ភ្នំពេញ ៖ ជាងភ្លើងម្នាក់ ខណៈដែលគេហៅឲ្យមកតភ្លើងនៅផ្ទះក៏ភ្លាត់ស្នៀតឆក់ស្លាប់នៅដំបូលជាន់ទី៣ ទាល់តែធំក្លិនស្អុយទៅហើយ ទើបមានការភ្ញាក់ផ្អើលកាលពីវេលាម៉ោង១០ព្រឹកថ្ងៃទី២៧ ខែសីហា ឆ្នាំ២០១៨នៅចំណុចផ្ទះលេខ៤៥ ផ្លូវលេខ២៤០ ក្រុម២៨ ភូមិ៥ ក្នុងសង្កាត់ចតុមុខ ខណ្ឌដូនពេញ។
ជាងភ្លើងដែលត្រូវចរន្តអគ្គិសនីឆក់ស្លាប់នោះ ត្រូវបានគេស្គាល់ថា ឈ្មោះណាក់ ភេទប្រុសអាយុ៣០ឆ្នាំ មិនស្គាល់លំនៅនោះទេ។
បើតាមការបំភ្លឺពីឈ្មោះចិត ភក្តី ភេទប្រុស អាយុ៤៩ឆ្នាំ មុខរបរជានាយរងការិយាល័យនៃនាយកដ្ឋានផ្សព្វផ្សាយអប់រំបានប្រាប់សមត្ថកិច្ចថា កាលពីថ្ងៃទី២៥ ខែសីហា ឆ្នាំ២០១៨ វេលាម៉ោង០៧និង៣០នាទី ខ្លួនបានទូរស័ព្ទចូលលេខ០១៦ ៧៨៨ ៩០៥(ជនរងគ្រោះ)ជាជាងភ្លើងឲ្យមកតភ្លើងនៅផ្ទះកើតហេតុ លុះដល់ថ្ងៃទី២៧ ខែសីហាឆ្នាំ២០១៨ វេលាម៉ោង០៩និង៣០នាទីគាត់បានទូរស័ព្ទទៅជនរងគ្រោះម្តងទៀតតែមិនចូលរួចក៏ជិះម៉ូតូមកកន្លែងកើតហេតុឡើងទៅជាន់ទី៣ស្រាប់តែធុំក្លិនស្អុយក៏មើលនៅដំបូលពិដានក៏ឃើញជនរងគ្រោះដេកស្លាប់បាត់ទៅហើយ ក៏រាយការណ៍ប្រាប់សមត្ថកិច្ចមូលដ្ឋានតែម្តង។
ដោយឆ្លងតាមការពិនិត្យធ្វើកោសល្យវិច័យរបស់គណៈកម្មការបច្ចេកទេសបានបញ្ជាក់ថាជនរងគ្រោះរូបនោះពិតជាស្លាប់ដោយឆក់ចរន្តអគ្គិសនីពិតប្រាកដមែន
បច្ចុប្បន្នសពបានបញ្ជូនទៅតម្កល់នៅវត្តស្ទឹងមានជ័យ ដើម្បីក្រុមគ្រួសារមកធ្វើបុណ្យតាមប្រពៃណី៕
Source: Kampuchea Thmey Daily
0 Comments