យោងតាមប្រភពមកពីសហព័ន្ធកីឡាបាល់ទាត់កម្ពុជា បានបញ្ជាក់ថា នៅចុងខែតុលា ឆ្នាំ២០១៨ ខាងមុខមានក្រុមបាល់ទាត់យុវជនថ្នាលរបស់ខេត្តមួយនៅប្រទេសជប៉ុន១ក្រុម នឹងមកប្រកួតមិត្តភាពអន្តរជាតិជាមួយក្រុមជម្រើសជាតិកម្ពុជាក្រោមអាយុ១៩ឆ្នាំ (U19)។
បច្ចុប្បន្នលោក Musashi Mizushima ជនជាតិជប៉ុន ជាគ្រូបង្វឹករបស់ក្រុមជម្រើសជាតិក្រោយអាយុ១៩ឆ្នាំរបស់កម្ពុជា។ ចំណែកក្រុមជប៉ុនដែលនឹងមកប្រកួតនៅកម្ពុជា នេះមានមូលដ្ឋាននៅខេត្ត Fukushima។ ក្រុម U19កម្ពុជា ទើបតែប្រកួតចាញ់ក្រុម JFL Selection របស់ប្រទេសជប៉ុន កាលថ្ងៃសុក្រ ទី០៣ សីហា កន្លងទៅ ក្នុងប្រកួតមិត្តភាពនេះដូចគ្នា។
ចំពោះការប្រកួតជាមួយក្រុម Fukushima នេះលោក Musashi Mizushima បានលើកឡើងថា «បើតាមខ្ញុំដឹងសមត្ថភាពរបស់ពួកគេប្រហាក់ប្រហែលនឹងយើងដែរ។ ដូច្នេះនេះជាឱកាសល្អមួយសម្រាប់យើង។ ខ្ញុំគិតថាបើយើងបានប្រកួតមិត្តភាពអន្តរជាតិបែបនេះច្រើន យើងនឹងបានបទពិសោធន៍ច្រើន ដើម្បីបង្កើនសមត្ថភាពរបស់កីឡាករយើងនៅថ្ងៃមុខ»។
ចំពោះក្រុម U19 កម្ពុជា ដែលសហព័ន្ធកីឡាបាល់ទាត់កម្ពុជា កោះហៅកាលពីពេលថ្មីៗនេះមានកីឡាករចំនួន២៣នាក់ ដោយក្នុងនោះមានសៀង ចន្ធា, សៀន សុភត្រា, ហេង ទីណា,ថា ច័ន្ទឬទ្ធី, សឿត ណាវ៉ា, ឡុង ម៉េងហាវ, ហ៊ុល គឹមហ៊ុយ, លន ថេន, ឈឿង វិស៊ីនុ, ផាច សុជាវីឡា, ទេស សម្បត្តិ, ណារ៉ុង កក្កដា, សាន គឹមហេង, ជា វ៉ាន់សាក់, សាន បូរ៉ា, ត្រាយ វិចិត្រ, ឃាង ម៉េងហួរ, ណុប ដេវីដ, ពេជ្រ សុវណ្ណារ័ត្ន, យ៉េត ចិត្រា, ចន្ថា ធនធាន, ឪ ភារ៉ុណ, ឃុន សេងថៃ។
ក្រុមបាល់ទាត់ U19 កម្ពុជា ក៏ទើបត្រឡប់មកពីចូលរួមក្នុងការប្រកួតពានរង្វាន់ AFF U19 Championship នៅប្រទេសឥណ្ឌូនេស៊ី កាលខែកក្កដា ដោយ ដោយបញ្ចប់នៅចំណាត់ថ្នាក់លេខ៣ក្នុងពូល ក្រោយយកឈ្នះប្រ៊ុយណេ ៥ទល់០ ចាញ់ម៉ាឡេស៊ី ២ទល់០ ចាញ់មីយ៉ាន់ម៉ា ៤ទល់១ និងឈ្នះ ទីម័រខាងកើត២ទល់១៕
Source: Kampuchea Thmey Daily
0 Comments