សហរដ្ឋអាមេរិកបាននិយាយថា ខ្លួននឹងដាក់ទណ្ឌកម្មថ្មីទៅលើប្រទេសរុស្ស៊ី បន្ទាប់ពីបានកំណត់ថា រុស្ស៊ី បានប្រើប្រាស់ភ្នាក់ងារបំផ្លាញប្រព័ន្ធប្រសាទប្រឆាំងនឹងអតីតចារកម្មរបស់ប្រទេសរុស្ស៊ីដែលរស់នៅចក្រភពអង់គ្លេស។
លោក Sergei Skripal និងកូនស្រីរបស់គាត់ឈ្មោះ Yulia ត្រូវបានគេប្រទះឃើញសន្លប់នៅលើកៅអីមួយក្នុងទីក្រុង Salisbury កាលពីខែមីនា។
ការវាយប្រហារនេះបានបណ្តាលឲ្យអ្នកទាំងពីរធ្លាក់ខ្លួនឈឺជាទម្ងន់ប៉ុន្តែពួកគេបានជាសះស្បើយវិញបន្ទាប់ពីសម្រាកព្យាបាលក្នុងមន្ទីរពេទ្យអស់រយៈពេលជាច្រើនសប្តាហ៍។
ការស៊ើបអង្កេតរបស់ចក្រភពអង់គ្លេសបានស្តីបន្ទោសលើប្រទេសរុស្ស៊ីចំពោះការវាយប្រហារនេះប៉ុន្តែវិមានក្រឹមឡាំងបានបដិសេធយ៉ាងខ្លាំងចំពោះការចូលរួមណាមួយ។
ក្នុងសេចក្តីថ្លែងការណ៍មួយដែលចេញផ្សាយកាលពីថ្ងៃពុធ ក្រសួងការបរទេសអាមេរិកបានបញ្ជាក់ថា ខ្លួនកំពុងអនុវត្តវិធានការប្រឆាំងនឹងរុស្ស៊ីអំពីឧប្បត្តិហេតុនេះ។
អ្នកនាំពាក្យលោកស្រី Heather Nauert បាននិយាយថា វាត្រូវបានកំណត់ថា ប្រទេសនេះបានប្រើប្រាស់អាវុធគីមីឬជីវសាស្ត្រដែលរំលោភលើច្បាប់អន្តរជាតិឬបានប្រើអាវុធគីមីឬអាវុធជីវសាស្ត្រប្រឆាំងនឹងជនជាតិរបស់ខ្លួន។
ស្របពេលជាមួយគ្នានោះដែរ រដ្ឋាភិបាលអង់គ្លេសបានស្វាគមន៍ការដាក់ទណ្ឌកម្មនេះ។
សេចក្តីថ្លែងការណ៍របស់ការិយាល័យបរទេសចក្រភពអង់គ្លេសបាននិយាយថា “ការឆ្លើយតបដ៏ខ្លាំងក្លារបស់អន្តរជាតិចំពោះការប្រើប្រាស់អាវុធគីមីនៅតាមដងផ្លូវនៃទីក្រុង Salisbury គឺជាការផ្ញើសារយ៉ាងច្បាស់ទៅកាន់ប្រទេសរុស្ស៊ីថា ឥរិយាបថព្រហើននិងបង្កហេតុរបស់ខ្លួននឹងមិនត្រូវបានធ្វើឡើងដោយគ្មានការដាក់ទោសនោះទេ”។
ទណ្ឌកម្មថ្មីនេះនឹងចូលជាធរមាននៅថ្ងៃទី២២ខែសីហាហើយវាទាក់ទងទៅនឹងការនាំចេញគ្រឿងអេឡិចត្រូនិចនិងគ្រឿងបច្ចេកវិទ្យាផ្សេងៗទៀត។
ក្រសួងការបរទេសអាមេរិកបាននិយាយថា ការដាក់ទណ្ឌកម្មបន្ថែមទៀតនឹងត្រូវធ្វើឡើងក្នុងអំឡុងពេល៩០ថ្ងៃប្រសិនបើរុស្ស៊ីមិនបានផ្តល់ការធានាដែលអាចជឿទុកចិត្តបានថា ខ្លួននឹងលែងប្រើអាវុធគីមីទៀតហើយនិងអនុញ្ញាតឲ្យមានការត្រួតពិនិត្យដោយអង្គការសហប្រជាជាតិ៕
Source: Kampuchea Thmey Daily
0 Comments