០១៨ បានប្រកាសសាលក្រមសម្រេចផ្តន្ទាទោស បុរសម្នាក់ ដាក់ពន្ធនាគារ២ឆ្នាំ ពីបទ មនុស្សឃាតដោយអចេតនា និងប្រើប្រាស់ដោយខុសច្បាប់នូវសារធាតុញៀន។
តុលាការក៏បានសម្រេចពិន័យជាប្រាក់ ចំនួន ៤លាន រៀលបង់ចូលជាថវិការដ្ឋ ហើយបង្គាប់អោយជនជាប់ចោទ សងប្រាក់ ដល់ ឪពុក ជនរងគ្រោះចំនួន១៥លានរៀលផងដែរ។
ជនត្រូវចោទឈ្មោះ ប៊ុន អូន អាយុ ២៥ឆ្នាំ ជាប្តីរបស់ស្ត្រីរងគ្រោះដែលមាន ផ្ទៃពោះ៨ខែ បានត្រូវសមត្ថកិច្ចឃាត់ ខ្លួនកាលពីចុងឆ្នាំ២០១៧ នៅកន្លែងកើតហេតុ។
កាលពីរសៀលថ្ងៃទី២ ខែវិច្ឆិកា ឆ្នាំ២០១៧មានហេតុការណ៍ មួយបានកើតឡើង ដោយស្ត្រីម្នាក់ មានផ្ទៃពោះ៨ខែបានធ្លាក់ពីលើសំណង់អគារខុនដូរស្លាប់ដ៏រន្ធត់ ស្ថិតនៅចំណុចការដ្ឋានដែលកំពុងសាងសង់ ស្ថិតនៅខាងត្បូងស្ថានទូតចិន លើផ្លូវលេខ១៦៧ កែងផ្លូវ៤៣២ សង្កាត់ទួលទំពូង២ ខណ្ឌចំការមន រាជធានីភ្នំពេញ។
ក្រោយហេតុការណ៍កើតឡើង សមត្ថកិច្ចបានបើកការស៊ើបអង្កេត ជាបន្តបន្ទាប់ ដោយបានឃាត់ខ្លួន បុរសជាប្តីមកសាកសួរ។
បុរសជាប្តីបានសារភាពថា ខ្លួនមិនមាន ចេតនាសម្លាប់ប្រពន្ធនោះទេ ពោលគឺ ថ្ងៃកើតហេតុខ្លួនបានប្រលែងលេងជា មួយប្រពន្ធដែលកំពុងពពោះ៨ខែ។ ស្រាប់តែប្រពន្ធរអិលធ្លាក់ពីលើអាគារស្លាប់តែម្តង ។
ចាប់តាំងពីពេលនោះមកតុលាការបានឃុំខ្លួនបុរសជាប្ដីរហូតដល់ថ្ងៃកាត់ទោសនិងប្រកាសសាលក្រមនេះ៕
Source: Kampuchea Thmey Daily
0 Comments