ភ្នំពេញ ៖ នៅក្រសួងការបរទេស និងសហប្រតិបត្តិការអន្តរជាតិកម្ពុជា កាលពីព្រឹកថ្ងៃទី៧ ខែសីហា ឆ្នាំ២០១៨ បានរៀបចំពិធីសំណេះសំណាល និងប្រគល់រង្វាន់ដល់និស្សិតជ័យលាភីថ្នាក់ជាតិ ចំនួន៤រូប ដែលបានជោគជ័យ ក្នុងប្រកួតប្រជែងការយល់ដឹងអំពីអាស៊ាន សម្រាប់ឆ្នាំ២០១៨ ដែលពិធីនេះរៀបចំឡើង ក្រោមអធិបតីភាពលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។
តាមរបាយការណ៍របស់លោក ប៉ាង ណាត អនុប្រធានគណៈកម្មាធិការវប្បធម៌ និងព័ត៌មានអាស៊ាន បានឲ្យដឹងថា នៅឆ្នាំ២០១៨នេះ ការប្រកួតប្រជែងយល់ដឹងពីអាស៊ាន មានបេក្ខជនជាសិស្សថ្នាក់ទី១១ចូលរួមចំនួន២៤រូប មកពីវិទ្យាល័យមួយចំនួនក្នុងរាជធានីភ្នំពេញ។ ក្នុងនោះមកពីសាលាឯកជនចំនួន៦ ដែលមានកម្រិតស្មើគ្នាចូលរួមផងដែរ។ ការប្រកួតប្រជែងនេះ ក្រសួងព័ត៌មានបានសហការជាមួយក្រសួងការបរទេស និងសហប្រតិបត្តិការអន្តរជាតិ ក្រសួងអប់រំយុវជន និងកីឡា និងក្រសួងវប្បធម៌ និងវិចិត្រសិល្បៈ។
តាមលោក ប៉ាង ណាត គណៈកម្មការផ្ដល់ពិន្ទុ ដែលមានសមាសភាពមកពីក្រសួងទាំង៤ បានស្រាវជ្រាវចងក្រងកម្រងសំនួរ និងចម្លើយ ដែលទាក់ទងទៅនឹងអាស៊ាន មានចំនួនជាង៥០០ សំណួរ សម្រាប់បេក្ខជនត្រៀម និងបានសម្រាំងសំណួរចម្លើយចំនួន១៥០ សម្រាប់ការប្រកួតប្រជែងនេះ។
លោកបន្តថា គណៈកម្មការរៀបចំរបស់ក្រសួងព័ត៌មាន បានរៀបចំការប្រកួតប្រជែងចំនួន៣វគ្គ គឺទី១, វគ្គជម្រុះបឋម មានចំនួន៦ក្រុម ដែលក្នុងក្រុមនីមួយៗ មានបេក្ខជនចំនួន ៤នាក់។ ទី២, វគ្គជម្រុះពាក់កណ្ដាល មាន២ក្រុម ក្នុងក្រុមនីមួយៗមានបេក្ខជនចំនួន៣នាក់។ ទី៣, វគ្គផ្ដាច់ព្រ័ត្រ មាន១ក្រុម ដែលមានបេក្ខជនចំនួន៤នាក់ ហើយវគ្គនេះ គឺជាការប្រកួតប្រជែងជ្រើសរើសជ័យលាភីលេខ១ លេខ២ លេខ៣ និងលេខ៤ ដើម្បីត្រៀមចូលរួមប្រកួតប្រជែងថ្នាក់តំបន់។
ឆ្លងតាមរយៈការប្រកួតប្រជែងនេះ ជ័យលាភីលេខ១ បានទៅលើយុវតី សុង វិរីកា ជាសិស្សថ្នាក់ទី១១ មកពីសាលាខណ្ឌ west Stern អន្តរជាតិ, ជ័យលាភីលេខ២ បានទៅលើយុវតី ឃាង សុជីវី ជាសិស្សថ្នាក់ទី១១ មកពីសាលាអន្តរជាតិសឹង្ហបុរី, ជ័យលាភីលេខ៣ បានទៅលើយុវតីយ៉ុង សុវិចារ សិស្សថ្នាក់ទី១១ មកពីវិទ្យាល័យ ជា ស៊ីម សន្ធរមុខ, ជ័យលាភីលេខ៤ បានទៅលើយុវសិស្សឈ្មោះ គួយ សុខមាន ជាសិស្សថ្នាក់ទី១១ មកពីវិទ្យាល័យបឹងត្របែក ហើយជ័យលាភីចំនួន៣រូប គឺលេខ១ លេខ២ និងលេខ៣ និងចេញទៅចូលរួមប្រកួតប្រជែងយល់ដឹងពីអាស៊ានថ្នាក់តំបន់នៅប្រទេសឥណ្ឌូនេស៊ី នាខែធ្នូ ឆ្នាំ២០១៨ខាងមុខ។
លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា ដែលជាអធិបតីក្នុងពិធីនោះបានអបអរសាទរចំពោះជ័យលាភីទាំង៤រូប និងបានអះអាងថា សិស្ស និស្សិតរបស់កម្ពុជាយើងកំពុងមានការយល់ដឹងពីអាស៊ានខ្ពស់ ហើយនៅក្នុងការប្រកួតប្រជែងនាខែធ្នូខាងមុខ បេក្ខជនយើង នឹងបានជួបជាមួយបេក្ខជនមកពីបណ្តាប្រទេសផ្សេងៗជាច្រើនទៀត ហើយការប្រកួតប្រជែងនេះ មានលក្ខណៈតឹងតែង ដូច្នេះត្រូវតែមានការត្រៀមលក្ខណៈឲ្យបានល្អ។
ជាមួយនឹងការលើកឡើងខាងលើនេះ លោកទេសរដ្ឋមន្ត្រី ប្រាក់ សុខុន ក៏បានលើកឡើងពីប្រវត្តិមួយទាក់ទងអាស៊ាន ជាពិសេសកិច្ចប្រជុំអាស៊ាននៅប្រទេសសឹង្ហបុរី ដែលទើបតែបញ្ចប់កាលពីថ្មីៗនេះ ដើម្បីជាទុនមួយក្នុងការសូលរួមប្រកួតប្រជែងនាពេលខាងមុខ៕
Source: Kampuchea Thmey Daily
0 Comments