សៀមរាប ៖ ស្តាប់ចម្លើយសារភាពរបស់ ជនសង្ស័យឈ្មោះ អ៊ុច ចាន់ណា ហៅជីវ ដែលឈានដល់ការអារ.កសម្លាប់បុរសវ័យចំណាស់ម្នាក់ នៅស្រុកសូទ្រនិគម កាលពីវេលាម៉ោង២០និង២០នាទីថ្ងៃទី០៥ ខែសីហា ឆ្នាំ២០១៨ នោះគឺបណ្តាលមកពីផឹកស៊ីស្រវឹងទាស់ពាក្យសម្តីគ្នា។
នគរបាលជំនាញបានបង្ហាញឲ្យដឹងនៅថ្ងៃទី០៧នេះថា កន្លងមកជនសង្ស័យ ធ្លាប់បានទៅធ្វើកម្មករអារឈើនៅរោងចក្រ ទួលឡូវ ស្ថិតក្នុងឃុំស្វាយទាប ស្រុកចំការលើ ខេត្តកំពង់ចាម ថៅកែឈ្មោះ ស៊ី ថា ហើយបានមកលេងផ្ទះរហូតដល់ថ្ងៃទី០៤ ខែសីហា ឆ្នាំ២០១៨ ខ្លួនបានទៅបើកលុយបាន៥០០០០០(ហាសិបម៉ឺនរៀល)ហើយនៅថ្ងៃទី០៥ ខែសីហា ខ្លួនបានមកដល់ផ្ទះវិញ និងបានឲ្យលុយទៅម្តាយ១៥០០០០រៀលសល់ប៉ុន្មានទុកខ្លួនឯង ពេលល្ងាចឈ្មោះ អ៊ុច វិចិត្រ ហៅទូច ជាបងរបស់ខ្លួនបានទិញស្រាស មកផឹកជាមួយមិត្តភក្តិគាត់ ខ្លួនក៏ផឹកជាមួយរហូតដល់ម៉ោង៨និង១៥នាទីយប់ ពេលខ្លួនកំពុងអង្គុយលើគ្រែក្រោមផ្ទះដូចជាឮសំឡេងស្រែកពីផ្ទះឈ្មោះ ខ្វាន់(ជនរងគ្រោះ)ខ្លួនក៏ស្រែកតទៅវិញ បន្ទាប់មកខ្លួនដូចជាខឹងក៏ក្រោកទៅយកកាំបិតពីរោងបាយរត់តម្រង់ទៅក្រោមផ្ទះឈ្មោះខ្វាន់ ពេលទៅដល់ក៏បើកមុងចាប់ទាញសក់ក្បាលអារ.ក រហូតដល់ស្លាប់តែម្តង ទើបឃើញម្តាយនិងបងប្រុសខ្លួនរត់ទៅដល់ដណ្តើមដកយកកាំបិត ពេលនោះខ្លួនបានរត់មកផ្ទះឡើងយកខោ អាវនិងទូរស័ព្ទ ហើយរត់ទៅកើតបត់ឡើងដល់ផ្លូវជាតិលេខ៦ចូលផ្ទះឈ្មោះ យ៉ន ភេទស្រី ប្រាប់គាត់ថាខ្លួនមានរឿងធំហើយ ហើយក៏បន្តដំណើរទៅដល់ភូមិ បឹងវៀន ឃុំតាយ៉ែក បានចូលផ្ទះឈ្មោះ ណាត់ ភេទប្រុសដេកលេងអង្រឹងក្រោមផ្ទះរហូតដល់ម៉ោង៤ ទៀបភ្លឺបានឲ្យឈ្មោះណាត់ជួយជូនទៅសៀមរាបរកការងារធ្វើដោយមិនបានប្រាប់ថា ខ្លួនសម្លាប់គេនោះទេ ប៉ុន្តែឈ្មោះណាត់ថា គេរវល់មិនជូនដល់សៀមរាបទេ ជូនបានត្រឹមដំដែកខ្លួនក៏ព្រម ពេលនោះឈ្មោះណាត់បានដឹកមកដល់ដំដែកឈប់នៅមុខមន្ទីរពេទ្យចាំកាក់ឡានក្រុងជិះទៅសៀមរាប ពេលទៅដល់សៀមរាបបានជិះតាក់ស៊ីទៅស្វាយស៊ីសុផុនបន្តទៀត ពេលដល់ស្វាយ បានជិះម៉ូតូឌុបទៅផ្ទះឪពុកមាឈ្មោះសោម សំ នៅភូមិ គុត្តសតក្នុង ឃុំគុត្តសត ស្រុកអូរជ្រៅ ខេត្តបន្ទាយមានជ័យ គិតថាបន្តដំណើរទៅថៃទៀតប៉ុន្តែត្រូវសមត្ថកិច្ចយើងទៅទាន់ឃាត់ខ្លួនតែម្តង។
សូមរម្លឹកថា មានហេតុការណ៍ឃាតកម្មនៅវេលាម៉ោង២០និង២០នាទីយប់ ថ្ងៃអាទិត្យទី០៥ ខែសីហាឆ្នាំ២០១៨ ស្ថិតនៅភូមិថ្នល់ចែក ឃុំកៀនសង្កែ ស្រុកសូទ្រនិគម ដែលបង្កឡើងដោយជនសង្ស័យ ឈ្មោះអ៊ុច ចាន់ណា ភេទប្រុស អាយុ២៤ឆ្នាំបាន អារ.កសម្លាប់ ដោយកាំបិតបុ័ងតោទៅលើជនរងគ្រោះ ឈ្មោះឈិត ខ្វាន់ភេទប្រុស អាយុ៥៥ឆ្នាំ មានទីលំនៅភូមិឃុំ កើតហេតុខាងលើ។
បច្ចុប្បន្នកម្លាំងនគរបាលជំនាញរៀបចំសំណុំរឿង បញ្ជូនមកតុលាការនៅរសៀលថ្ងៃទី០៧ខែសីហា ឆ្នាំ២០១៨នេះ៕
Source: Kampuchea Thmey Daily
0 Comments