មន្ត្រីការពារជាតិម្នាក់បាននិយាយកាលពីថ្ងៃព្រហស្បតិ៍ថា ក្បួនព្យុហយាត្រាយោធាមួយដែល បញ្ជាដោយលោកប្រធានាធិបតីអាមេរិក Donald Trump ត្រូវបានផ្អាករហូតដល់ឆ្នាំ២០១៩ បន្ទាប់ពីរបាយការណ៍បានបង្ហាញថា ការចំណាយបានកើនឡើងដល់ជាង៩០លានដុល្លារ។
អ្នកនាំពាក្យមន្ទីរបញ្ចកោណលោកវរសេនីយ៍ឯក Rob Manning បាននិយាយនៅក្នុងសេចក្តីថ្លែងការណ៍មួយថា “ក្រសួងការពារជាតិនិងសេតវិមានបានរៀបចំក្បួនព្យុហយាត្រាមួយដើម្បីគោរពដល់អតីតយុទ្ធជនរបស់អាមេរិកនិងរំលឹកខួបលើកទី១០០នៃសង្គ្រាមលោកលើកទី១”។
លោកបានបន្ថែមថា “យើងបានកំណត់គោលដៅពីដំបូងនៅថ្ងៃទី១០ខែវិច្ឆិកាឆ្នាំ២០១៨សម្រាប់ព្រឹត្តិការណ៍នេះប៉ុន្តែឥឡូវបានព្រមព្រៀងគ្នាស្វែងរកឱកាសនៅឆ្នាំ២០១៩វិញ”។
នៅពេលសេតវិមានប្រកាសក្នុងខែកុម្ភៈពីបំណងប្រាថ្នារបស់អគ្គមេបញ្ជាការក្នុងការរៀបចំក្បួនព្យុហយាត្រានៅទីក្រុងវ៉ាស៊ីនតោន, នាយកផ្នែកកញ្ចប់ថវិកាបាននិយាយថា វានឹងចំណាយអស់ទឹកប្រាក់ចន្លោះពី១០លានដុល្លារទៅ៣០លានដុល្លារ។
ប៉ុន្តែមន្ត្រីអាមេរិកម្នាក់បានប្រាប់ AFP កាលពីថ្ងៃព្រហស្បតិ៍ថា ទឹកប្រាក់ប៉ាន់ប្រមាណនៃផែនការនេះបានកើនឡើងដល់៩២លានដុល្លារបើទោះបីគ្មានតួលេខចុងក្រោយក៏ដោយ។
ក្បួនព្យុហយាត្រានេះត្រូវបានគ្រោងទុកសម្រាប់ទិវាអតីតយុទ្ធជននៅចុងសប្ដាហ៍នេះហើយត្រូវបានគេរំពឹងថានឹងរួមបញ្ចូលទាំងការបង្ហាញដ៏ធំអំពីកម្លាំងរបស់កងទ័ពអាកាសផងដែរ។
សំណើសម្រាប់ព្រឹត្តិការណ៍នេះបានកើតឡើងបន្ទាប់ពីលោក Trump មានការចាប់អារម្មណ៍ពីក្បួនព្យុយាត្រា Bastille Day របស់ប្រទេសបារាំងដែលជាកន្លែងលោកបានទទួលការគាំទ្រយ៉ាងខ្លាំងក្លាដោយប្រធានាធិបតីបារាំងលោក Emmanuel Macron កាលពីខែកក្កដាឆ្នាំ២០១៧។
សហរដ្ឋអាមេរិកជាធម្មតាបានរៀបចំក្បួនព្យុហយាត្រាយោធាដើម្បីកត់សម្គាល់ពីការបញ្ចប់ជម្លោះមួយដូចជានៅឆ្នាំ១៩៩១ជាដើមនៅពេលដែលលោកប្រធានាធិបតី George HW Bush បានរៀបចំក្បួនដង្ហែជ័យជំនះជាតិនៅទីក្រុងវ៉ាស៊ីនតោនដើម្បីសម្គាល់ជាការបញ្ចប់នៃសង្គ្រាមឈូងសមុទ្រជាលើកដំបូង៕ AFP
Source: Kampuchea Thmey Daily
0 Comments