សហព័ន្ធកីឡាបាល់ទាត់កម្ពុជា (ស.ប.ក) បានប្រកាសជាសាធារណៈកាលពីច័ន្ទ ដើមសប្ដាហ៍នេះថាស្ថានីយទូរទស្សន៍BTV បានដេញថ្លៃឈ្នះគេជាមួយស្ថានីយទូរទស្សន៍ក្នុងស្រុកដទៃទៀត ដើម្បីសិទ្ធិផ្សាយផ្ទាល់គ្រប់ការប្រកួតមិត្តភាពអន្តរជាតិរបស់ក្រុមជម្រើសជាតិកម្ពុជា ដែលធ្វើឡើងនៅឆ្នាំ២០១៨ នេះ។
លិខិតផ្លូវការរបស់ស.ប.ក បានបញ្ជាក់ថា «ស្ថានីយទូរទស្សន៍ BTV ទទួលបានសិទ្ធិពីសហព័ន្ធកីឡាបាល់ទាត់កម្ពុជា ដើម្បីរៀបចំផ្សាយផ្ទាល់រាល់ការ ប្រកួតកីឡាបាល់ទាត់មិត្តភាពអន្តរជាតិក្នុងស្រុកនៃក្រុមជម្រើសជាតិកម្ពុជាសម្រាប់ឆ្នាំ២០១៨ ក្រោយការដេញថ្លៃត្រូវ បានបញ្ចប់ដោយជោគជ័យទាំងតម្លៃ និងលក្ខណៈ បច្ចេកទេស»។
ក្រុមជម្រើសជាតិកម្ពុជា ត្រៀមប្រកួតមិត្តភាពចំនួន៤លើក ដោយគ្រោងធ្វើឡើងនៅថ្ងៃទី ១០ ខែកញ្ញា ប្រកួតជាមួយក្រុមជម្រើសជាតិម៉ាឡេស៊ី ហើយនៅ១២ ខែតុលា ត្រូវបន្តប្រកួតជាមួយក្រុមជម្រើសជាតិទីម័រខាងកើត និងនៅថ្ងៃទី១៦ ខែតុលា ប្រកួតជាមួយក្រុមជម្រើសជាតិសិង្ហបុរី។
ចុងក្រោយនៅថ្ងៃទី២ ខែវិច្ឆិកា កម្ពុជា ត្រូវបន្តប្រកួតជាមួយ ក្រុមបរទេស (មិនទាន់ប្រាកដថាក្រុមណា)។
នេះជាការត្រៀមខ្លួនប្រកួតក្នុងពានរង្វាន់ AFF Suzuki Cup 2018 របស់ក្រុម ជម្រើសជាតិកម្ពុជា ខណៈពានរង្វាន់នេះបែងចែកប្រកួតជម្រុះជា២វគ្គដោយក្នុងនោះ មានវគ្គជម្រុះបឋមនិងវគ្គជម្រុះតាមពូលមុនស្វែងរកឃើញក្រុមខ្លាំងឡើងទៅដណ្តើមជើងឯក។ ប្រកួតវគ្គជម្រុះដំបូងក្រុមទីម័រខាងកើត ត្រូវប៉ះប្រ៊ុយណេ ចំនួន២ជើងគឺប្តូរទឹកដីគ្នាដោយនៅថ្ងៃទី៣ ខែកញ្ញា ឆ្នាំ២០១៨ ធ្វើឡើងនៅប្រទេសទីម័រខាងកើត ហើយជើងទី២ ធ្វើឡើងនៅថ្ងៃទី១១ខែកញ្ញា ឆ្នាំ២០១៨ ធ្វើឡើងនៅប្រទេសប្រ៊ុយណេ។ក្រុមឈ្នះនៅវគ្គជម្រុះនេះទទួលបានកៅអីឡើងទៅប្រកួតវគ្គជម្រុះតាមពូលជាបន្តជាមួយក្រុម៩ផ្សេងទៀត។
ក្រុមដែលចាំនៅវគ្គជម្រុះតាមពូលបានចាប់ឆ្នោតរួចរាល់គឺពូល A មានវៀតណាម ម៉ាឡេស៊ី មីយ៉ាន់ម៉ា កម្ពុជា និងឡាវ ខណៈពូល B មានថៃ ឥណ្ឌូណេស៊ី ហ្វីលីពីន សិង្ហបុរី និងក្រុមឈ្នះនៅវគ្គជម្រុះអាចជាប្រ៊ុយណេ ឬទីម័រខាងកើត។ តាមគម្រោងការវគ្គជម្រុះតាមពូលនេះនឹងធ្វើឡើងចាប់ពីថ្ងៃទី៨ ខែវិច្ឆិកា ដល់ថ្ងៃទី១៥ខែធ្នូ ឆ្នាំ២០១៨។
សម្រាប់កម្មវិធីប្រកួតជម្រុះពូល A របស់ក្រុមកម្ពុជា វិញនឹងប្រកួតបើកឆាកប៉ះក្រុមម៉ាឡេស៊ី នៅថ្ងៃទី៦ ខែវិច្ឆិកា នៅរាជធានីភ្នំពេញ ខណៈត្រូវប៉ះម្ចាស់ផ្ទះមីយ៉ាន់ម៉ា នៅថ្ងៃទី១២ ខែវិច្ឆិកា នៅទីក្រុងរ៉ង់ហ្គូន រហូតដល់ថ្ងៃទី២០ ខែវិច្ឆិកា ក្រុមកម្ពុជា ត្រូវប៉ះឡាវ នៅរាជធានីភ្នំពេញ ហើយនៅថ្ងៃទី២៤ ខែវិច្ឆិកា ត្រូវធ្វើដំណើរទៅប៉ះម្ចាស់ផ្ទះវៀតណាម នៅទីក្រុងហាណូយ៕
Source: Kampuchea Thmey Daily
0 Comments