អាជ្ញាធរវ៉េណេហ្ស៊ូអេឡា បានប្តេជ្ញាកាលពីថ្ងៃចន្ទថា នឹងកម្ចាត់ផែនការណាដែលប្រឆាំង នឹងលោកប្រធានាធិបតី Nicolas Maduro បន្ទាប់ពីអ្វីដែលពួកគេនិយាយថា ជាការប៉ុនប៉ង “ធ្វើឃាត” ដោយប្រើយន្តហោះដ្រូនកាលពីចុងសប្តាហ៍ដែលគាំទ្រដោយប្រទេស កូឡុំប៊ី។
ការចោទប្រកាន់មួយដោយលោក Maduro ដែលថា សមភាគីកូឡុំប៊ីលោក Juan Manuel Santos នៅពីក្រោយឧបទ្ទវហេតុនេះបានធ្វើឲ្យទំនាក់ទំនងដែលអាក្រក់រួចទៅហើយរវាងទីក្រុង Caracas និង Bogota កាន់តែយ៉ាប់យ៉ឺនបន្ថែមទៀត។
លោក Santos ដែលបានប្រគល់អំណាចទៅឲ្យអ្នកស្នងតំណែងគឺលោក Ivan Duque នៅថ្ងៃអង្គារបានច្រានចោលការចោទប្រកាន់នេះយ៉ាងដាច់អហង្ការ។ រដ្ឋាភិបាលរបស់លោកបានចាត់ទុកវាថា “មិនសមហេតុផលទាល់តែសោះ”។
លោក Maduro និងរដ្ឋាភិបាលរបស់លោកបាននិយាយថា លោកប្រធានាធិបតីត្រូវបានកំណត់គោលដៅដោយដ្រូនចំនួនពីរគ្រឿងដែលមានផ្ទុកគ្រឿងផ្ទុះ។ ប៉ុន្តែព័ត៌មានលម្អិតនៃឧបទ្ទវហេតុនេះនៅតែមិនច្បាស់លាស់ឡើយដោយមានព័ត៌មានផ្ទុយៗគ្នាចេញពីប្រភពផ្សេងៗ។
រដ្ឋបាលលោក Maduro បានបន្ទោសការវាយប្រហារនេះលើប្រទេសកូឡុំប៊ីដោយធ្វើការជាមួយក្រុមប្រឆាំងវ៉េណេហ្ស៊ូអេឡាហើយត្រូវបានផ្តល់មូលនិធិដោយបុគ្គលមិនបញ្ចេញឈ្មោះនៅក្នុងរដ្ឋ Florida របស់សហរដ្ឋអាមេរិក។
ទោះបីជាយ៉ាងណាក៏ដោយ គ្មានភ័ស្តុតាងណាមួយត្រូវបានផ្តល់ឲ្យដើម្បីគាំទ្រការចោទប្រកាន់នេះទេ។
អ្នករិះគន់លោក Maduro បាននិយាយថា ពួកគេព្រួយបារម្ភថា រដ្ឋាភិបាលវ៉េណេហ្ស៊ូអេឡានឹងបង្កើនការបង្ក្រាបលើគណបក្សប្រឆាំងនិងក្រុមជនប្រឆាំង។
អគ្គមេធាវីរបស់ប្រទេសវ៉េណេហ្ស៊ូអេឡាលោក Tarek William Saab បានប្រាប់សន្និសីទព័ត៌មានមួយកាលពីថ្ងៃចន្ទថា ជនសង្ស័យជាច្រើននាក់កំពុងជាប់ឃុំឃាំងហើយអាជ្ញាធរនឹងតាមដានអស់អ្នកដែលឃុបឃិតប្រឆាំងនឹងសន្តិភាពសាធារណៈ។
លោកបានហៅការវាយប្រហារដោយដ្រូននេះថាជា “ការប៉ុនប៉ងសម្លាប់រង្គាល”។
លោក Saab បាននិយាយថា “សូមឲ្យទង្វើនេះកម្ចាត់រាល់ការប៉ុនប៉ងដ៏ឃោរឃៅដែលគំរាមកំហែងដល់សន្តិភាព”។
អគ្គមេធាវីរូបនេះបានបន្ថែមថា ជនសង្ស័យចំនួន២នាក់ត្រូវបានចាប់ខ្លួននៅកន្លែងកើតហេតុដែលបានបញ្ជាដ្រូនមួយគ្រឿងចេញពីរថយន្តមួយគ្រឿងនៅជិតក្បួនព្យុហយាត្រា។
លោកមិនបានកំណត់អត្តសញ្ញាណជនសង្ស័យណាមួយទេប៉ុន្តែបាននិយាយថា “ការតភ្ជាប់អន្តរជាតិត្រូវបានបង្កើតឡើង”៕ AFP
Source: Kampuchea Thmey Daily
0 Comments