ភ្នំពេញ ៖ ក្រុមជំនាញរបស់គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ចប់ការត្រួតពិនិត្យ និងផ្ទៀងផ្ទាត់លទ្ធផល នៃការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ហើយ កាលពីថ្ងៃទី០៦ ខែសីហា ឆ្នាំ២០១៨ ហើយជាលទ្ធផល ក្រុមការងាររកមិនឃើញកំហុសណាមួយពាក់ព័ន្ធ នឹងលទ្ធផលនៃការបោះឆ្នោតនោះឡើយ ហើយ គ.ជ.ប សំរេចប្រកាសលទ្ធផលបណ្តោះអាសន្ន នៅថ្ងៃទី១១ ខែសីហា ឆ្នាំ២០១៨ ខាងមុខ។
តាម គ.ជ.ប ក្រុមត្រួតពិនិត្យលទ្ធផលឡើងវិញនេះមាន៥ ក្រុម និងបានបែងចែកភារកិច្ច និងការទទួលខុសត្រូវ ត្រួតពិនិត្យ គឺក្រុមទី១, ខេត្តបន្ទាយមានជ័យ ខេត្តបាត់ដំបង ខេត្តកំពត ខេត្តកោះកុង និងខេត្តក្រចេះ។ ក្រុមទី២, ខេត្តកំពង់ចាម ខេត្តកំពង់ឆ្នាំង ខេត្តកណ្តាល ខេត្តមណ្ឌលគិរី និងខេត្តប៉ៃលិន។ ក្រុមទី៣, រាជធានីភ្នំពេញ ខេត្តព្រះវិហារ ខេត្តព្រៃវែង ខេត្តពោធិ៍សាត់ និងខេត្តកែប។ ក្រុមទី៤, ខេត្តកំពង់ស្ពឺ ខេត្តសៀមរាប ខេត្តស្ទឹងត្រែង ខេត្តស្វាយរៀង និងខេត្តឧត្តរមានជ័យ។ ក្រុមទី៥, ខេត្តកំពង់ធំ ខេត្តរតនគិរី ខេត្តព្រះសីហនុ ខេត្តតាកែវ និងខេត្តត្បូងឃ្មុំ ។
ការត្រួតពិនិត្យ និងផ្ទៀងផ្ទាត់លទ្ធផលបានចំណាយពេល៣ថ្ងៃ គឺពីថ្ងៃទី០៤ ដល់ថ្ងៃទី០៦ ខែសីហា ឆ្នាំ២០១៨ ហើយក្រុមត្រួតពិនិត្យនីមួយៗបានអនុវត្តការងារត្រួតពិនិត្យ និងផ្ទៀងផ្ទាត់របស់ខ្លួននៅចំពោះមុខតំណាងគណបក្សនយោបាយ អ្នកសង្កេតការណ៍បោះឆ្នោត និងអ្នកសារព័ត៌មាន នៅទីស្តីការ គ.ជ.ប ។ ជាលទ្ធផល ក្រុមការងារបានធ្វើការត្រួតពិនិត្យ និងផ្ទៀងផ្ទាត់លទ្ធផលឡើងវិញ ដោយមិនបានរកឃើញនូវកំហុសណាមួយពាក់ព័ន្ធនឹងលទ្ធផលនៃការបោះឆ្នោត ដែលរាជធានី ខេត្តបានបញ្ជាក់ក្នុងតារាងបូកសរុបលទ្ធផលនៃការបោះឆ្នោតក្នុងរាជធានី ខេត្ត (ទ.១១១០) កំណត់ហេតុបូកសរុបលទ្ធផលនៃការបោះឆ្នោតក្នុងរាជធានី ខេត្ត (ទ.១១១១) និងក្រដាសលទ្ធផលនៃការបោះឆ្នោតក្នុងរាជធានី ខេត្ត (ទ.១១១៤) ឡើយ។
គ.ជ.ប បានបញ្ជាក់ថា ភាគីដែលចូលរួមជាសាក្សីទាំងអស់ បានឯកភាព ជាពិសេសតំណាងគណបក្សនយោបាយ បានចុះហត្ថលេខានៅលើរបាយការណ៍ត្រួតពិនិត្យ និងផ្ទៀងផ្ទាត់ទៀតផង។ គ.ជ.ប មានយន្តការត្រួតពិនិត្យបានល្អិតល្អន់ជាច្រើនដំណាក់កាល ដើម្បីជៀសវាងការភាន់ច្រឡំ នាំឲ្យបាត់បង់ទំនុកចិត្តលើការបោះឆ្នោត។
សូមបញ្ជាក់ថា កាលពីរសៀល ថ្ងៃទី០៤ ខែសីហា ឆ្នាំ២០១៨ ក្រុមការងារជំនាញរបស់គណៈកម្មាធិការជាតិរៀបចំការបោះឆ្នោត (គ.ជ.ប) បានចាប់ផ្តើមត្រួតពិនិត្យ ផ្ទៀងផ្ទាត់ និងបូកសរុបលទ្ធផល នៃការបោះឆ្នោតជ្រើសតាំងតំណាងរាស្ត្រ នីតិកាលទី៦ ដើម្បីឈានទៅចេញផ្សាយលទ្ធផលនៃការបោះឆ្នោតនេះ ហើយការត្រួតពិនិត្យ ផ្ទៀងផ្ទាត់ ធ្វើឡើងនៅសាលសន្និសីទរបស់ គ.ជ.ប ។
ក្រុមការងារត្រួតពិនិត្យ ផ្ទៀងផ្ទាត់ និងបូកសរុបលទ្ធផល ត្រូវបានចាត់តាំងជា៤ក្រុមធំៗរួមមាន ទី១, ក្រុមសម្របសម្រួលថ្នាក់កណ្តាល ទី២, ក្រុមទទួលសម្ភារៈ ឯកសារបោះឆ្នោត ទី៣, ក្រុមកំណត់បែងចែកអាសនៈ និងទី០៤, ក្រុមត្រួតពិនិត្យលទ្ធផលឡើងវិញ ហើយក្រុមត្រួតពិនិត្យលទ្ធផលឡើងវិញ ត្រូវបានបែងចែកជា៥ ក្រុមតូចទៀត ដើម្បីជួយបំពេញការងារឲ្យកាន់តែមានប្រសិទ្ធភាព។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប ធ្លាប់បានថ្លែងថា ការផ្ទៀងផ្ទាត់ គឺជាតួនាទី និងការទទួលខុសត្រូវរបស់ គ.ជ.ប ហើយការផ្ទៀងផ្ទាត់នេះ ធ្វើឡើងតាមអ្វីដែល គ.ជ.ប បានធ្វើកន្លងមក ពីព្រោះ គ.ជ.ប ត្រូវចេញលទ្ធផលបណ្តោះអាសន្ននៅថ្ងៃទី១១ ខែសីហា ឆ្នាំ២០១៨ ខាងមុខ ដូច្នេះបើការចេញផ្សាយលទ្ធផលបណ្ដោះអាសន្ននោះ ដោយមិនមានការផ្ទៀងផ្ទាត់ត្រឹមត្រូវ អាចនឹងមានបញ្ហាខ្លះកើតឡើង ក្រោយការចេញផ្សាយលទ្ធផលនេះ។
តាមលោក ហង្ស ពុទ្ធា ការផ្ទៀងផ្ទាត់នេះ ធ្វើឡើងតាំងពីតួលេខនៅតាមការិយាល័យ ដែលបានរាប់ភ្លាមៗនៅការិយាល័យ ហើយបិទផ្សាយនៅមុខការិយាល័យ។ លោកបញ្ជាក់ថា កន្លងមកមន្ត្រីរបស់ គ.ជ.ប នៅថ្នាក់ឃុំ សង្កាត់ រាជធានី ខេត្ត បានធ្វើការផ្ទៀងផ្ទាត់រួចហើយ ប៉ុន្តែនេះ គឺជាការផ្ទៀងផ្ទាត់ ដែលធ្វើឡើងដោយ គ.ជ.ប ដូច្នេះការផ្ទៀងផ្ទាត់នេះ ក្រៅពីការផ្ទៀងផ្ទាត់តាមរយៈកុំព្យូទ័រ ក៏មានការផ្ទៀងផ្ទាត់ដោយដៃផងដែរ។ បើតាមលោក ហង្ស ពុទ្ធា ការផ្ទៀងផ្ទាត់នេះ មិនអាចកំណត់ពេលបញ្ចប់បានទេ។ ពីព្រោះការផ្ទៀងផ្ទាត់នេះ ធ្វើឲ្យត្រឹមត្រូវ និងមានតម្លាភាពជាទីបំផុត។
ដំណើរការបោះឆ្នោតជ្រើសតាំងតំណាងរាស្ដ្រ នីតិកាលទី៦ ឆ្នាំ២០១៨ បានប្រព្រឹត្តិទៅកាលពីថ្ងៃទី២៩ ខែកក្កដា ឆ្នាំ២០១៨ ដោយមានគណបក្សនយោបាយចំនួន២០ បានចូលរួម ហើយជាលទ្ធផល មានប្រជាពលរដ្ឋកម្ពុជាបានអញ្ជើញទៅបោះឆ្នោតចំនួន៦.៩៤៦.១៦៤នាក់ ដែលស្មើនឹង៨២,៨៩ ភាគរយ នៃចំនួនអ្នកមានឈ្មោះក្នុងបញ្ជីបោះឆ្នោតសរុប៨.៣៨០.២១៧នាក់។
ក្រោយការបោះឆ្នោតភ្លាម អ្នកសង្កេតការណ៍ជាតិ អន្តរជាតិបានវាយតម្លៃថា ដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៦ បានបញ្ចប់ក្រោមបរិយាកាសល្អ រលូន ត្រឹមត្រូវ សេរី និងយុត្តិធម៌ និងមានការគោរពច្បាប់ គោរពសិទ្ធិមនុស្ស គ្មានការបង្ខិតបង្ខំ គ្មានហិង្សា គ្មានការភ័យខ្លាច គ្មានការលក់ដូរសន្លឹកឆ្នោត ស្ងប់ស្ងាត់ មានសណ្ដាប់ធ្នាប់ល្អ។
ទន្ទឹមនិងការសាទរចំពោះលទ្ធផលនេះ ក៏នៅមានបណ្តឹងមួយចំនួនផងដែរ ដែលធ្វើឡើងដោយតំណាងគណបក្សនយោបាយ ដែលបានចូលរួមប្រកួតប្រជែង ហើយតបតាម គ.ជ.ប គិតត្រឹមថ្ងៃទី០១ ខែសីហា ឆ្នាំ២០១៨ ទទួលបាន២៥២៥បណ្តឹង។ ក្នុងនោះ គណបក្សប្រជាជនកម្ពុជាមានចំនួន៣បណ្តឹង គណបក្សសម្ព័ន្ធដើម្បីប្រជាធិបតេយ្យចំនួន២៥២០បណ្តឹង និងគណបក្សប្រជាធិបតេយ្យមូលដ្ឋានចំនួន២បណ្តឹង៕
Source: Kampuchea Thmey Daily
0 Comments