ភ្នំពេញ ៖ ស្ថានទូតឥណ្ឌាប្រចាំកម្ពុជា បានប្រារព្ធពិធីអបអរទិវាឯករាជ្យជាតិលើកទី៧២នៃសាធារណរដ្ឋឥណ្ឌាកាលពីល្ងាចថ្ងៃទី១៥ ខែសីហា ឆ្នាំ២០១៨ នៅសណ្ឋាគារឡឺរ៉ូយ៉ាល់ភ្នំពេញ ដោយមានការអញ្ជើញចូលរួមពីសំណាក់សម្តេច ទ្រង់ អ្នកអង្គម្ចាស់ មន្ត្រីជាន់ខ្ពស់រាជរដ្ឋាភិបាលកម្ពុជា បណ្តាអង្គទូតនានា ដែលមានវត្តមាននៅក្នុងព្រះរាជាណាចក្រកម្ពុជារួមទាំងភ្ញៀវកិត្តិយសជាច្រើនកុះករ។
លោកស្រី មានីកា ជែន Manika Jain ឯកអគ្គរដ្ឋទូតឥណ្ឌាប្រចាំកម្ពុជាបានមានប្រសាសន៍ឲ្យដឹងថា កាលពី 71 ឆ្នាំមុននៅថ្ងៃនេះ ប្រទេសឥណ្ឌាបានទទួលបានសេរីភាពពីការគ្រប់គ្រងរបស់អាណានិគមនិយមអង់គ្លេស បន្ទាប់ពីបានស្ថិតក្រោមការត្រួតត្រាអស់រយៈពេលជិត 200 ឆ្នាំមកហើយ។ ថ្ងៃនេះឥណ្ឌាបានប្រារព្ធពិធីអបអរសាទរនេះដើម្បីរំលឹកដល់ចលនាជាតិដែលមិនមានអំពើហិង្សានៅក្រោមការដឹកនាំរបស់មហាត្មៈហ្គាន់ឌីសម្រាប់សេរីភាពនិងសិទ្ធិរបស់យើង។
ដោយឡែកទំនាក់ទំនងកម្ពុជា និងឥណ្ឌាលោកស្រីបានគូសបញ្ជាក់ថា រដ្ឋាភិបាលឥណ្ឌាបានបេ្តជា្ញចិត្តយ៉ាងមុតមាំដើម្បីពង្រឹងនិងពង្រីកភាពជាដៃគូរបស់ខ្លួនជាមួយប្រទេសកម្ពុជាហើយទំនាក់ទំនងនេះត្រូវបានពង្រឹង ខណៈពេលដែលសម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញទស្សនកិច្ចនៅប្រទេសឥណ្ឌាកាលពីខែមករាឆ្នាំ 2018កន្លងទៅថ្មីៗនេះ។
លោក ទេសរដ្ឋមន្ត្រី លី ធុជ តំណាងរាជរដ្ឋាភិបាលដែលបានអញ្ជើញចូលរួមជាភ្ញៀវកិត្តិយសក្នុងទិវាឯករាជ្យលើកទី៧២ របស់សាធារណរដ្ឋឥណ្ឌាបានមានប្រសាសន៍ឲ្យដឹងថា កម្ពុជា និងឥណ្ឌា បានភ្ជាប់ចំណងទំនាក់ទំនងការទូតចាប់តាំងពីឆ្នាំ ១៩៥២ ប៉ុន្តែចំណងវប្បធម៌ប្រទេសទាំងពីរបានចាប់ផ្តើមតាំងពីសម័យអង្គរមកម្ល៉េះ។លោកថា នៅពេលកម្ពុជាស្ថិតក្នុងដំណាក់កាលដ៏លំបាក បន្ទាប់ពីរបបប្រល័យពូជសាសន៍ ឥណ្ឌាគឺជាប្រទេសប្រជាធិបតេយ្យដំបូង ដែលបានលូកដៃផ្តល់ជំនួយដល់ប្រទេសកម្ពុជា។
ឆ្លៀតក្នុងឱកាសនោះ លោក ទេសរដ្ឋមន្ត្រី បានសម្តែងនូវសេចក្តីសោមនស្សចំពោះប្រទេសឥណ្ឌា ដែលនៅតែបន្តផ្តល់ជំនួយមកកម្ពុជា រហូតមកទល់សព្វថ្ងៃនេះ។ ក្នុងនោះ លោក ក៏បានថ្លែងអំណរគុណចំពោះប្រទេសឥណ្ឌា ដែលបានបញ្ជូនអ្នកសង្កេតការណ៍ ដើម្បីជាសាក្សីក្នុងការបោះឆ្នោតជ្រើសតាំងតំណាងរាស្ត្រ កាលពីថ្ងៃទី២៩ ខែកក្កដា កន្លងទៅនេះផងដែរ។
លោក ទេសរដ្ឋមន្ត្រីបានបញ្ជាក់ថា ដំណើរទស្សនកិច្ចរបស់ សម្តេចអគ្គមហាសេនាបតីតេជោ នាយករដ្ឋមន្ត្រី ទៅកាន់ទីក្រុងញ៉ូដេលី ប្រទេសឥណ្ឌាកាលពីដើមឆ្នាំនេះ បានពង្រឹង និងពង្រីកចំណងមិត្តភាពយូរអង្វែង និងកិច្ចសហប្រតិបត្តិការកាន់តែជិតស្និទ្ធ នៅក្នុងវិស័យជាច្រើន រួមមានវិស័យការពារជាតិ ពាណិជ្ជកម្ម និងវិស័យថាមពល។កិច្ចសហប្រតិបត្តិការទ្វេភាគី រវាងកម្ពុជា និងឥណ្ឌា កាន់តែជិតសិទ្ធ ស្របពេលដែលប្រទេសទាំងពីរផ្តល់ការគាំទ្រឱ្យគ្នាទៅវិញទៅមក ទាំងក្នុងតំបន់ និងក្នុងវេទិកាពហុភាគី៕
Source: Kampuchea Thmey Daily
0 Comments