កណ្តាល ៖ លោក ផូង វណ្ណ លោកសាយសម្ផស្សសេរី ចៅក្រមស៊ើបសួរសាលាដំបូងខេត្តកណ្តាលនាល្ងាចថ្ងៃទី៦ ខែសីហា ឆ្នាំ២០១៨នេះ បានសម្រេចចេញដិការបង្គាប់អោយកងកម្លាំងសមត្តកិច្ចនាំខ្លួនជនត្រូវចោទ៣នាក់ ដាក់ពន្ធនាគារបណ្តោះអាសន្នក្រោមបទចោទប្រកាន់"លួច ទទួលផលចោរកម្ម និង ប្រើប្រាស់ស្លាកលេខសំគាល់យានជំនិះក្លែងក្លាយប្រព្រឹត្តឡើងនៅស្រុកអង្គស្នួល ខេត្តកណ្តាល កាលពីថ្ងៃទី៣និងទី៥ខែសីហា ឆ្នាំ២០១៨។
មន្ត្រីតុលាការបានថ្លែងឲ្យដឹងថា នៅល្ងាចថ្ងៃទី០៦ សីហា ២០១៨ លោក ផូង វណ្ណ ចៅក្រមស៊ើបសួរសាលាដំបូងខេត្តកណ្តាល បានសម្រេច ចេញដីកាឃុំខ្លួន បុរសម្នាក់ដែលខ្ចីរថយន្តមិត្តភក្ត្រ័ប្រុងស៊ីដាច់ ដាក់ពន្ធនាគារបណ្តោះអាសន្នពីបទ"លួច និងប្រើប្រាស់ ស្លាកលេខសំគាល់យានជំនិះក្លែងក្លាយ" ដែលប្រព្រឹត្តនៅភូមិព្រៃរកា ឃុំឆក់ឈើនាង ស្រុកអង្គស្នួល ខេត្តកណ្តាល កាលពីថ្ងៃទី០៥ សីហា ២០១៨ តាមមាត្រា៣៥៣ ៣៥៦ និងមាត្រា៦៣០ នៃក្រមព្រហ្មទណ្ឌ និងមាត្រា៧៨នៃច្បាប់ស្តីពីចរាចរណ៍ផ្លូវគោក។
ជនត្រូវចោទមានឈ្មោះ ភិន សីហា ភេទប្រុស អាយុ២៧ឆ្នាំ ជនជាតិខ្មែរ មុខរបរមិនពិតប្រាកដ រស់នៅភូមិប្រមាត់ដី ឃុំស្វាយទៀប ស្រុកចំការលើ ខេត្តកំពង់ចាម។ ជនរងគ្រោះមានឈ្មោះផាន់ ណា ភេទប្រុស អាយុប្រហែល៣៥ឆ្នាំ មានទីលំនៅរាជធានីភ្នំពេញ។
លោក មាន សំណាង អធិការដ្ឋាននគរបាលស្រុកអង្គស្នួល បានឲ្យដឹងថា មុនធ្វើការឃាត់ខ្លួនជនសង្ស័យ កម្លាំងបានប្រទះឃើញរថយន្តម៉ាកកាំមឺរីឆ្លាមពណ៌ខ្មៅ ពាក់ស្លាកលេខភ្នំពេញ 2A-0621 និង ម៉ូតូម៉ាកសង់០១៨ មួយគ្រឿងបើកឈប់ៗ ក៏ឃាត់សួរនាំស្រាប់តែ រថយន្ត និង ម៉ូតូនោះបង្កើនល្បឿនយ៉ាងលឿនមិនឲ្យសមត្តកិច្ចធ្វើការត្រួតពិនិត្យ ទើបកម្លាំងដេញតាមរហូតដល់ផ្សារថ្នល់ទទឹង ក៏ឃាត់ខ្លួនបានជនសង្ស័យឈ្មោះ ភិន សីហា នៅក្នុងរថយន្តមានវត្ថុតាងសោខ្សៀ ០១ ដែកសំប៉ែតសម្រាប់កាច់សោ១ ដែកឆ្កិះសោ។
ចម្លើយសារភាពរបស់ជនសង្ស័យឈ្មោះ ភិន សីហា បានសារភាពថា ខ្លួនបានខ្ចីរថយន្តពីឈ្មោះ ផាន់ ណា ភេទប្រុស អាយុប្រហែល៣៥ឆ្នាំ នៅខាងមុខណាហ្គាភ្នំពេញ វេលាម៉ោង១រំលងអធ្រាត្រ។
ចំពោះជនជាប់ចោទ២នាក់ទៀតត្រូវបានលោក សាយ សម្ផស្សសេរី ចៅក្រមស៊ើបសួរសាលាដំបូងខេត្តកណ្តាល នៅល្ងាចថ្ងៃទី០៦ សីហា ២០១៨ បានសម្រេចចេញដីកាឃុំខ្លួន ដាក់ពន្ធនាគារបណ្តោះអាសន្នពីបទ"លួច "និងបទ"ទទួលផលចោរកម្ម "ដែលប្រព្រឹត្តនៅ ភូមិព្រៃរការ ឃុំឆក់ឈើនាង ស្រុកអង្គស្នួល ខេត្តកណ្តាល កាលពីថ្ងៃទី០៣ សីហា ២០១៨ តាមមាត្រា៣៥៣ និង៣៥៦ នៃក្រមព្រហ្មទណ្ឌ និងមាត្រា ៣៩៩ ,៤០០ នៃក្រមព្រហ្មទណ្ឌ។
ជនត្រូវចោទទី០១មានឈ្មោះ ផូង កុសល ភេទប្រុស អាយុ២៩ឆ្នាំ ជនជាតិខ្មែរ មុខរបរកម្មករសំណង់ នៅភូមិ ខ្នាចខាងជើង ឃុំបឹងត្រាញ់ខាងជើង ស្រុកសំរោង ខេត្តតាកែវ ទី០២ឈ្មោះ សែត ផុល ភេទប្រុស អាយុ៤៥ឆ្នាំ ជនជាតិខ្មែរ មុខរបររត់ម៉ូតូឌុប នៅភូមិព្រែកហូរលិច
ឃុំព្រែកហូរ ក្រុងតាខ្មៅ ខេត្តកណ្តាល។ ចំណែកឯជនរងគ្រោះឈ្មោះ ភិន ខេត ភេទស្រី អាយុ៥៥ឆ្នាំ មុខរបរកសិករ ជនជាតិខ្មែរ នៅភូមិព្រៃមាន ឃុំ រស្មីសាមគ្គី ស្រុកឱរ៉ាល់ ខេត្តកំពង់ស្ពឺ។
លោកវរសេនីយ៍ មាន សំណាង អធិការស្រុកអង្គស្នួលបានឲ្យដឹងថា នៅមុនពេលកើតហេតុ ជនរងគ្រោះបានយកម៉ូតូទុកនៅមុខបន្ទប់ជួល ហើយឡើងទៅសំរាក នៅក្នុងបន្ទប់កូនស្រីនៅជាន់ទី២ ពេលនោះជនសង្ស័យមកដល់មិនឃើញម្ចាស់ ក៏ធ្វើសកម្មភាពកាច់ សោ.កម៉ូតូជិះរត់គេចខ្លួនបាត់។ លុះដល់ម៉ោង៥ល្ងាច កូនស្រីជនរងគ្រោះចេញពីធ្វើការមកដល់បន្ទប់ ទើបបានដឹងថា បាត់ម៉ូតូ ហើយក៏ផ្អើលឆោឡោរាយការណ៍ជូនសមត្ថកិច្ច។ ក្រោយពីទទួលបានព័ត៌មាន នេះភ្លាមកម្លាំងសមត្ថកិច្ចយើងបានធ្វើការតាមរក និងទំនាក់ទំនងផ្សព្វផ្សាយជាមួយសមត្ថកិច្ចជាប់ ព្រំប្រទល់ដើម្បីជួយសហការ លុះដល់ម៉ោង១៩ និង១៥នាទីថ្ងៃដដែល សមត្ថកិច្ចខណ្ឌពោធិ៍សែនជ័យ រាជធានីភ្នំពេញ បានធ្វើការឃាត់ខ្លួនជនសង្ស័យបាននៅចំណុចភូមិព្រៃទា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ខណៈកំពុងដោះស្លាកលេខម៉ូតូចេញ ហើយប្រគល់ជូនសមត្ថកិច្ចយើង ដើម្បីបន្តនីតិវិធី។
នៅចំពោះមុខសមត្ថកិច្ចនគរបាល ជនសង្ស័យបានឆ្លើយសារភាពថា ខ្លួនពិតជាបានធ្វើ សកម្មភាពលួចម៉ូតូរបស់ជនរងគ្រោះប្រាកដមែន ដោយធាក់បំបាក់សោ.ក យកកូនកន្ត្រៃដោះស្លាក រួច កាត់ខ្សែភ្លើងតសោម៉ូតូបញ្ឆេះជិះរត់គេចខ្លួន។ កន្លងមកខ្លួនធ្លាប់ធ្វើសកម្មភាពកាច់សោ.កម៉ូតូ ហើយ យកទៅលក់ឲ្យឈ្មោះ សែត ផុល បានចំនួន០៨គ្រឿងមកហើយ។
យោងតាមចម្លើយសារភាពរបស់ជនសង្ស័យ ទើបនៅថ្ងៃទី០៤ សីហា ២០១៨ វេលាម៉ោង១០ និង ៤០នាទី កម្លាំងអធិការដ្ឋាននគរ បាលស្រុកអង្គស្នួល សហការជាមួយកម្លាំងការិយាល័យព្រហ្មទណ្ឌកំរិតស្រាល ខេត្តកណ្តាល ឈាន ទៅដល់ធ្វើការឃាត់ខ្លួនជនសង្ស័យឈ្មោះ សែត ផុល និងធ្វើការឆែកឆេរផ្ទះ រកឃើញវត្ថុតាងមួយចំនួន ពាក់ព័ន្ធបទល្មើសទទួលផលចោរកម្ម៕
Source: Kampuchea Thmey Daily
0 Comments