រតនគិរី ៖ ម៉ូតូពីរគ្រឿងបុកគ្នាយ៉ាងពេញទំហឹងក្នុងទិសដៅស្របគ្នាបណ្តាលឲ្យរងការខូចខាតយ៉ាងដំណំផងដែរ ចំណែកមនុស្សរងរបួសស្រាល។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៣និង៧នាទីរសៀល ថ្ងៃទី២៧ ខែសីហា ឆ្នាំ២០១៨ តាមបណ្តោយផ្លូវជាតិលេខ៧៨ ទល់មុខសាលាបឋមសិក្សាបូរីកម្មករបួន ស្ថិតនៅក្នុងភូមិ៤ សង្កាត់កាចាញ ក្រុងបានលុង។
ប្រភពពីសាក្សីនៅកន្លែងកើតហេតុបានឲ្យដឹងថា ម៉ូតូ១គ្រឿងម៉ាកស្គុបពី ពណ៌ស ពាក់ស្លាកលេខកំពង់ចាម 1J-5871 ជិះក្នុងទិសដៅពីកើតទៅលិច ហើយបានបត់ឆ្វេងខណៈពេលនោះមានម៉ូតូមកពីក្រោយក៏បុកចំពាក់កណ្តាលម៉ូតូស្គុបពីយ៉ាងពេញទំហឹងតែម្តង។
ប្រភពបន្តថា យុវតីមានឈ្មោះ ហៀម មី អាយុ១៧ឆ្នាំ ជនជាតិទំពួន រស់នៅភូមិសិ៍ល សង្កាត់យក្ខឡោម ក្រុងបានលុង របួសស្រាល។
រីឯម៉ូតូ១គ្រឿងម៉ាកហុងដាឌ្រីម សេ125 ស៊េរីឆ្នាំ2018 ពណ៌ខ្មៅ ពាក់ស្លាកលេខរតនគិរី 1E-1918 មានឈ្មោះ គង់ សារឿន ភេទប្រុស អាយុ៥១ឆ្នាំ ជនជាតិខ្មែរ រងរបួសត្រូវជើងបន្តិចបន្តួច មានទីលំនៅភូមិអូរកន្ទិល សង្កាត់បឹងកន្សែង ក្រុងបានលុង។
ក្រោយកើតហេតុនគរបាលប៉ុស្តិ៍កាចាញចុះមកអន្តរាគមន៍ធ្វើការវាស់វែង ហើយភាគីទាំងសងខាងបានសម្របសម្រួលគ្នាឲ្យខាងស្គុបពីចេញថ្លៃជួសជុលម៉ូតូធ្វើឡើងវិញដើម្បីបញ្ចប់រឿង៕
Source: Kampuchea Thmey Daily
0 Comments