វណ្ណ ម៉ូនីកា ស្ងាត់ៗចុះកុងត្រាថតរឿងថ្មីចាក់បញ្ចាំងនៅលើទូរទស្សន៍MY TV

ភ្នំពេញ ៖ តារាសម្តែងស្រីញញឹមស្រស់កញ្ញា វណ្ណ ម៉ូនីកា ថ្មីៗនេះ មានការបង្ហើបមកថា តារាស្រីរូបនេះកំពុងទទួលបានទីផ្សារសម្ដែងឡើងវិញ ខណៈដែលអាជីពសិល្បៈរបស់នាងកន្លងមក ត្រូវបានស្ងប់ស្ងាត់មួយរយៈ ក្រោមហេតុផលថា រវល់ការងារខាងក្រៅផ្ទាល់ខ្លួន និងចង់យកពេលសម្រាកមួយរយៈខ្លី។

ដំណឹងនៃការវិលចូលសិល្បៈរបស់តារាសម្តែងកញ្ញា វណ្ណ ម៉ូនីកា នាពេលនេះត្រូវបានប្រភពនិយាយថា បច្ចុប្បន្ន វណ្ណ ម៉ូនីកា បានត្រៀមបង្ហាញខ្លួនជាថ្មីតាមរយៈខ្សែភាពយន្តរឿងភាគរបស់ផលិតកម្មក្នុងស្រុកមួយ បន្ទាប់ពីនាងបានសម្រេចចុះកុងត្រារួចរាល់កាលពីថ្មីៗកន្លងមកនេះ។ឱកាសនៃការសម្តែងរបស់កញ្ញា វណ្ណ ម៉ូនីកា ពេលនេះគឺនាងទទួលបានតំណែងមិនធម្មតាឡើយ។

កញ្ញា វណ្ណ ម៉ូនីកា បានប្រាប់កម្ពុជាថ្មីឲ្យដឹងនៅព្រឹកថ្ងៃទី២៨ ខែសីហា ឆ្នាំ២០១៨នេះថា ដំណឹងនេះជាការពិតព្រោះកាលពីថ្មីៗនេះ នាងត្រូវបានអ្នកដឹកនាំសម្តែងរបស់ផលិតកម្មភាពយន្តក្នុងស្រុកមួយបានទាក់ទងហៅថតខ្សែរឿងភាគ ដែលគ្រោងនឹងចាក់បញ្ចាំងនៅលើស្ថានីយទូរទស្សន៍ប៉ុស្តិ៍MY TV។

តារាស្រីសម្តីផ្អែមកញ្ញា វណ្ណ ម៉ូនីកា បានបញ្ជាក់ថា ចំពោះរឿងចុះកុងត្រា(កិច្ចសន្យា)ថតរឿងគឺនាងនិងភាគីផលិតកម្ម បានធ្វើរួចរាល់ហើយកាលពីថ្ងៃទី២៧ ខែសីហាកន្លងមកនេះ។ ម្យ៉ាងទៀតបើតាមការបញ្ជាក់នៅក្នុងកិច្ចសន្យានោះ ខ្សែភាពយន្តនេះនឹងត្រូវចំណាយពេលថតចំនួនជាង៤ខែទើបសម្រេចការបញ្ចប់ដោយជោគជ័យ។

កញ្ញា វណ្ណ ម៉ូនីកាបាននិយាយបន្ថែមទៀតថា តួអង្គ ដែលខ្ញុំទទួលបានថតសម្តែងនៅលើខ្សែភាពយន្តមួយនេះ គឺតួជាលក្ខណៈមនុស្សស្រីម្នាក់ដែលមានចរិតស្លូតបូត និងមានទ្រព្យសម្បតិ្តច្រើនពោលគឺអាចនិយាយថា ប្រៀបបាននឹងជំទាវផងដែរ។ចរិតរបស់ខ្ញុំសម្តែងក្នុងរឿងនេះអាចមានភាពខុសប្លែកគ្នាកាលពីរឿងមុនៗព្រោះថាខ្សែភាពថ្មីនេះ ជាប្រភេទរឿងបែបមនោសញ្ចេតនាឆ្លុះបញ្ចាំងពីជីវិតនៅក្នុងសង្គមនិងការអប់រំជាដើម៕