មន្ត្រី​គណបក្សប្រឆាំង​ហ្ស៊ី​ម​បា​វ៉េ ​ត្រូវបាន​បដិសេធ​ការ​សុំ​សិទ្ធិ​ជ្រកកោន​ ហើយនឹង​ត្រូវ​និរទេស

មន្ត្រី​គណបក្សប្រឆាំង​កំពូល​មួយ​រូប​របស់​ប្រទេស​ហ្ស៊ី​ម​បា​វ៉េ ​បាន​រត់​ភៀសខ្លួន​ទៅកាន់​ប្រទេស​ហ្សាំ​ប៊ី​កាលពី​ថ្ងៃ​ពុធ​ ប៉ុន្តែ​ត្រូវបាន​បដិសេធ​ការសុំ​សិទ្ធិ​ជ្រកកោន​ ហើយ​ត្រូវបាន​គេ​រំពឹងថា​នឹង​ប្រឈម​នឹង​ការចាប់ខ្លួន​នៅក្នុង​ប្រទេស​កំណើត​ ខណៈ​ការព្រួយបារម្ភ​បាន​កើនឡើង​អំពី​ការបង្ក្រាប​របស់​រដ្ឋាភិបាល ​បន្ទាប់ពី​ការបោះឆ្នោត​ប្រធានាធិបតី​ដែលមាន​ជម្លោះ​កាលពី​សប្តាហ៍​មុន។

លោក Dewa Mavinga នាយក​នៅ​តំបន់​អាហ្វ្រិក​ខាងត្បូង​ប្រចាំ​អង្គការ​ឃ្លាំមើល​សិ​ទិ្ធ​មនុស្ស​បាន​ថ្លែងថា លោក Tendai Biti ដែលជា​អតីតរដ្ឋមន្ត្រី​ក្រសួង​ហិរញ្ញវត្ថុ​និង​ជា​មេដឹកនាំ​គណបក្សប្រឆាំង “​ចលនា​សម្រាប់​ការផ្លាស់ប្តូរ​ប្រជាធិបតេយ្យ​” (MDC) គឺ​នឹង​ត្រូវគេ​និរទេស​។​
​
រដ្ឋមន្ត្រី​ក្រសួងការបរទេស​ហ្សាំ​ប៊ី​លោក Joseph Malanji បាន​និយាយថា “​ហេតុផល​ដែល​លោក Biti បានផ្តល់​ឲ្យ​សម្រាប់​ការស្វែងរក​សិទ្ធិ​ជ្រកកោន​គឺ​មិនមាន​ភាពល្អ​ត្រឹមត្រូវ​ទេ​ដូច្នេះ​គាត់​ត្រូវបាន​គេ​ឃុំខ្លួន​នៅក្នុង​មន្ទីរ​ឃុំ​ឃាង​សុវត្ថិភាព​ហើយ​យើង​កំពុង​បញ្ជូន​គាត់​ត្រឡប់​ទៅ​ប្រទេស​ហ្ស៊ី​ម​បា​វ៉េ​វិញ​”។ ស្ថានភាព​របស់លោក Biti ត្រូវបាន​គេ​បង្ហាញ​បន្ទាប់ពី​មាន​ឈុត​ឆាក​នៃ​ការបាញ់សម្លាប់​នៅតាម​ដងផ្លូវ​ក្នុង​រដ្ឋធានី​របស់​ប្រទេស​ហ្ស៊ី​ម​បា​វ៉េ​កាលពី​មួ​យស​ប្ដា​ហ៏​មុន​ដោយបាន​សម្លាប់​មនុស្ស​ចំនួន​៦​នាក់​និង​មាន​ពាក្យបណ្តឹង​កាន់តែខ្លាំង​ពី​គណបក្សប្រឆាំង​អំពី​ការយាយី​។ ព្រឹត្តិការណ៍​នេះ​គឺ​ផ្ទុយ​ពី​ការអះអាង​របស់​ប្រធានាធិបតី​ជាប់ឆ្នោត​ថ្មី​លោក Emmerson Mnangagwa អំពី​“​ការចេញ​ផ្លែផ្កា​” នៃ​លទ្ធិប្រជាធិបតេយ្យ​បន្ទាប់ពី​មេដឹកនាំ​យូរអង្វែង​លោក Robert Mugabe បាន​ចុះ​ចេញពី​តំណែង​កាលពី​ខែវិច្ឆិកា​ក្រោម​សម្ពាធ​របស់​យោធា​។​
​
អ្នកការទូត​ជាន់ខ្ពស់​របស់​សហរដ្ឋ​អាមេរិក​សម្រាប់​ប្រទេស​អាហ្វ្រិក​មួយ​នេះ​បាន​និយាយថា គាត់​មានការ “​ព្រួយបារម្ភ​យ៉ាងខ្លាំង​ចំពោះ​របាយការណ៍​ដែល​អាច​ជឿ​ទុកចិត្តបាន​ថា អ្នកគាំទ្រ​គណបក្សប្រឆាំង​ត្រូវបាន​កំណត់​គោលដៅ​ដោយ​សមាជិក​នៃ​កងកម្លាំង​សន្តិសុខ​ហ្ស៊ី​ម​បា​វ៉េ​”​។​
​
លោក Tibor Nagy ជំនួយការ​ក្រសួងការបរទេស​នៃ​កិច្ចការ​អាហ្វ្រិក​បាន​និយាយថា លោក​បាន​ជំរុញ​យ៉ាងខ្លាំង​ដល់​អាជ្ញាធរ​នៅក្នុង​ប្រទេស​ហ្សាំ​ប៊ី​ដើម្បី​អនុញ្ញាត​ឲ្យ​លោក Biti ស្នាក់នៅ​ទីនោះ​រហូតដល់​សំណើសុំ​សិទ្ធិ​ជ្រកកោន​របស់លោក​អាច​ត្រូវបាន​វាយតម្លៃ​ឲ្យ​បាន​ត្រឹមត្រូវ​ឬ​អនុញ្ញាត​ឲ្យ​លោក​ឆ្លងកាត់​ដោយ​សុវត្ថិភាព​ទៅកាន់​ប្រទេស​ទី​បី​។
​
ព្រឹត្តិការណ៍​នេះ​បានកើត​ឡើង​នៅពេលដែល​គណបក្សប្រឆាំង MDC ត្រៀម​ប្រកួតប្រជែង​ដើម្បី​ជំទាស់​នៅក្នុង​តុលាការ​ចំពោះ​ជ័យជំនះ​ការបោះឆ្នោត​ថ្ងៃទី​៣០​ខែកក្កដា​ដែល​ខ្លួន​អះអាងថា​ជា​ការលួចបន្លំ​។​
​
លោក Biti ដែលជា​អ្នក​រិះគន់​រដ្ឋាភិបាល​ខ្លាំង​បំផុត​មួយរូប​គឺ​បានប្រកាស​មុនពេល​លទ្ធផល​នៃ​ការបោះឆ្នោត​ជា​ផ្លូវការ​ត្រូវបាន​ប្រកាស​កាលពី​ថ្ងៃ​សុក្រ​ថា មេដឹកនាំ​គណបក្សប្រឆាំង​លោក Nelson Chamisa បានទទួល​ជ័យជំនះ​ដែល​នេះ​ក៏​ជាការ​អះអាង​មួយ​ធ្វើឡើង​ដោយ​លោក Chamisa ខ្លួនឯង​ផងដែរ​។​
​
លោក Biti បាន​ប្រាប់​អ្នកយកព័ត៌មាន​មួយថ្ងៃ​បន្ទាប់ពី​ការបោះឆ្នោត​ថា “​នៅក្នុង​ប្រទេស​ធម្មតា លោក Chamisa នឹង​ស្បថ​ចូលកាន់​តំណែង​នៅពេលនេះ​”​។​
​
គណៈកម្មាធិការ​បោះឆ្នោត​ហ្ស៊ី​ម​បា​វ៉េ​បាន​និយាយថា វា​ជាការ​ខុសច្បាប់​ក្នុងការ​ចេញផ្សាយ​លទ្ធផល​មុន​ការប្រកាស​ជា​ផ្លូវការ​របស់ខ្លួន​៕

​

Source: Kampuchea Thmey Daily