អ្នកប្រដាល់ថៃ Ou Ronou នឹងឡើងមកសងសឹក រឿង សារ័ត្ន អ្នកប្រដាល់ក្លិបកងពលតូចទ័ពឆ័ត្រយោង៩១១ នៅលើសង្វៀនCarabaoរបស់SEA-TV នារសៀលថ្ងៃសៅរ៍ទី១១ ខែសីហា ឆ្នាំ២០១៨។ ពីរនាក់នេះ ប្រកួតគ្នាក្នុងប្រភេទទម្ងន់ ៦៥ គីឡូក្រាម។
រឿង សារ័ត្ន ជាជើងខ្លាំងមួយរូបរបស់កម្ពុជា ដែលការប្រកួតរបស់គេទោះឈ្នះក្តី ចាញ់ក្តី មានមានលក្ខណៈតឹងតែងបំផុត ពោលគឺមិនមាននរណាយកឈ្នះលើរូបគេដោយផុយស្រួលនោះឡើយ។ ប៉ុន្តែអ្នកប្រដាល់រូបនេះ មានពេលខ្លះក៏ចាញ់ដោយផុយស្រួយដែរ។
Ou Ronou គេក៏ជាជើងខ្លាំងមួយរូបដែរ។ អ្នកប្រដាល់ថៃរូបនេះ ធ្លាប់មកប្រកួតពីរដងហើយ ដែលលើកទី១វាយស្មើជាមួយយុគ យក្សគីល អ្នកប្រដាល់ក្លិបកងចក្ររាជសីហ៍មានរិទ្ធកាលពីថ្ងៃទី០៨មេសា២០១៨ និងលើកទី២ ថ្ងៃទី១៧មិថុនា២០១៨ Ou Ronou វាយចាញ់រឿង សារ័ត្នដោយពិន្ទុ ។
អ្នកប្រដាល់ថៃរូបនេះ គេមានប្រវត្តិប្រកួត៦៥លើក ដោយវាយឈ្នះ៥៥លើក និងចាញ់១០លើក មិនដែលស្មើ ខណះដែលរឿង សារ័ត្ន មានប្រវត្តិប្រកួត៧៨លើក ឈ្នះ៥៩លើក ចាញ់១៦លើក និងស្មើ០៣លើក។
រឿង សារ័ត្ន មានការស្រុតធ្លាក់ចុះនៅក្នុងការប្រកួតប៉ុន្មានប្រកួតចុងក្រោយនេះ។ការប្រកួតចុងក្រោយរបស់គេ គឺវាយឈ្នះថៃKhon Krong Thap ដោយពិន្ទុ កាលពីថ្ងៃទី២២កក្កដាកន្លងទៅនេះ។ អ្នកប្រដាល់រូបនេះ វាយរាងមើលងាយគូប្រកួតបន្តិច នៅពេលដែលមើលឃើញគូប្រកួតរាងអន់ជាងខ្លួននោះ។
តែយ៉ាងណា សារ័ត្ន ជាអ្នកប្រដាល់ម្នាក់ ដែលប្រកួតនិងផ្តួលគូប្រកួតដោយសារទិចនិចកណ្តាប់ដៃ កែង និង ជង្គង់ ។ យ៉ាងណា ប៉ះជាមួយ Ou Ronou លើកនេះ មិនដឹងថាសារ័ត្ន អាចជួបសំណាងល្អឬអត់ទេ? ។ ចាំមើល រឿង សារ័ត្ន និង Ou Ronou តើនរណាជាអ្នកឈ្នះនៅក្នុងជំនួបលើកទី២នេះ ?។
អ្នកប្រដាល់វ័យក្មេង ហ៊ឹម សេរី ក្លិបតាព្រហ្មមានជ័យ ត្រូវគេផ្គូអោយជួបប្រកួតជាមួយអ្នកប្រដាល់ថៃឈ្មោះ Sing Dam ដោយជួបគ្នាក្នុងប្រភេទទម្ងន់៥១គីឡូក្រាម ។ ពីរនាក់ នាក់នេះ មិនធ្លាប់ដែលជួបគ្នាទេកន្លងមក។
ហ៊ឹម សេរី ជាអ្នកប្រដាល់ដែលប្រើគ្រប់កលល្បិច ហើយសមត្ថភាពកណ្ដាប់ដៃរបស់គេ វាយចេញរហ័សណាស់ ហើយជង្គង់ កែង និងផ្លែរបស់ហ៊ឹម សេរី ក៏មានផ្លែល្អដែរ។
ចំពោះអ្នកប្រដាល់ថៃ Sing Dam វិញ គេក៏ជាអ្នកប្រដាល់ខ្លាំងដែរនៅស្រុកថៃ ។ Sing Dam ធ្លាប់មកប្រកួតនៅស្រុកខ្មែរប៉ុន្មានដងហើយ ប៉ុន្តែពុំធ្លាប់ដែលប៉ះជាមួយហ៊ឹម សេរីនោះឡើយ ។
សម្រាប់ការជួបគ្នាលើកដំបូងនេះ មិនដឹងថាហ៊ឹម សេរី ឈ្នះឬក៏ Sing Dam ឈ្នះនោះទេ ? ។ ចាំមើល Sing Dam អាចយកឈ្នះហ៊ឹម សេរី បានឬអត់ ?។
ហ៊ឹម សេរី មានប្រវត្តិប្រកួត៨៤លើក ក្នុងនោះវាយឈ្នះ៦៩លើក ចាញ់១៤លើក និងស្មើ០១លើក ។ សេរី ប្រកួតចុងក្រោយជាមួយថៃ គឺវាយស្មើជាមួយKolab Duoyកាលពីថ្ងៃទី ១៧មីនា២០១៨។
ដោយឡែក ការប្រកួតរវាងអ្នកប្រដាល់រួមជាតិវិញ ថន ភឿត អ្នកប្រដាល់ក្លិបឃ្លាំងមឿងកីឡាខេត្តពោធិសាត់ នឹងត្រូវជួបប្រកួតជាមួយជើងចាស់ណាម ម៉ូរ៉ាក់ អ្នកប្រដាល់ក្លិបពន្លឺសាមគ្គីខេត្តបាត់ដំបង ។ពួកគេទាំងពីរនាក់នេះ ជួបប្រកួតគ្នាក្នុងប្រភេទទម្ងន់៦០គីឡូក្រាម។
ពួកគេទាំងពីរនាក់នេះ មិនធ្លាប់ជួបគ្នាទេពីមុនមក ។ អ្នកប្រដាល់ទាំងពីរនេះ មានសមត្ថភាពបច្ចេកទេស មិនជាលើគ្នាប៉ុន្មានទេ ហេតុនេះ ការជួបគ្នាលើកដំបូងនេះ មិនដឹងថាអ្នកណាឈ្នះអ្នកណាចាញ់នោះឡើយ? ។
លីន វិរៈ អ្នកប្រដាល់ក្លិបបូរីរាជសីហ៍មានរិទ្ធ នឹងជួបសងសឹកជាមួយសុខ វិរៈ អ្នកប្រដាល់ក្លិបសំរោងកោងខេត្តបាត់ដំបង ដោយប្រកួតក្នុងទម្ងន់៦០ គីឡូក្រាម៕
Source: Kampuchea Thmey Daily
0 Comments