សហរដ្ឋអាមេរិកកាលពីថ្ងៃសុក្រ បានដាក់ទណ្ឌកម្មលើមេបញ្ជាការយោធា និងមេបញ្ជាការប៉ូលិសមីយ៉ាន់ម៉ាចំនួន៤នាក់ និងអង្គភាពកងទ័ពចំនួនពីរដោយចោទប្រកាន់ពួកគេអំពី “ការបោសសម្អាតជនជាតិភាគតិច” ប្រឆាំងនឹងជនមូស្លីមរ៉ូហ៊ីងយ៉ា និងការរំលោភបំពានសិទិ្ធមនុស្សរីករាលដាលនៅទូទាំងប្រទេសអាស៊ីអាគ្នេយ៍មួយនេះ។
ការដាក់ទណ្ឌកម្មដោយក្រសួងរតនាគារបានកត់សម្គាល់ពីសកម្មភាពដ៏តឹងរ៉ឹងបំផុតរបស់សហរដ្ឋអាមេរិកដើម្បីឆ្លើយតបទៅនឹងការបង្ក្រាបរបស់មីយ៉ាន់ម៉ាលើជនជាតិភាគតិចរ៉ូហ៊ីងយ៉ាដែល ចាប់ផ្តើមកាលពីឆ្នាំមុននិងបានជំរុញឲ្យមនុស្សជាង៧០០,០០០នាក់ទៅប្រទេសបង់ក្លាដែស។
ប៉ុន្តែរដ្ឋបាលលោក Trump មិនបានកំណត់ទិសដៅលើយោធាខ្ពស់បំផុតរបស់មីយ៉ាន់ម៉ាទេ។
វិធានការនេះត្រូវបានប្រកាសខណៈរដ្ឋមន្ត្រីក្រសួងការបរទេសលោក Mike Pompeo ត្រៀមចេញនូវការរកឃើញនៃការស៊ើបអង្កេតរបស់សហរដ្ឋអាមេរិកអំពីអំពើប្រល័យពូជសាសន៍របស់អាជ្ញាធរមីយ៉ាន់ម៉ាប្រឆាំងនឹងក្រុមជនជាតិរ៉ូហ៊ីងយ៉ានៅក្នុងរដ្ឋរ៉ាក់ឃីន។
ការចេញផ្សាយរបាយការណ៍នេះដែលចងក្រងពីការសម្ភាសន៍នៅជំរំជនភៀសខ្លួនក្នុងប្រទេសបង់ក្លាដែសត្រូវបានគេរំពឹងថានឹងធ្វើឡើងនៅថ្ងៃទី២៥សីហាដែលជាថ្ងៃគម្រប់ខួបមួយឆ្នាំនៃការបង្ក្រាបបង្ហូរឈាម។
អនុរដ្ឋលេខាធិការក្រសួងរតនាគារទទួលបន្ទុកយកការណ៍ភេវរកម្មនិងហិរញ្ញវត្ថុលោកស្រី Sigal Mandelker បាននិយាយថា “កងកម្លាំងសន្តិសុខមីយ៉ាន់ម៉ាបានចូលរួមក្នុងយុទ្ធនាការហិង្សាប្រឆាំងសហគមន៍ជនជាតិភាគតិចនៅទូទាំងប្រទេសមីយ៉ាន់ម៉ារួមមានការបោសសម្អាតជនជាតិភាគតិច ការសម្លាប់រង្គាល ការរំលោភផ្លូវភេទ ការសម្លាប់ក្រៅប្រព័ន្ធតុលាការនិងការរំលោភបំពានសិទ្ធិមនុស្សធ្ងន់ធ្ងរផ្សេងៗទៀត”។
ទណ្ឌកម្មត្រូវបានដាក់លើមេបញ្ជាការយោធាលោក Aung Kyaw Zaw, Khin Maung Soe និង Khin Hlaing និងមេបញ្ជាការប៉ូលិសព្រំដែន Thura San Lwin ព្រមទាំងកងពលធំថ្មើរជើងលេខ៣៣និងទី៩៩។
វិធានការនេះបានអំពាវនាវឲ្យមានការបង្កកទ្រព្យសម្បត្តិនៅសហរដ្ឋអាមេរិកដែលបុគ្គលទាំងនេះកាន់កាប់ ការហាមឃាត់ចំពោះជនជាតិអាមេរិកពីការធ្វើពាណិជ្ជកម្មជាមួយពួកគេក៏ដូចជាបំរាមលើការធ្វើដំណើរទៅសហរដ្ឋអាមេរិកផងដែរ៕ REUTERS
Source: Kampuchea Thmey Daily
0 Comments