កំពង់ចាម ៖ ប្រជាពលរដ្ឋរស់នៅក្នុងស្រុក ស្ទឹងត្រង់ដែលរងគ្រោះ ដោយទឹកជំនន់ បាទទួលអំណោយកាកបាទក្រហមកម្ពុជា កាលពីព្រឹកថ្ងៃអង្គារទី២៨ ខែសីហា ឆ្នាំ២០១៨។
លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានអោយដឹងថាបាន ក្នុងពិធីសំណេះសំណាល សួរសុខទុក្ខ និងចែកអំណោយ មនុស្សធម៌របស់កាកបាទក្រហមកម្ពុជា ដល់ប្រជាពលរដ្ឋ ដែលរងគ្រោះដោយទឹកជំនន់ទន្លេមេគង្គ នៅពេលនេះមានចំនួន ២,៣៤០គ្រួសារ ស្ថិត នៅឃុំខ្ពបតាងួន ស្រុកស្ទឹងត្រង់ខេត្តកំពង់ចាម។
លោក ស្នងការបានបញ្ជាក់ថា ពិធីសំណេះសំណាលនិងចែកអំណោយនេះ ធ្វើឡើង ក្រោមអធិបតីភាពដ៏ខ្ពង់ខ្ពស់ ឯកឧត្តម ហ៊ុន ណេង សមាជិកគណៈកម្មាធិការអចិន្ត្រៃយ៍រដ្ឋសភា អ្នកតំណាងរាស្ត្រមណ្ឌលកំពង់ចាម និងជាប្រធានកិត្តិយសកាកបាទក្រហមសាខាខេត្តកំពង់ចាម។
អញ្ជើញចូលរួមក្នុងកម្មវិធីនេះដែររួមមាន លោក លន់ លឹមថៃ ទីប្រឹក្សារាជរដ្ឋាភិបាល, លោក ច្រឹង គឹមស្រ៊ាន សមាជិកព្រឹទ្ធសភា, លោក គួច ចំរើន អភិបាលនៃគណៈអភិបាលខេត្ត, លោក កៅសុខអាន អភិបាលរងខេត្តកំពង់ចាម ព្រមទាំង អស់លោក-លោកស្រីប្រធាន-អនុប្រធានមន្ទីរ និងមន្ត្រីរាជការជាច្រើនរូបទៀត។
ប្រជាពលរដ្ឋ ២.៣៤០គ្រួសារ ដែលក្នុង ១ គ្រួសារៗ ទទួលបានរួមមាន: -អង្ករ ២៥គីឡូក្រាម មីចំនួន១កេះ។ ក្នុងនោះដែរគណៈអធិបតី បានប្រគេនអង្ករ ដល់ព្រះសង្ឃគង់នៅវត្ត ចំនួន
៣វត្ត ក្នុង ១វត្តៗទទួលបានអង្ករចំនួន៥០គីឡូក្រាម ព្រមទាំងឱសថមួយចំនួន ជូនដល់មណ្ឌលសុខភាព ឃុំខ្ពបតាងួន។
ប្រជាពលរដ្ឋ ដែលបានទទួលអំណោយ មានសេចក្តីរីករាយក្រៃលែង និងបានថ្លែងអំណរគុណដល់ លោក ប្រធានកាកបាទក្រហម ប្រចាំនៅខេត្តកំពង់ចាម ព្រមទាំងអស់លោកគណៈកម្មាធិការ ដែលបានចូលរួមក្នុងពិធីចែកអំណោយនៅពេលនេះ៕
Source: Kampuchea Thmey Daily
0 Comments