ភ្នំពេញ ៖ កំណាត់ផ្លូវបេតុងមួយខ្សែស្ថិតនៅតាមចូលវត្តកំពង់ក្ដុលក្នុងសង្កាត់សាក់សំពៅ ខណ្ឌដង្កោ ដែលទទួលរងទឹកជំនន់ស្ទឹងព្រែកត្នោតហូរច្រោះ បាក់ស្រុតធ្ងន់ធ្ងរកាលពីប៉ុន្មានថ្ងៃមុននោះ រដ្ឋបាលរាជធានីភ្នំពេញបានស្ថាបនាជាបណ្តោះអាសន្នរួចរាល់ហើយ ដើម្បីដាក់អោយប្រជាពលរដ្ឋបានប្រើប្រាស់ប្រចាំថ្ងៃ។
លោកសាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញបានអោយដឹងនៅរសៀលថ្ងៃទី០៨ សីហានេះថា ក្រោយពី លោកឃួង ស្រេង អភិបាលរាជធានីភ្នំពេញ បានចុះពិនិត្យមើលផ្លូវបេតុងចូលវត្តរនតៈតេជៈ ហៅវត្តកំពង់ក្ដុល ស្ថិតនៅសង្កាត់សាក់សំពៅ ខណ្ឌដង្កោ ដែលរងទឹកជំនន់ស្ទឹងព្រែកត្នោតហូរច្រោះ បាក់ស្រុតធ្ងន់ធ្ងរ មិនអាចធ្វើចរាចរបាននោះ និងក្រោយពីមានការណែនាំជាបន្ទាន់ពីលោកអភិបាលរាជធានីអោយធ្វើការជួសជុលផ្លូវដែលខូចខាតនេះឡើងវិញ ទើបនៅព្រឹកថ្ងៃទី២៧ខែកក្កដាឆ្នាំ២០១៨កន្លងមកនេះ មន្ទីរសាធារណការ និងដឹកជញ្ជូនរាជធានីភ្នំពេញ បានចុះជួសជុលឡើងវិញជាបន្ទាន់តែម្តង ដើម្បីជួយសម្រួលការធ្វើដំណើរជូនប្រជាពលរដ្ឋ។
លោកសាំ ពិសិដ្ឋ ក៏បានបញ្ជាក់ផងដែរថា កំណាត់ផ្លូវបេតុងមួយខ្សែខាងលើនេះ យើងមិនមែនស្ថាបនាជាការចាក់បេតុងភ្ជាប់អោយដូចដើមវិញនោះទេ ពោលគឺយើងគ្រាន់តែចាក់ដីបំពេញ កិនបង្ហាប់ ដើម្បីដាក់អោយប្រជាពលរដ្ឋបានប្រើប្រាស់ជាបណ្តោះអាសន្នតែប៉ុណ្ណោះ ហើយបើគិតមកដល់ថ្ងៃនេះ គឺការជួសជុលផ្លូវនេះបានរួចរាល់ទាំងស្រុងហើយ ដែលអាចអោយប្រជាពលរដ្ឋធ្វើដំណើរឆ្លងកាត់បានស្រួលហើយ។
លោកសាំ ពិសិដ្ឋ បានបន្តអោយដឹងទៀតថា ចំពោះការស្ថាបនាផ្លូវនេះឡើងវិញ ដោយការចាក់បេតុងរឹងមាំនោះ រដ្ឋបាលរាជធានីភ្នំពេញ នឹងចាប់ផ្តើមបើកការដ្ឋាននៅក្នុងខែវិច្ឆិកាឬខែធ្នូ២០១៨ខាងមុខ ពោលគឺក្រោយពីទឹកបានស្រកអស់ជាស្ថាពរ។
គួររំលឹកផងដែរថាលោកឃួង ស្រេង អភិបាលនៃគណៈអភិបាលរាជធានីភ្នំពេញ រួមជាមួយមន្ត្រីពាក់ព័ន្ធ អាជ្ញាធរដែនដីកាលពីរសៀលថ្ងៃទី២១ កក្កដា និងព្រឹកថ្ងៃទី២៦ កក្កដា២០១៨នេះ បានចុះពិនិត្យមើលស្ថានភាពទឹកជំនន់ទឹកភ្លៀង និងសួរសុខទុក្ខប្រជាពលរដ្ឋ ដែលកំពុងទទួលរងការលិចលង់ផ្ទះសំបែងនៅតំបន់១ចំនួនក្នុង ខណ្ឌដង្កោ ក្រោយពីប្រជាពលរដ្ឋចំនួន២៦ភូមិ នៅក្នុងសង្កាត់ចំនួន០៩ខណ្ឌនេះ ទទួលរងការលិចលង់។ ក្រោយការពិនិត្យឃើញជាក់ស្តែងទើប លោកឃួង ស្រេង បានបញ្ជាអោយមន្ទីរសាធារណការ និងដឹកជញ្ជូនរាជធានីភ្នំពេញចុះជួសជុលឡើងវិញជាបន្ទាន់តែម្តង។
ដោយឡែកសម្រាប់ សហគមន៍អន្លង់គង ក្នុងភូមិអន្លង់គងថ្មី សង្កាត់ព្រៃសវិញ តបតាមការសន្យារបស់លោក ឃួង ស្រេង ថា នឹងស្ថាបនាផ្លូវបេតុងចំនួន៣ខ្សែរួមនឹងការដាក់លូជូនប្រជាពលរដ្ឋនោះ ខណៈនេះផ្លូវ៣ខ្សែនោះបាននិងកំពុងតែឈូសឆាយចាក់ថ្ម ស្ថាបនាហើយ៕
Source: Kampuchea Thmey Daily
0 Comments