ប្រទេសថៃ ៖ នារីវ័យ ២៥ ឆ្នាំ ម្នាក់ ដែលមាននាទីជា ( ឌីល័រ ) បុគ្គលិកកាស៊ីណូ ប្រចាំក្រុងប៉ោយប៉ែត ត្រូវបានក្រុមយុទ្ធនារី ឈុតខ្មៅថៃ ឃាត់ខ្លួនជាបណ្ដោះអាសន្ន បន្ទាប់ពីគេបានរកឃើញថ្នាំញៀនចំនួន ២ កញ្ចប់ ដែលនារីរូបនេះ បានសៀតលាក់ទុក នៅក្នុងអាវទ្រនាប់របស់នាង ម្ខាងមួយកញ្ចប់។
យោងតាមរបាយការណ៍ ដែលយើងទទួលបានពីភាគីថៃ បានបញ្ជាក់ថា ការឃាត់ខ្លួននេះបានធ្វើឡើង នៅវេលាម៉ោង៦ព្រឹក ថ្ងៃទី២៨ ខែសីហា ឆ្នាំ២០១៨ ត្រង់ចំណុចលើទឹកដីថៃ ក្បែរច្រកអន្តរជាតិ ប៉ោយប៉ែត ដែលស្ថិតក្នុងស្រុក អារញ្ញប្រាថេត ខេត្តស្រះកែវ ប្រទេសថៃ។
របាយការណ៍បានបន្តថា នៅមុនពេលឃាត់ខ្លួននេះ គឺកម្លាំងយោធាថៃ ដែលមានប្រុស និងមានស្រី បានប្រតិបត្តិការត្រួតពិនិត្យលើប្រជាពលរដ្ឋ ដែលចេញចូល ឆ្លងដែនទៅកាន់ផ្សាររោងក្លឿ ប្រទេសថៃ ហើយក៏មានការសង្ស័យលើនារីវ័យក្មេងម្នាក់ ទើបស្នើសុំធ្វើការឆែកឆេរលើដងខ្លួន។
នៅពេលនោះដែរ កម្លាំងយុទ្ធនារីថៃ បានរកឃើញថ្នាំញៀនប្រភេទយ៉ាម៉ាចំនួន ២ កញ្ចប់ ដែលនារីកម្ពុជារូបនេះ បានរុំនិងក្រដាសជូតមាត់ ហើយសៀតទៅក្នុងអាវទ្រនាប់ ម្ខាងមួយកញ្ចប់ ដែលក្នុងនោះគឺ ១ កញ្ចប់ ទម្ងន់ ៣,៦៧២ ក្រាម និង ១ កញ្ចប់ ទៀត ទម្ងន់
៣,៨៧៩ ក្រាម សរុបទាំង ២ កញ្ចប់ មានទម្ងន់ ៧,៥៥១ ក្រាម ។
បើតាមចម្លើយសារភាពរបស់នារី វ័យ ២៥ ឆ្នាំ ដែលជាបុគ្គលិកកាស៊ីណូ ក្នុងក្រុងប៉ោយប៉ែត បានសារភាពថា ថ្នាំញៀនទាំង ២ កញ្ចប់នេះ គឺខ្លួនទទួលបានពីភ្ញៀវម្នាក់ ជាជនជាតិថៃជួលអោយនាងនាំឆ្លងដែន ទៅលាក់ទុកនៅម្តុំធុងសំរាម ខាងមុខហាងលក់ទំនិញមួយកន្លែង ក្នុងផ្សាររោងក្លឿ ដើម្បីប្រគល់អោយមនុស្សម្នាក់ទៀត ក្នុងតម្លៃឈ្នួលសម្រាប់នាងគឺគេអោយ ២០០០ បាត តែក៏ត្រូវទាហានថៃចាប់ខ្លួនតែម្តង។
បច្ចុប្បន្នគេមិនទាន់ដឹងថា តើនារីរូបនេះ នឹងត្រូវប្រឈមមុខចំពោះផ្លូវច្បាប់ នៅក្នុងប្រទេសថៃ ឬក៏យ៉ាងណានោះឡើយ ដោយសារតែការត្រួតពិនិត្យ និងឆែកឆេរទៅលើអ្នកឆ្លងដែន វាដូចជាច្បាស់ខ្លាំងពេក ទើបចាប់ចំនាងតែម្តង ចំណែកឈ្មោះរបស់នាង ភាគីថៃមិនបានបញ្ចេញនោះទេ៕
Source: Kampuchea Thmey Daily
0 Comments