ភ្នំពេញ ៖ អ្នកនាំពាក្យក្រសួងអប់រំយុវជន និងកីឡាបានផ្តល់សិទ្ធិអំណាចដល់គ្រឹះស្ថានមធ្យមសិក្សានីមួយៗដែលមានអនុវិទ្យាល័យនិងវិទ្យាល័យរៀបចំការប្រឡងសញ្ញាបត្រមធ្យមសិក្សាបឋមភូមិឬប្រឡងឌីប្លូមដោយខ្លួនឯងដើម្បីកែទម្រង់ការប្រឡងឲ្យកាន់តែប្រសើរឡើងថែមទៀត។
លោករស់ សាលីន អ្នកនាំពាក្យក្រសួងអប់រំយុវជន និងកីឡាបានមានប្រសាសន៍កាលពីថ្ងៃទី៧ខែសីហា ឆ្នាំ២០១៨ថា ការប្រគល់សិទ្ធិអំណាច និងការទទួលខុសត្រូវទាំងស្រុងជូនគ្រឹះស្ថានមធ្យមសិក្សានីមួយៗក្នុងការរៀបចំការប្រឡងឌីប្លូមនេះគឺចាប់តាំងពីការរៀបចំប្រធានវិញ្ញាសា ដំណើរការសំណេរ កំណែ ស្រង់បូកពិន្ទុនិងការប្រកាសលទ្ធផលប្រឡងជាដើម។
លោកបានបន្តថា ការផ្លាស់ប្តូរប្រឡងពីមន្ទីរអប់រំយុវជននិងកីឡារាជធានីខេត្តមកឲ្យសាលានីមួយៗជាអ្នករៀបចំដោយខ្លួនឯងវិញនេះ បានជួយកាត់បន្ថយការចំណាយថវិកាបានយ៉ាងច្រើនប្រមាណ១០ពាន់លានរៀល ខណៈជារៀងរាល់ឆ្នាំក្រសួងត្រូវចំណាយលើការរៀប ចំប្រលងឌីប្លូមនេះប្រមាណ១៥ពាន់លានរៀល។
លោកបានបន្ថែមទៀតថា ថវិកាដែលសន្សំបានពីការប្រលងឌីប្លូមនេះក្រសួងនឹងយកទៅចំណាយលើការប្រលងសញ្ញាបត្រមធ្យមសិក្សាទុតិយភូមិឬបាក់ឌុបវិញដែលចំណាយក្នុង១ឆ្នាំៗប្រមាណពី៤ទៅ៥លានដុល្លាអាមេរិក។
លោក បានបន្ថែមទៀត ថា ទន្ទឹមនឹងនេះក្រសួងក៏បានបណ្តុះបណ្តាលនិងណែនាំដល់គណៈគ្រប់គ្រងសាលានិងគ្រូជារៀងរាល់ឆ្នាំដើម្បីបង្កើនចំណេះដឹងនិងសមត្ថភាពក្នុងការរៀបចំការប្រឡងឌីប្លូមឲ្យកាន់តែល្អប្រសើរមានការទទួលខុសត្រូវនិងមានប្រសិទ្ធភាពខ្ពស់។
ជាមួយគ្នានេះដែរអ្នកនាំពាក្យរូបនោះបានឲ្យដឹងថាក្រសួងបានណែនាំឲ្យមន្ទីរអប់រំយុវជននិងកីឡារាជធានីខេត្តទាំងអស់ត្រូវបញ្ជូនមន្ត្រីការិយាល័យជំនាញចុះត្រួតពិនិត្យតាមមណ្ឌលប្រឡងមួយចំនួនក្នុងករណីចាំបាច់និងចេញវិញ្ញាបនបត្របណ្តោះអាសន្នមធ្យមសិក្សាបឋមភូមិដល់បេក្ខជនទាំងអស់ដែលបានប្រឡងជាប់។
គួរបញ្ជាក់ថាការប្រឡងសញ្ញាបត្រមធ្យមសិក្សាបឋមភូមិឬឌីប្លូមឆ្នាំនេះបានប្រព្រឹត្តិទៅនៅថ្ងៃទី៦និង៧សីហានេះដោយមានបេក្ខជនចូលរួមប្រឡងចំនួន១៨២៣៧៥ចែកជា១៦៥៨ មណ្ឌលកើនជាងឆ្នាំមុនជាង២ម៉ឺននាក់។
ចំពោះមុខវិជ្ជាប្រឡង មានចំនួន ១០មុខវិជ្ជា ត្រូវជា ១១ វិញ្ញាសា រួមមានតែងសេចក្ដី .គីមីវិទ្យា .ផែនដីនិងបរិស្ថានវិទ្យា .រូបវិទ្យា .ភូមិវិទ្យា សីលធម៌-ពលរដ្ឋវិជ្ជាគណិតវិទ្យា ការសរសេរតាមអាន ជីវវិទ្យា ប្រវត្តិវិទ្យា និង ភាសាបរទេស។ ចំពោះលទ្ធផលប្រឡងនឹងប្រកាសជាផ្លូវការនៅថ្ងៃទី១៣ខែសីហាឆ្នាំ២០១៨ខាងមុខនេះ។
របបពិន្ទុដែលបេក្ខជនទទួលបានជាអតិបរមាមានចំនួន៤៤៥ពិន្ទុនិងរបបពិន្ទុប្រចាំឆ្នាំ១០០ពិន្ទុសរុបពិន្ទុទាំងអស់៥៤៥ពិន្ទុ។ ប៉ុន្តែដោយសារភាសាបរទេសជាវិញ្ញាសាស្ម័គ្រដូចនេះពិន្ទុប្រលងជាប់គឺ៥៤៥ដក២៥ រួចចែកនឹង២ស្មើនឹង២៦០ពិន្ទុសំរាប់បេក្ខជនចំណេះទូទៅនិងបំពេញវិជ្ជា។ចំពោះបេក្ខជនស្វ័យរិនពិន្ទុជាប់៤៤៥ដក២៥ចែកនឹង២ស្មើនឹង២១០ពិន្ទុ។
ពិន្ទុដែលទទួលបាននិទ្ទេសមធ្យមគឺចាប់ពី២៦០ដល់៣៣៧ពិន្ទុ និទ្ទេសល្អបង្គួរចាប់ពី៣៣៨ដល់៤១៥ពិន្ទុនិងនិទ្ទេសល្អចាប់៤១៦ពិន្ទុឡើងទៅសម្រាប់បេក្ខជនចំណេះទូទៅនិងបំពេញវិជ្ជា។ចំពោះបេក្ខជនស្វ័យរិនពិន្ទុចាប់ពី២១០ដល់២៧២ទទួលនិទ្ទេសមធ្យម។ពិន្ទុចាប់ពី២៧៣ដល់៣៣៥ទទួលបាននិទ្ទេសល្អបង្គួរនិងពិន្ទូចាប់ពី៣៣៦ឡើងទៅទទួលបាននិទ្ទេសល្អ៕
Source: Kampuchea Thmey Daily
0 Comments