ឆ្លើយតបនឹងការស្នើរសុំរបស់ពលរដ្ឋ អាជ្ញាធរខេត្តបន្ទាយមានជ័យប្រជុំដោះស្រាយលើវិធានការទប់ស្កាត់លើបញ្ហាផ្នូរសព និងម៉ុងអានាធិបតេយ្យលើភ្នំស្វាយ

បន្ទាយមានជ័យ ៖ លោក លី សារី អភិបាលរងខេត្តបន្ទាយមានជ័យ កាលពីព្រឹកថ្ងៃទី១៤ ខែសីហា ឆ្នាំ២០១៨ បានប្រជុំដោះស្រាយលើសំណើសុំរបស់ប្រជាពលរដ្ឋលើបញ្ហា ឲ្យចាត់វិធានការទប់ស្កាត់លើបញ្ហាផ្នូរសព និងម៉ុងអានាធិបតេយ្យលើភ្នំស្វាយ។

កិច្ចប្រជុំនេះ មានការចូលរួមពីព្រះគ្រូ ណាប់ ម៉ឺន ចៅអធិការវត្តចំការខ្នុរ និងអស់លោកជាប្រធានមន្ទីរស្ថាប័នពាក់ព័ន្ធជុំវិញខេត្ត ព្រមទាំងគណៈកម្មការអាចារ្យវត្តផងដែរ។

កិច្ចប្រជុំនេះ ធ្វើឡើង ដោយយោងតាមពាក្យស្នើសុំរបស់ប្រជាពលរដ្ឋរស់នៅក្នុងក្រុងសិរីសោភ័ណ ខេត្តបន្ទាយមានជ័យ ដែលបានដាក់ចូលរដ្ឋបាលខេត្តបន្ទាយមានជ័យ តាំងពីថ្ងៃទី២០ ខែកក្កដា ឆ្នាំ២០១៨ បានលើកឡើងថា ក្រោមការដឹកនាំរបស់ឯកឧត្តម សួន បវរ អភិបាលខេត្តបន្ទាយមានជ័យ មានការអភិវឌ្ឍយ៉ាងឆាប់រហ័ស ពិសេសការរៀបចំសួនមានជ័យ ធ្វើឲ្យមានសោភ័ណភាពស្រស់ស្អាត សម្រាប់បម្រើប្រជាពលរដ្ឋទូទៅដើរលំហែកាយ និងជាកន្លែងដើរហាត់ប្រាណ យ៉ាងច្រើនកុះករ ជារៀងរាល់ថ្ងៃ ដែលចាត់ទុកថា ជាគោលដៅទី១។ ចំណែកគោលដៅទី២ គឺទីតាំងលើកំពូលភ្នំស្វាយ មានបងប្អូនប្រជាពលរដ្ឋជាច្រើន ដែលចូលចិត្តដើរហាត់ប្រាណ បាននាំគ្នាដើរឡើងលើកំពូលភ្នំស្វាយ ក្នុងលក្ខណៈហាត់ប្រាណផង និងទេសចរណ៍ផង ដែលអាចមើលឃើញទិដ្ឋភាពរួម ទូទៅក្នុងក្រុងសិរីសោភ័ណ យ៉ាងស្រស់ស្អាត និងខ្យល់អាកាសល្អលើកំពូលភ្នំ បែរជាមានបញ្ហាប្រឈម គឺនៅលើភ្នំស្វាយបច្ចុប្បន្ន មានការសាងសង់ផ្នូរ និងម៉ុងកប់សពជាច្រើន ថែមទាំងបានបោះបង្គោលត្រៀមធ្វើការសាងសង់ជាបន្តបន្ទាប់ ដែលធ្វើឲ្យប៉ះពាល់ដល់សោភ័ណភាពរបស់ភ្នំ និងការអភិវឌ្ឍនានា របស់ខេត្តនាពេលខាងមុខ។ ដូច្នេះហើយ ទើបធ្វើឲ្យពួកគាត់ស្នើសុំឲ្យមានវិធានការ ទប់ស្កាត់និងហាមឃាត់។

ក្រោយមានការលើកឡើងរបស់ព្រះគ្រូចៅអធិការវត្តលើភ្នំ និងមន្ទីរពាក់ព័ន្ធដូចជា មន្ទីរធម្មការ មន្ទីររ៉ែ មន្ទីរបរិស្ថាន ក៏ដូចអាជ្ញាធរសង្កាត់ សុទ្ធតែបានលើកយកពីបញ្ហាច្បាប់ដែលកំណត់ថា ភ្នំ និងដីជើងភ្នំជាកម្មសិទ្ធិរបស់រដ្ឋ និងមិនត្រូវធ្វើអ្វីដោយពុំមានច្បាប់អនុញ្ញាត និងការលើកយកសេចក្តីជូនដំណឹងរបស់ខេត្ត និងក្រសួង ហាមមិនឲ្យមានការប៉ះពាល់ដីភ្នំ ដោយទុកភ្នំនៅក្រុងសិរីសោភ័ណ ជាតំបន់បេតិកភណ្ឌវប្បធម៌ធម្មជាតិរបស់ខេត្ត ក៏ដូចជាការលើកឡើងរបស់អ្នកសារព័ត៌មាន លើភាពមិនទទួលខុសត្រូវ អនុវត្តន៍ទោះបីជាមានច្បាប់ និងសេចក្តីជូនដំណឹងនានាក៏ដោយ ក៏ភ្នំនៅទីរួមខេត្តបន្ទាយមានជ័យ និងបណ្តាស្រុកនានា ត្រូវបានគេយកធ្វើជាកម្មសិទ្ធិសង់លំនៅឋាន និងសំណង់នានា។

បន្ទាប់ពីមានការលើកឡើងយ៉ាងពុះកញ្ជ្រោលពីព្រះសង្ឃ គណៈកម្មការអាចារ្យវត្ត និងមន្ទីរស្ថាប័នពាក់ព័ន្ធ លោក លី សារី អភិបាលរងខេត្តបន្ទាយមានជ័យ បានបូកសរុបលើខ្លឹមសាររួមចំនួន ០៤ចំណុច ដែលអង្គប្រជុំបានឯកភាពគ្នា ដាក់សំណើទៅអភិបាលខេត្តសម្រេច រួមមាន ៖ ១.ហាមអ្វីដែលមានហើយត្រូវទុកដដែល និងហាមមិនឲ្យកសាងម៉ុង ឬសំណង់ផ្សេងនៅលើភ្នំ និងជើងភ្នំ ។ ២.មន្ទីរធម្មការនិងសាសនា ត្រូវធ្វើស្ថិតិផ្នូរ ឬម៉ុង និងបែងចែកដីឲ្យច្បាប់លាស់នៅក្រុងសិរីសោភ័ណ។ សុំគោលការណ៍ទៅក្រសួងជាបន្ទាន់នៅកិច្ចការដែលលើកឡើងមកដោះស្រាយនេះ ។ ប្រជុំផ្សព្វផ្សាយជាមួយពលរដ្ឋ ឬសាសនាដទៃទៀតនូវរាល់លិខិតកិតិយុទ្ធទាំងឡាយ ឲ្យពួកគាត់បានយល់ ។ ៣.សូមឲ្យខាងតំណាងអន្តរវិស័យបង្កើតគណៈកម្មការសហការគ្នារៀបចំគូសប្លង់ដាក់មកខេត្តសម្រេច ។ ៤.ហាមអាជ្ញាធរ គណៈកម្មការវត្តចេញលិខិតកាន់កាប់លក់ដូរ និងលិខិតផ្សេងដែលពាក់ព័ន្ធនឹងដីភ្នំ ជើងភ្នំ។

ក្រោយកិច្ចប្រជុំចប់ ក្រុមការងារបានចុះពិនិត្យផ្ទាល់លើភ្នំស្វាយ ឃើញថា ពិតជាមានការសាងសង់ និងបោះបង្គោលត្រៀមធ្វើផ្នូរសព និងម៉ុងពិតប្រាកដមែន និងជាពិសេសទៅទៀតនោះ គឺការដាក់បង្គោលអង់តែនស្អេកស្កះ ថែមទាំងធ្វើរបងហ៊ុមព័ទ្ធបិទយកដីកំពូលភ្នំដែលពលរដ្ឋធ្លាប់តែឡើងលើអគាពីរបីជាន់មើលទេសភាព៕