ប្រតិភូវៀតណាមសាទរកម្ពុជាសម្រេចបានជ័យជំនះលើការបោះឆ្នោតនីតិកាលទី៦ ធ្វើឲ្យកម្ពុជា លេចធ្លោ នៅលើឆាកអន្តរជាតិ

ភ្នំពេញ ៖ គណៈប្រតិភូវៀតណាមមកពីសមាគមមិត្តភាពវៀតណាម កម្ពុជា បានថ្លែងនូវការសាទរយ៉ាងពន់ពេក បន្ទាប់ពីកម្ពុជាទទួលបានល្បីល្បាញលើឆាកអន្តរជាតិ ដោយសារគណបក្សប្រជាជនកម្ពុជា ឈ្នះភ្លូកទឹកភ្លូកដី បានរហូត១២៥អាសនៈ ក្នុងការបោះឆ្នោតជ្រើសតាំងតំណាងរាស្ត្រអាណត្តិទី៦ ដែលបានដំណើរការយ៉ាងរលូន និងយត្តិធម៌។

ការថ្លែងបែបនេះ ធ្វើឡើងនៅទីស្តីការក្រសួងទំនាក់ទំនងជាមួយរដ្ឋសភា រដ្ឋសភា និងអធិការកិច្ច ក្នុងជំនួបពិភាក្សាការងារ រវាងលោកជំទាវ ម៉ែន សំអន ជាមួយគណៈប្រតិភូសមាគមមិត្តភាព វៀតណាម- កម្ពុជា ដែលដឹកនាំដោយលោកវ៉ូ ម៉ៅ ប្រធានសមាគមនា ល្ងាចថ្ងៃទី២៨ ខែសីហានេះ។

នៅក្នុងឱកាសជំនួបនោះដែរ លោកជំទាវកិត្តិសង្ហបណ្ឌិតម៉ែន សំអន ប្រធានសមាគម មិត្តភាពកម្ពុជា វៀតណាម មាន ប្រសាសន៍លើកឡើងថា,ដំណើរទស្សនកិច្ច របស់គណៈប្រតិភូសមាគម មិត្តភាព កម្ពុជា វៀតណាម ស្របពេលដែលកម្ពុជា បានបញ្ចប់ការបោះឆ្នោតជ្រើសរើសសមាជិករដ្ឋសភា នីតិកាលទី៦ កាលពីថ្ងៃទី ២៩ ខែកក្កដាឆ្នាំ២០១៨កន្លងទៅនេះ។

លោកវ៉ូ ម៉ៅ ប្រធានសមាគមមិត្តភាព វៀត ណាម-កម្ពុជា មានប្រសាសន៍ លើកឡើងថា ដំណើរទស្សនកិច្ចពេលនេះ គឺរឹតចំណងមិត្តភាពនៃប្រទេសទាំងពីរឲ្យកាន់តែរឹងមាំ។ ចំណងមិត្តភាព៥០ឆ្នាំកម្ពុជា- វៀតណាម និង៤០ឆ្នាំដែលកម្ពុជា បានរំដោះចេញពីរបបប៉ុលពត។

លោកវ៉ូ ម៉ៅ បានបញ្ជាក់ថា សមាគមប្រទេសទាំងពីរ បានចុះកិច្ចព្រមព្រៀងជាមួយគ្នា ហើយអនុវត្តរួមគ្នា។ សមាគមមិត្តភាព វៀតណាម -កម្ពុជា បានពង្រឹងទំនាក់ទំនងយ៉ាងជិតស្និទ្ធជាមួយបណ្តាខេត្ត និងខេត្តជាប់ព្រំដែនជាមួយគ្នា ដូចជានៅតំបន់ភាគឦសាន្តជាដើម បានសហការគ្នាយ៉ាងល្អ ហើយស្ថានទូតវៀតណាម បានសហការទៅតាមតួនាទីរបស់ខ្លួន ទំនាក់ទំនងរវាងស្ថានទូត បានសហការគ្នាយ៉ាងជិតស្និទ្ធ។

សមាគម បានជួយបណ្ដុះបណ្ដាល និស្សិតកម្ពុជា ដែលបានទៅសិក្សានៅប្រទេសវៀតណាម និងជួយបណ្ដុះបណ្ដាលផ្នែកភាសាវៀតណាម និងបំផុសបំផុលជាចលនា អតីតកម្មាភិបាលវៀតណាមនិងសហគ្រិនឲ្យទទួលនិស្សិតកម្ពុជា ដែលទៅសិក្សានៅវៀតណាម ធ្វើកូនធម៌ និងហូបអាហារសាមគ្គីនៅតាមវត្ត កិច្ចសហការនេះ បានអនុវត្តពីលើចុះមកក្រោម។
លោកវ៉ូម៉ៅ បានអបអរសាទរប្រទេស កម្ពុជាសម្រេចបានជ័យជំនះលើការ បោះ ឆ្នោតជ្រើសតាំងសមាជិកសភាពេលថ្មីៗនេះ បានធ្វើឲ្យកម្ពុជា លេចធ្លោនៅលើឆាកអន្តរជាតិ ។ កម្ពុជាមានការអភិវឌ្ឍសេដ្ឋកិច្ចយ៉ាងរីកចម្រើន គ្រប់វិស័យ។

លោកជំទាវកិត្តិសង្ហបណ្ឌិត ម៉ែន សំអន បានថ្លែងអំណរគុណដល់គណៈប្រតិភូសមាគមមិត្តភាពកម្ពុជា វៀតណាម ហើយកម្ពុជាក៏ត្រៀមប្រារព្ធខួបទី៤០ឆ្នាំនៃជ័យជំនះ៧មករាឆ្នាំ១៩៧៩ នៅពេលខាងមុខនេះ ។

សមាគមមិត្តភាព កម្ពុជា វៀតណាម មានសកម្មភាពជាច្រើន ដូចជាបានជួយ ឧបត្ថម្ភ ដល់និស្សិតកម្ពុជា ដែលកំពុងសិក្សានៅវៀតណាម ។ រាជរដ្ឋាភិបាលកម្ពុជា បានបញ្ជូននិស្សិតស៊ីវិលទៅសិក្សានៅប្រទេសវៀតណាមក្នុង១ឆ្នាំចំនួន ១០០០នាក់ ដោយពុំគិតនិស្សិតកម្ពុជា ជាកងទ័ព និងនគរបាលទេ ។ប្រទេសទាំងពីរបានបន្តបណ្តុះចំណងមិត្តភាព បង្ហាញនូវទំនាក់ទំនងមិត្តភាពការទូត នៃប្រទេសទាំងពីរ។

លោកជុំទាវ កិត្តិសង្ហបណ្ឌិតម៉ែន សំអន បានបញ្ជាក់ទៀតថា ទំនាក់ទំនងមិត្តភាពនៃប្រទេសទាំងពីរកាន់តែជិតស្និទ្ធជាមួយ គ្នា ក្រុមមិត្តភាពនៃប្រទេសទាំងពីរគាំទ្រគ្នា ទៅវិញទៅមក ។

លោកជំទាវកិត្តិសង្ហបណ្ឌិតបានជំរាបគណៈប្រតិភូសមាគមមិត្តភាពវៀតណាមទៀតថា-នៅថ្ងៃទី៥ខែកញ្ញាខាងមុខនេះរដ្ឋសភាប្រជុំលើកទី១ក្រោមព្រះរាជធិបតីព្រះមហាក្សត្រកម្ពុជា ហើយនៅព្រឹកថ្ងៃទី ៧ខែកញ្ញាប្រជុំគណៈរដ្ឋមន្ត្រីដំបូងនៃនីតិ កាលទី៦នៃរដ្ឋសភាជាតិ៕