ស្ទឹងត្រែង ៖ មន្ទីរធនធានទឹកខេត្តស្ទឹងត្រែងប្រកាសឱ្យប្រជាពលរដ្ឋបង្កើនការប្រុងប្រយ័ត្នចាប់ពីម៉ោង២រសៀលថ្ងៃទី១៧ ខែសីហានេះតទៅ ព្រោះទឹកទន្លេមេគង្គបានឡើងហួសកម្រិតប្រកាសអាសន្នហើយ។
លោកប៉ាង ប៉េង ប្រធានមន្ទីរធនធានទឹក និងឧតុនិយម ខេត្តបាន ផ្តល់ដំណឹងទៅអាជ្ញាធរគ្រប់ភូមិឃុំសង្កាត់ជាពិសេសប្រជាពលរដ្ឋដែលរស់នៅតាមភូមិចំនួនទាំង៨១ជាប់តាមដងទន្លេមេគង្គ សេសាន សេកុង បង្កើនការប្រុងប្រយ័ត្នខ្ពស់បំផុត។
លោកថា ៖ មកដល់ម៉ោង២រសៀលនេះទឹកទន្លេមេគង្គនៅខេត្តស្ទឹងត្រែងមានកម្ពស់១០.៧២ហើយ ដែលកម្រិតប្រកាសអាសន្នត្រឹមតែ១០.៧០ ម៉ែត្រ ហើយ កម្រិតកម្ពស់ទឹកនេះ បានលិចមូលដ្ឋានរស់នៅរបស់ប្រជាពលរដ្ឋនៅតាមដងទន្លេកាន់តែខ្លាំង។
លោកថា ក្នុងស្ថានភាពនេះ ចូរបងប្អូនបង្កើនការប្រុងប្រយ័ត្នការពារទ្រព្យសម្បត្តិ សត្វចិញ្ចឹម ហាមកូនលេងទឹក និងធ្វើដំណើរតាមទូកត្រូវពាក់អាវពោង និងដាក់កានធំៗទៅជាមួយដើម្បីយើងរួមគ្នារក្សាសុវត្ថិភាព។
លោកដួងលានមេឃុំ កោះស្នែងស្រុកថាឡាបរិវ៉ាត់បញ្ជាក់ថា ៖ លោកបានប្រជុំជាមួយមេភូមិនឹងប្រជាការពាររួចហើយឱ្យហាមប្រជាពលរដ្ឋយើងប្រុងប្រយ័ត្នរៀងៗខ្លួន មើលថែកូនចៅ- ប្រុងប្រយ័ត្នចំពោះសត្វមានពិស ទិចឬខាំ ជាពិសេសសជាងនេះទៀតបើកើតមានករណីណាមួយត្រូវឆាប់រាយការណ៍មកសមត្ថកិច្ចប៉ុស្តិ៍ឬប្រជាការពារដែលនៅជិត។
សូមបញ្ជាក់ថា ៖ ទឹកទន្លេមេគង្គនៅថ្ងៃទី១៧ ខែសីហានេះមានកំពស់១០.៧១ម៉ែត្រឡើងខ្ពស់ជាងថ្ងៃម្សិលមិញ(០.៤៤ម៉ែត្រ)លើសកម្រិតប្រកាសអាសន្ន ហើយទន្លេសេកុង មេគង្គក៏នៅបន្តឡើង៕
Source: Kampuchea Thmey Daily
0 Comments