បាត់ដំបង ៖ ជនសង្ស័យចំនួន២នាក់ ដែលម្នាក់ពាក់ព័ន្ធនឹងករណីចែកចាយ ឯម្នាក់ទៀតពាក់ព័ន្ធនឹងការ កាន់កាប់រក្សាទុកនូវថ្នាំញៀន ខុសច្បាប់ត្រូវបានសមត្ថកិច្ចធ្វើការឃាត់ខ្លួនបានជាបន្តបន្ទាប់ លើ២ករណីផ្សេងគ្នា បន្ទាប់ពីបានស្រាវជ្រាវ និងតាមប្រមាញ់អស់មួយរយៈរួចមក។
យោងតាមរបាយការណ៍របស់សមត្ថកិច្ចបានឲ្យដឹងថា កិច្ចប្រតិបត្តិការលើកទី១បានប្រព្រឹត្តឡើងកាលពីថ្ងៃទី៦ ខែសីហា ឆ្នាំ២០១៨ វេលាម៉ោង៣និង១៥នាទីរសៀល ត្រង់ចំណុចភូមិកម្មករ សង្កាត់ស្វាយប៉ោ ក្រុងបាត់ដំបង ដោយបានឃាត់ខ្លួនជនសង្ស័យម្នាក់ឈ្មោះ សាល សុផន ហៅភ័ណ ភេទប្រុស អាយុ៣២ឆ្នាំ រស់នៅភូមិ សំបុកអក ឃុំកំពង់ព្រៀង ស្រុកសង្កែ ខេត្តបាត់ដំបង។
នៅក្នុងកិច្ចប្រតិបត្តិការលើកទី១នេះ សមត្ថកិច្ចបានដកហូតនូវថ្នាំញៀនប្រភេទម៉ាទឹកកកចំនួន៦ កញ្ចប់ ស្មើនឹងទម្ងន់ ៣,១១ ក្រាម ទូរស័ព្ទដៃ ១ គ្រឿង និងសម្ភារៈសម្រាប់វេចខ្ចប់មួយចំនួនថែមទៀត។
លុះនៅវេលាម៉ោង ៤ និង ៣០ នាទី ល្ងាច ថ្ងៃដដែល សមត្ថកិច្ច នៃអធិការ នគរបាលស្រុកសង្កែ បានចេញប្រតិបត្តិការទៅកាន់ចំណុចភូមិ អូរស្រឡៅ ឃុំអូរដំបង១ ស្រុកសង្កែដោយនៅទីនោះ សមត្ថកិច្ចបានឃាត់ខ្លួនជនសង្ស័យបានម្នាក់ទៀត ពាក់ព័ន្ធនិងករណីរក្សាទុកដោយខុសច្បាប់ នូវសារធាតុញៀន ដែលជនសង្ស័យរូបនោះមានឈ្មោះ ស៊ាន សុធា ភេទប្រុស អាយុ២៧ឆ្នាំ រស់នៅត្រង់ចំណុចខាងលើ។
នៅលើកទី២នេះ កម្លាំងបានដកហូតនូវវត្ថុតាងមួយចំនួនដូចជា ថ្នាំញៀនប្រភេទម៉ាទឹកកកចំនួន១ថង់ ស្មើនឹងទម្ងន់ ៨,៧០ ក្រាម ទូរស័ព្ទដៃ ១ គ្រឿង និង ប្រាក់រៀល ចំនួន ៧ ម៉ឺន រៀល ថែមទៀត។ បច្ចុប្បន្នជនសង្ស័យទាំង២ រួមជាមួយនឹងវត្ថុតាង ត្រូវបានកម្លាំងសមត្ថកិច្ច រៀបចំឯកសារដើម្បីបញ្ជូនខ្លួនទៅកាន់សាលាដំបូងហើយ៕
Source: Kampuchea Thmey Daily
0 Comments