ភ្នំពេញ ៖ លោក មៀច សុផាន់ណា អនុរដ្ឋលេខាធិការក្រសួងមហាផ្ទៃ ក្នុងនាមគណៈកម្មាធិការប្រយុទ្ធប្រឆាំងផលិតផលក្លែងក្លាយ(គ.ប.ផ.ក) បានចាត់ទុកអ្នកសារព័ត៌មានជាដៃគូដ៏ល្អ នៅក្នុងការបង្ក្រាបបទល្មើសពាក់ព័ន្ធផលិតផលក្លែងក្លាយ ដែលបង្កហានិភ័យដល់សុវត្ថិភាព ដល់ការរស់នៅរបស់ប្រជាពលរដ្ឋ។
នៅក្នុងសន្និសីទសាព័ត៌មាន ស្តីពីលទ្ធផលនៃកិច្ចប្រតិបត្តិការបង្ក្រាបបទល្មើសផលិតផលក្លែងក្លាយខុសច្បាប់សរុបចំនួន៨៨តោន កាលពីរសៀលថ្ងៃទី៦ ខែសីហា ឆ្នាំ២០១៨ នៅក្រសួងមហាផ្ទៃ លោកអនុរដ្ឋលេខាធិការ មៀច សុផាន់ណា បានអំពាវនាវដល់សាធារណជន ក៏ដូចជាអ្នកសារព័ត៌មានទាំងអស់ ដែលជាដៃគូជួយសហការផ្តល់ព័ត៌មានអំពីទីតាំងរបស់ជនដែលនាំចូល រក្សាទុក ឬក៏ចែកចាយផលិតផលក្លែងក្លាយមកគណៈកម្មាធិការប្រយុទ្ធប្រឆាំងផលិតផលក្លែងក្លាយ(គ.ប.ផ.ក) តាមរយៈទូរស័ព្ទលេខដែលគណៈកម្មាធិការធ្លាប់បានផ្តល់ជូនកន្លងមក។
លោកបញ្ជាក់ថា រាល់ព័ត៌មានដែលសាធារណជន ឬអ្នកសារព័ត៌មានផ្តល់មកគណៈកម្មាធិការនឹងត្រូវបានរក្សាការសម្ងាត់ មិនឲ្យមានការព្រួយបារម្ភភ័យខ្លាចពីសុវត្ថិភាពសន្តិសុខរបស់ខ្លួននោះទេ។ មិនត្រឹមតែប៉ុណ្ណោះបើសិនជាព័ត៌មានឈានដល់ការបង្ក្រាបក្នុងទ្រង់ទ្រាយធំ គណៈកម្មាធិការនឹងមានការលើកទឹកចិត្តពីក្រសួងមហាផ្ទៃ ពីរាជរដ្ឋាភិបាលថែមទៀតផង។
លោកអនុរដ្ឋលេខាធិការបញ្ជាក់បន្ថែមថា ការដាក់តាំងបង្ហាញស្តីពីលទ្ធផល នៃកិច្ចប្រតិបត្តិការបង្ក្រាបបទល្មើសពាក់ព័ន្ធផលិតផលក្លែងក្លាយខុសច្បាប់សរុបចំនួន ៨៨តោនថ្ងៃនេះជាសារមួយដល់ជនទុច្ចរិត ដរាបណានៅតែមានគំនិតបង្កនូវមហន្តរាយដល់សុខុមាលភាពរបស់ប្រជាពលរដ្ឋ គណៈកម្មាធិការនឹងបន្តសកម្មភាពបង្ក្រាបចាប់ជនល្មើសផ្តន្ទាទោសទៅតាមច្បាប់ជាធរមានដោយគ្មានការយោគយល់ឡើយ។ អនុវត្តតាមអនុសាសន៍ណែនាំរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ គណៈកម្មាធិការនឹងរួមសហការជាមួយមន្ត្រីនគរបាលយុត្តិធម៌ និងតំណាងអយ្យការអមសាលាដំបូងរាជធានីភ្នំពេញ និងសមត្ថកិច្ចពាក់ព័ន្ធនានា ដើម្បីស្រាវជ្រាវស៊ើបអង្កេតអំពីបទល្មើសផលិតផលក្លែងក្លាយ និងខុសច្បាប់ រហូតដល់ឈានទៅធ្វើការបង្ក្រាបឲ្យបានទទួលជោគជ័យថែមទៀត ពិសេសចំណីអាហារគ្មានសុវត្ថិភាព បង្កមហន្តរាយដល់សុខភាពប្រជាពលរដ្ឋ។
តាមរបាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ បានបង្ហាញពីលទ្ធផល នៃកិច្ចប្រតិបត្តិការបង្ក្រាបបទល្មើសផលិតផលក្លែងក្លាយខុសច្បាប់សរុបចំនួន៨៨តោន មានដូចជាកាលពីថ្ងៃទី១៣ ខែឧសភា ឆ្នាំ២០១៨ ក្រុមប្រតិបត្តិការពិសេសរបស់គណៈកម្មាធិការបានចុះបង្ក្រាបមូលដ្ឋានសិប្បកម្មផលិតកាហ្វេក្លែងក្លាយ ដែលយកសណ្តែតដី លាយសារជាតិគីមីដាក់លាយឲ្យចេញពណ៌ខ្មៅ ឲ្យចេញពពុះល្អ ឲ្យមានរសជាតិចាប់មាត់។ ទី២-នៅថ្ងៃទី៤ ខែកក្កដា ឆ្នាំ២០១៨ ក្រុមប្រតិបត្តិការបានធ្វើការបង្ក្រាបទីតាំងផលិតសាច់បាតតេមួយកន្លែង ដែលដាក់គីមី ដាក់សារធាតុបូរ៉ាក់លើសបរិមាណ ពេលបរិភោគទៅធ្វើឲ្យមានបញ្ហាដល់ក្រពះ ពោះវៀនជាដើមធ្វើខូចសុខភាព។ ទី៣- នៅថ្ងៃទី៦ ខែកក្កដា ឆ្នាំ២០១៨ ក្រុមប្រតិបត្តិការរបស់គណៈកម្មាធិការបានបង្ក្រាបទីតាំងផលិតម្រេច និងកាហ្វេ មិនស្របច្បាប់មួយកន្លែង ដែលលាយបន្លំយកសារធាតុហិលដូចជាម្ទេស បាយក្តាំងលាយច្របល់កិនឲ្យម៉ត់ចូលគ្នាដាក់ពណ៌ឲ្យខ្មៅ។
ប្រតិបត្តិការមួយដ៏ធំទៀតនៅថ្ងៃទី២០ ខែកក្កដា ឆ្នាំ២០១៨ ក្រុមប្រតិបត្តិការពិសេសរបស់យើងបានចុះចាប់ផលិតផលនាំចូល វេចខ្ចប់ក្លែងក្លាយខុសច្បាប់នូវផលិតផលទឹកសុទ្ធម៉ាក evian ម៉ាក saintamand និងស្រាបៀរម៉ាក Crorona Extra ប្រេងឆា SUNAR និងផលិតផលមួយចំនួនទៀត៕
Source: Kampuchea Thmey Daily
0 Comments