កណ្តាល ៖ ភ្ញៀវរត់ជាន់ជើងគ្នា ឯពលរដ្ឋរស់នៅជិតៗនោះ រំខានដំណេកអស់ ដោយសារតែសំឡេងគប់ដបគប់កែវដាក់គ្នាពីសំណាក់យុវជន២ក្រុមមកផឹកស៊ីនៅហាងអឹម ដឺ បេសហ្វូត ព្រោះតែរឿងមើលមុខគ្នា។ អំពើហិង្សាទៅវិញទៅមកនេះមានអ្នកចាញ់បែកក្បាលហូរឈាមជោកខ្លួនឯអ្នកឈ្នះឡើងជិះម៉ូតូគេចខ្លួនបាត់។
ហេតុការណ៍ហិង្សាបង្កការ ភ្ញាក់ផ្អើលនេះ បានកើតឡើងនៅវេលាម៉ោង២២និង៣០នាទីយប់ ថ្ងៃទី០៦ ខែសីហា ឆ្នាំ២០១៨ នៅចំណុចក្នុង ហាង អឹម ដឺ បេសហ្វូត (PUB) ស្ថិតនៅក្រោយវិទ្យាល័យសេរីភាព ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល។
បើតាមសាក្សីឲ្យដឹងថា ភាគីអ្នកចាញ់មានម្នាក់របួសធ្ងន់ឈ្មោះហ៊ឹម វិថៃ ភេទប្រុស អាយុ២៦ឆ្នាំ រស់នៅភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្តាល។ ចំណែកអ្នកឈ្នះ(ក្រុមបង្ក)មានគ្នាច្រើនមិនទាន់ស្គាល់អត្តសញ្ញាណបានជិះម៉ូតូគេចខ្លួនបាត់។
សាក្សីបានរៀបរាប់ ឲ្យដឹងទៀតថា នៅមុនពេលកើតហេតុ មានយុវជនពីក្រុម ដោយក្រុមជនរងគ្រោះមានគ្នាបីនាក់ និងក្រុមជនបង្កមានគ្នាច្រើនបានធ្វើដំណើរមកចូលផឹកស៊ីនៅហាងខាងលើ។ លុះមួយសន្ទុះក្រោយមកក្រុមទាំងពីរបានមើលមុខគ្នា និយាយឌឺដង ទាក់មាត់គ្នា ស្រាប់តែក្រុមទាំងពីរបានបើកឆាកប្រយុទ្ធគ្នា ដោយយកកែវនិងដបស្រា ទាញគប់គ្នា ហើយបានវាយគ្នាទៅវិញទៅមក ដោយក្រុមជនបង្កបានព្រួតគ្នា វាយនិងគប់កែវទៅលើក្រុមជនរងគ្រោះ បណ្តាលឲ្យបុរសម្នាក់បែកក្បាល រយះជាច្រើនកន្លែង ហូរឈាមស្រោចពេញខ្លួន បង្កឲ្យមានការភ្ញាក់ផ្អើលជាខ្លាំង។
បន្ទាប់មកក្រុមជនបង្កបានឡើងលើម៉ូតូនាំគ្នាជិះរត់គេចខ្លួនបាត់បន្សល់នៅតែភាគីអ្នកចាញ់របួសម្នាក់ឈាមហូរជោកខ្លួន ទុកឲ្យសមត្ថកិច្ចបញ្ជូនទៅកាន់មន្ទីរពេទ្យ។
សូមបញ្ជាក់ថា ទីតាំងហាងផឹកស៊ីយីហោ អឹម ដឺបេសហ្វូត នេះកើតមានអំពើហិង្សាវាយតប់ជាញឹកញាប់បង្កការភ្ញាក់ផ្អើលទាំងកណ្តាលយប់ដូច នៅថ្ងៃទី២៥ កក្កដា ២០១៨ វេលាម៉ោង១១និង៣០នាទីយប់ នៅក្នុងហាង អឹម ដឺបេស ហ្វូតក្រុមក្មេងស្ទាវពីក្រុមបានផឹកស៊ីនៅក្នុងហាង បានបង្កជម្លោះវាយតប់គ្នាទៅវិញទៅមក បង្កការភ្ញាក់ផ្អើលដល់សមត្ថកិច្ចក្រុងតាខ្មៅ ចុះទៅជួយអន្តរាគមន៍។
ប្រជាពលរដ្ឋរស់នៅជុំវិញ ទីតាំងហាង អឹម ដឺ បេសហ្វូត (PUB) នេះបាននិយាយថា ហាងនេះបង្កហិង្សាវាយគ្នាស្ទើរជារៀងរាល់យប់តែម្តង ពេលដែលចាប់ផ្តើមបើកហាងនោះ ហើយបើនិយាយពីសម្លេងបាស់វិញគឺក្រុមម្ចាស់ហាងទាំងនោះបើកសម្លេងឮៗរកតែពួកគាត់ដេកពុំបានទេ។ ពួកគាត់បានសំណូមពរទៅដល់អាជ្ញាធរមានសមត្ថកិច្ចមេត្តាជួយមានវិធានការកុំឲ្យមានការវាយតប់គ្នា និងសុំឲ្យម្ចាស់ហាងអស់ទាំងនោះ បើកសម្លេងតិចៗផង ពីព្រោះបើកតាំងពីម៉ោង១៩យប់ទៅដល់ម៉ោង២ទៀបភ្លឺក៏មានដែរ៕
Source: Kampuchea Thmey Daily
0 Comments