លោកមាជ សុវណ្ណារ៉ា មិនចង់ឮពាក្យថា ការដោះលែងរូបលោក និងអ្នកផ្សេងទៀត មកពីសម្ពាធអន្តរជាតិ

ភ្នំពេញ ៖ ក្រុមសកម្មជនអតីតគណបក្សប្រឆាំងចំនួន១៤នាក់ ក្នុងនោះមានលោក មាជ សុវណ្ណារ៉ា អតីតប្រធាននាយកដ្ឋានព័ត៌មាន និងប្រព័ន្ធផ្សព្វផ្សាយរបស់អតីតគណបក្សសង្គ្រោះជាតិផង បានចេញពីពន្ធនាគារហើយ នៅវេលាម៉ោងប្រមាណជិត១ រំលងអធ្រាត្រ ឈានចូលថ្ងៃទី២៨ ខែសីហា ឆ្នាំ២០១៨ ក្រោយពីមានព្រះរាជក្រឹត្យលើកលែងទោស ដោយកម្លាំងសមត្ថកិច្ច បានជូនទៅដល់ផ្ទះតែម្តង ហើយការពន្យារពេលនៃការដោះលែងរហូតដល់យប់ជ្រៅបែបនេះ ដោយបារម្ភពីសុវត្ថិភាព ពីព្រោះមានមនុស្សច្រើនបាននាំគ្នាទៅរង់ចាំមើល នេះបើតាមការបញ្ជាក់ពីលោក មាជ សុវណ្ណារ៉ា។

អតីតសមាជិកបក្សប្រឆាំងទាំង១៤រូប ដែលត្រូវបានលើកលែងទោស និងដោះលែងនោះ រួមមាន ១. ឈ្មោះ មាជ សុវណ្ណារ៉ា ភេទប្រុស អាយុ៤៦ឆ្នាំ ២. ឈ្មោះ អឿ ណារិត ភេទប្រុស អាយុ៣៩ឆ្នាំ ៣. ឈ្មោះ ឃិន រឿន ហៅ ឃិន ជំរឿន ភេទប្រុស អាយុ៣២ឆ្នាំ (អ្នកទាំង៣នាក់ខាងលើ ត្រូវបានសាលាដំបូងរាជធានីភ្នំពេញ ចេញសាលក្រមព្រហ្មទណ្ឌលេខ ២៩០ “ប” ក្រ៣ ភ.ព.ព្រ.ទ ចុះថ្ងៃទី២១-០៧-២០១៥ ដាក់ពន្ធនាគារក្នុងម្នាក់ៗកំណត់រយៈពេល២០ឆ្នាំ ពីបទដឹកនាំកុបកម្ម) ៤. ឈ្មោះ នាង សុឃុន ភេទប្រុស អាយុ ២៧ឆ្នាំ ៥. ឈ្មោះ សាន គឹមហេង ភេទប្រុស អាយុ ៣២ឆ្នាំ ៦. ឈ្មោះ ស៊ុំ ពុទ្ធី ភេទប្រុស អាយុ ៤៩ឆ្នាំ ៧. ឈ្មោះ កែ ឃីម ហៅ វិនឌី ភេទប្រុស អាយុ ៣៤ឆ្នាំ ៨. ឈ្មោះ ទេព ណារិន ភេទប្រុស អាយុ ២៩ឆ្នាំ ៩. ឈ្មោះ អាន បឋម ហៅ សុខុម ភេទប្រុស អាយុ ៣៥ឆ្នាំ ១០. ឈ្មោះ សាន សីហៈ ភេទប្រុស អាយុ២៦ ឆ្នាំ ១១. ឈ្មោះ អ៊ុក ពេជ្រសំណាង ភេទប្រុស អាយុ ៥១ឆ្នាំ (អ្នកទាំង៨នាក់នេះ ត្រូវបានសាលាដំបូងរាជធានីភ្នំពេញសម្រេចផ្ដន្ទាទោសដាក់ពន្ធនាគារក្នុងម្នាក់ៗកំណត់រយៈពេល០៧ឆ្នាំ ពីបទចូលរួមធ្វើកុបកម្ម ហើយសាលក្រមព្រហ្មទណ្ឌនេះ ត្រូវបានភាគីជនជាប់ចោទប្តឹងតវ៉ាទៅសាលាឧទ្ធរណ៍ ហើយសាលាឧទ្ធរណ៍បានចេញសាលដីកាលេខ ៤៨ ក្រIV “ណ” ចុះថ្ងៃទី១០-០៥-២០១៨ ដោយតម្កល់ការសម្រេចផ្តន្ទាទោស ដូចតុលាការជាន់ទាប) ១២. ឈ្មោះ រឿន ចិត្រា ភេទប្រុស អាយុ ៣៣ឆ្នាំ ១៣. ឈ្មោះ យន់ គឹមហួរ ភេទប្រុស អាយុ ២៨ឆ្នាំ ១៤. ឈ្មោះ យា ថុង ភេទប្រុស អាយុ ៤៣ឆ្នាំ (អ្នកទាំងនេះ ត្រូវបានតុលាការសម្រេចផ្តន្ទាទោសដាក់ពន្ធនាគារក្នុងម្នាក់ៗកំណត់រយៈពេល០៧ឆ្នាំ ពីបទចូលរួមធ្វើកុបកម្ម)។

សូមបញ្ជាក់ថា មុននឹងមានការដោះលែងនេះ អតីតសមាជិកអតីតគណបក្សប្រឆាំងទាំង១៤នាក់នេះ បានធ្វើលិខិតគោរពស្នើសុំទៅសម្តេចតេជោ ហ៊ុន សែន កាលពីថ្ងៃទី២៤ ខែសីហា ឆ្នាំ២០១៨ ដោយស្នើសុំសម្តេចជួយអន្តរាគមន៍ ស្នើលើកលែងទោសឲ្យពួកគេ ដើម្បីបានរួចផុតទោស និងមានសេរីភាព ហើយអ្នកទាំង១៤រូបនេះ ក៏បានសម្រេចដកបណ្តឹងសាទុក្ខ និងបណ្តឹងបណ្តឹងឧទ្ធរណ៍ផងដែរ កាលពីថ្ងៃទី២៧ ខែសីហា ឆ្នាំ២០១៨ ដែលនាំឲ្យសាលក្រម និងសាលដីការបស់តុលាការ បានចូលជាស្ថាពរ ដែលជាផ្នែកមួយនៃការខិតខំប្រឹងប្រែង ដើម្បីបញ្ចប់សំណុំរឿងនេះតាមនីតិវិធីច្បាប់ និងឈានទៅស្នើសុំលើកលែងទោស។

ថ្លែងទៅកាន់អ្នកសារព័ត៌មាន បន្ទាប់ពីត្រូវបានដោះលែងចេញពីពន្ធនាគារ លោក មាជ សុវណ្ណារ៉ា បានថ្លែងអំណរគុណដល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានធ្វើអន្តរាគមន៍ស្នើសុំទៅព្រះមហាក្សត្រឲ្យមានការលើកលែងទោសដល់រូបលោក និងសកម្មជនទាំងអស់នាពេលនេះ។ ជាមួយនឹងការលើកឡើងខាងលើនេះ លោក មាជ សុវណ្ណារ៉ា បានហៅការដឹកនាំរបស់សម្ដេចតេជោ ហ៊ុន សែន ថាជាអ្នកនយោបាយឆ្លាតវៃ និងបានអះអាងថា “អ្នកនយោបាយ គេមិនដែលបិទផ្លូវគ្នាទេ គេបិទខាងនេះ គេទុកខាងនោះ” ។ លោកជឿជាក់ថា ក្នុងនាមជាខ្មែរដូចគ្នា អាចធ្វើការជាមួយគ្នាបាន ពីព្រោះសម្ដេចតេជោ ហ៊ុន សែន មានកូនជាបណ្ឌិត ជាអនុបណ្ឌិត ដែលត្រូវបន្តនយោបាយតទៅមុខទៀត។

លោក មាជ សុវណ្ណារ៉ា បានអះអាងថា យើងប្រឆាំងគ្នាតែទៅលើគោលនយោបាយប៉ុណ្ណោះ តែយើងមិនអាចប្រឆាំងកាប់សម្លាប់គ្នាដូចនៅក្នុងរបបកម្ពុជាប្រជាធិបតេយ្យនោះទេ ដូច្នេះលោកសង្ឃឹមថា ខ្មែរនៅតែអាចធ្វើការជាមួយគ្នាបាន។ ជាមួយគ្នានោះ ដាក់ក្តីសង្ឃឹមលើសម្ដេចអគ្គមហាសេនាបតីតេជោ ហ៊ុន សែនថា ទោះបីជាស្ថិតក្នុងនីតិវិធីណាក៏ដោយ សម្តេចនឹងអាចធ្វើឲ្យមេបក្សរបស់ខ្លួន គឺលោក កឹម សុខា បានចាកចេញពីពន្ធនាគារដូចរូបលោកផងដែរ។

ទាក់ទងទៅនឹងការលើកឡើងមួយចំនួនដែលថា ការដោះលែងលោក មាជ សុវណ្ណារ៉ា និងសកម្មជនគណបក្សប្រឆាំងទាំង១៤ រូប មានទាក់ទងទៅនឹងសម្ពាធបរទេស និងការទិញលក់ ឬជាថ្នូរអ្វីមួយនោះ លោក មាជ សុវណ្ណារ៉ា អះអាងថា មិនមានទេ និងបានបញ្ជាក់ថា ការដោះលែងនេះកើតឡើងដោយការឯកភាពគ្នា។ លោកបញ្ជាក់យ៉ាងនេះថា “នេះជារបត់នយោបាយថ្មីមួយ ដែលខ្ញុំចង់ឃើញការឯកភាពរវាងខ្មែរនិងខ្មែរ ...ខ្ញុំអត់ចង់ឮថា មកពីសម្ពាធអន្តរជាតិអីនោះទេ គឺយើងអ្នកនយោបាយមិនបិទផ្លូវគ្នានោះទេ ទុកផ្លូវឲ្យមានការផ្សះផ្សាជាតិ”។

ដោយឡែក ចំពោះការដោះលែងរហូតយប់ជ្រៅបែបនេះ លោក មាជ សុវណ្ណារ៉ា អះអាងថា ព្រះរាជក្រឹត្យចេញប្រហែលម៉ោង៦ល្ងាច ប៉ុន្តែត្រូវបានអូសបន្លាយការដោះលែងរហូតម៉ោងជិត១រំលងអធ្រាត្រនេះ គឺជាការទាក់ទងទៅនឹងបញ្ហាសុវត្ថិភាព ពីព្រោះមានមនុស្សជាច្រើនមកចាំទទួលនៅខាងមុខពន្ធនាគារ ដែលសមត្ថកិច្ចមិនអាចសន្និដ្ឋានថា មានអ្នកណាខ្លះ មានគំនិតបែបណាខ្លះ ខណៈដែលអ្នកទី១ និងអ្នកទី២ កំពុងតែសម្របសម្រួលចាប់ដៃគ្នាដោះស្រាយបញ្ហា ប៉ុន្តែអាចនឹងមានអ្នកទី៣ មកបង្កជាបញ្ហា ទើបមានការពន្យារពេលបែបនេះ ដូច្នេះវាមិនមែនជាការគាបសង្កត់ ឬមានបញ្ហាអ្វីមួយនោះទេ។

លោក មាជ សុវណ្ណរ៉ា អតីតប្រធាននាយកដ្ឋានព័ត៌មាន និងប្រព័ន្ធផ្សព្វផ្សាយរបស់អតីតគណបក្សសង្គ្រោះជាតិ ត្រូវបានសមត្ថកិច្ចចាប់ខ្លួន កាលពីថ្ងៃទី១១ ខែវិច្ឆិកា ឆ្នាំ២០១៤ ហើយត្រូវបានឃុំខ្លួនក្រោមបទចោទ “ញុះញង់ឲ្យប្រព្រឹត្តិអំពើកុប្បកម្ម ការប្រើអំពើហិង្សា និងការប្រឆាំងមន្ត្រីរាជការសាធារណៈ” នៅក្នុងព្រឹត្តិការណ៍វាយតប់គ្នា ដោយហិង្សា កាលពីថ្ងៃទី១៥ ខែកក្កដា ឆ្នាំ២០១៤ កន្លងទៅ ហើយក្រោយមកមនុស្សមួយចំនួនទៀត ដែលជាសកម្មជនអតីតគណបក្សប្រឆាំងមួយនេះ ក៏ត្រូវបានចាប់ខ្លួនជាបន្តបន្ទាប់ក្នុងបទល្មើសដូចគ្នានេះ៕