ភ្នំពេញ ៖ លោក មៀច សំរួល អតីតឧបការីផ្ទាល់សម្តេចក្រុមព្រះ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច បានសម្រេចដាក់ពាក្យប្តឹងលោក យឹម សាវី អគ្គលេខាធិការគណបក្ស និងលោកប៉ោ ប៊ុនស្រ៊ឺ អនុប្រធានគណបក្ស ទៅតុលាការពីបទផ្តួចផ្តើម និងសមគំនិតធ្វើលិខិតរដ្ឋបាលទុច្ចរិតបញ្ចប់សមាជិកភាពរូបលោក នេះបើយោងតាមពាក្យបណ្តឹង ដែលបានដាក់ចូលសាលាដំបូងរាជធានីភ្នំពេញ កាលពីថ្ងៃទី៧ ខែសីហា ឆ្នាំ២០១៨។
តាមពាក្យបណ្តឹងរបស់លោក មៀច សំរួល បានឲ្យដឹងថា ការបញ្ចប់សមាជិកភាពលោកពីគណបក្សហ៊្វុនស៊ិនប៉ិច ធ្វើឡើងក្នុងចេតនាទុច្ចរិត ដែលធ្វើឲ្យប៉ះពាល់កិត្តិយស សេចក្តីថ្លៃថ្នូរ និងផលប្រយោជន៍ស្របច្បាប់យ៉ាងធ្ងន់ធ្ងរ ដូច្នេះប្តឹងទាមទារសំណងជំងឺចិត្តចំនួន៤០០លានរៀល។
ពាក្យបណ្តឹងលើកឡើងយ៉ាងនេះថា “ខ្ញុំបាទឈ្មោះ មៀច សំរួលកើតទុក្ខមិនសុខចិត្ត និងរងនូវភាពអយុត្តិធម៌ សុំប្ដឹងឈ្មោះ យឹម សាវី មុខងារអគ្គលេខាធិការគណបក្សហ៊្វុនស៊ិនប៉ិច និងឈ្មោះ ប៉ោ ប៊ុនស្រ៊ី មុខងារជាអនុប្រធានគណបក្សហ៊្វុនស៊ិនប៉ិច ពីបទផ្ដួចផ្ដើមសមគំនិតធ្វើលិខិតរដ្ឋបាលទុច្ចរិត បញ្ចប់សមាជិកភាពខ្ញុំបាទពីគណបក្សហ៊្វុនស៊ិនប៉ិច ដែលបានអនុវត្តផ្ទុយពីប្រការ៣ និងប្រការ៥៤ នៃលក្ខន្តិកៈគណបក្ស។ ប្រការ១៣ បានចែងថា ការបញ្ចប់ឈ្មោះសមាជិកចេញពីគណបក្ស សម្រេចដោយប្រធានគណបក្ស តាមសំណើរបស់ក្រុមប្រឹក្សាវិន័យ ដូច្នេះសេចក្តីសម្រេចនេះ ធ្វើឡើងផ្ទុយពីលក្ខន្តិកៈរបស់គណបក្សទាំងស្រុងដោយគណបក្សហ៊្វុនស៊ិនប៉ិច មិនទាន់បានបង្កើតក្រុមប្រឹក្សាវិន័យនៅឡើយ ដើម្បីវិនិច្ឆ័យកំហុស ឬលើកសំណើនេះទេ។ ប្រការ៥៤ នៃលក្ខន្តិកៈ វក្យខណ្ឌទី២ បានចែងថា ការព្រមានជាលាយលក្ខណ៍អក្សរ, ការស្ដីបន្ទោសដោយមានចុះក្នុងសំណុំឯកសារ និងការបណ្ដេញចេញជាស្ថាពរ”។
លោក មៀច សម្រួល បានបញ្ជាក់ថា លោកគឺជាសកម្មជនគណបក្សហ៊្វុនស៊ិនប៉ិច តាំងពីឆ្នាំ ២០០៦ រហូតមកដល់បច្ចុប្បន្ននេះ ពុំធ្លាប់ដែលមានកំហុសឆ្គងម្ដងណាឡើយ និងពុំដែលមានការស្តីបន្ទោសពីថ្នាក់ដឹកនាំគណបក្ស ឬកំហុសដូចមានចែងក្នុងប្រការ៥៤ វក្យខ័ណ្ឌទី២ ខាងលើឡើយ។ ក្នុងនាមជាសកម្មជនមានតួនាទីជាច្រើនដូចជា អនុប្រធានក្រុមការងារ ឧបការីផ្ទាល់ និងប្រធានចលនាយុវជនគណបក្សថ្នាក់ជាតិ លោកបានកសាងស្នាដៃ និងសមិទ្ធផលនៅគណបក្សជាច្រើនសន្ធឹកសន្ធាប់ដូចជា ចុះតាមបណ្ដារាជធានី ខេត្តទាំង២៥ ជាមួយប្រធានគណបក្សគ្រប់មូលដ្ឋាន ឃុំ ស្រុក ខេត្ត ដោយបានបង្កើតវេទិកាយុវជន និងព្រឹត្តិការណ៍ជំរុញឲ្យគណបក្សមានឈ្មោះល្បីៗ និងបានជួយរៀបចំរចនាសម្ព័ន្ធថ្នាក់ខេត្ត ស្រុក ឃុំ ភូមិ ដោយបានចំណាយទាំងធនធានមនុស្ស និងធនធានថវិកាអស់យ៉ាងច្រើនដូចជា ការធ្វើស្លាក logoដឹកជញ្ជូនសមាជិកចុះដង្ហែតាមខេត្ត ក្រុង និងបានឧបត្ថម្ភលើគណបក្សហ៊្វុនស៊ិនប៉ិច ដើម្បីដោះស្រាយការងារសង្គមកិច្ចនៅថ្នាក់ជាតិ។
លោកបញ្ជាក់ទៀតថា សេចក្តីសម្រេចចុះថ្ងៃទី២៥ ខែមករា ឆ្នាំ២០១៨ ស្តីពីការបញ្ចប់សមាជិកភាពលោកពីគណបក្សហ៊្វុនសិនប៉ិច ធ្វើឡើងក្នុងចេតនាទុច្ចរិត ដែលធ្វើឲ្យប៉ះពាល់ដល់កិត្តិយស សេចក្តីថ្លៃថ្នូរ និងផលប្រយោជន៍ស្របច្បាប់យ៉ាងច្រើនធ្ងន់ធ្ងរ ដូច្នេះលោកកើតទុក្ខមិនសុខចិត្ត ប្ដឹងទាមទារសំណងនៃការក្បត់ទំនុកចិត្ត និងជំងឺចិត្ត ព្រមទាំងការលះបង់ និងការចំណាយផ្សេងៗទៅលើគណបក្សកន្លងមក នូវទឹកប្រាក់សរុបចំនួន៤០០លានរៀល។
ទាក់ទងករណីប្តឹងនេះ ការិយាល័យយើងមិនទាន់អាចស្វែងរកការបំភ្លឺពីលោក យឹម សាវី អគ្គលេខាធិការគណបក្ស និងលោកប៉ោ ប៊ុនស្រ៊ឺ អនុប្រធានគណបក្សហ្វ៊ុនស៊ិនប៉ិចនៅឡើយទេ៕
Source: Kampuchea Thmey Daily
0 Comments