បាត់ដំបង ៖ ជនសង្ស័យម្នាក់ ដែលបច្ចុប្បន្នជាថៅកែលក់គ្រឿងសំណង់ យីហោ រុងរឿងប្រចាំស្រុកសំពៅលូន ត្រូវបានតុលាការចេញដីកាបញ្ជាអោយចូលខ្លួន តែជនសង្ស័យម្នាក់នេះមិនព្រមបង្ហាញខ្លួននៅចំពោះមុខតុលាការឡើយ រហូតត្រូវសមត្ថកិច្ចនៃផ្នែកអនុវត្តដីកាចុះទៅនាំខ្លួនដល់លំនៅដ្ឋានតែម្តង។
យោងតាមរបាយការណ៍របស់សមត្ថកិច្ចដែលដឹកនាំកំលាំងផ្ទាល់ដោយលោក វរសេនីយ៍កង សុផាណ្ណា បានចេញប្រតិបត្តិការ នាថ្ងៃទី៩ ខែសីហា ឆ្នាំ២០១៨ វេលាម៉ោង១០និង ៣០ នាទី ព្រឹក ត្រង់ចំណុចភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង។
កិច្ចប្រតិបត្តិការនេះដែរ គឺអនុវត្តទៅតាមដីកាបញ្ជាអោយចូលខ្លួន លេខ១៣ អយក/១៨ ចុះថ្ងៃទី២៨ ខែកុម្ភៈ ឆ្នាំ ២០១៨ របស់ព្រះរាជអាជ្ញា នួន សាន អោយអនុវត្តទៅលើឈ្មោះ ញ៉ែម ចន្ធា ភេទប្រុស អាយុ៣៦ឆ្នាំ មានទីលំនៅ ភូមិត្រពាំងប្រលិត ឃុំសន្តិភាព ស្រុកសំពៅលូន ខេត្តបាត់ដំបង ដោយបានចោទប្រកាន់ពីបទ(រំលោភលើទំនុកចិត្ត) ដែលប្រព្រឹត្តនៅក្នុងស្រុកសំពៅលូន នេះតែម្តង កាលពីថ្ងៃទី២២ ខែមករា ឆ្នាំ ២០១៧ និងដោយយោងតាមពាក្យបណ្តឹងរបស់តំណាងក្រុមហ៊ុន អ៊ី ឆែ គ្រុប។
គួរបញ្ជាក់ដែរថា ជនសង្ស័យខាងលើ បច្ចុប្បន្នបានក្លាយខ្លួនជាថៅកែ ក្រុមហ៊ុនលក់គ្រឿងសំណង់ ដ៏ធំមួយប្រចាំស្រុកសំពៅលូន ដែលមានយីហោ រុងរឿង ប៉ុន្តែបែរជាមានគំនិតទុច្ចរិតប្រព្រឹត្តបែបនេះទៅវិញ ហើយការចុះនាំខ្លួននេះក៏ដោយសារតែកន្លងមកតុលាការបានចេញដីកាកោះហៅដែរ តែបុគ្គលរូបនេះមិនព្រមចូលបង្ហាញខ្លួននៅចំពោះមុខតុលាការឡើយ ទើបលោកព្រះរាជអាជ្ញា ចេញដីកានេះឡើង។
បច្ចុប្បន្នក្រោយអនុវត្តដីកា សមត្ថកិច្ចបានបញ្ជូនមកការិយាល័យជំនាញដើម្បីចាត់ការបន្តតាមនីតិវិធី ៕
Source: Kampuchea Thmey Daily
0 Comments