តាកែវ ៖ ជនសង្ស័យជួញដូរនិងប្រើប្រាស់សារធាតុញៀនដោយខុសច្បាប់០៥នាក់ ត្រូវបានកម្លាំងជំនាញនៃស្នងការខេត្តតាកែវ កសាងសំណុំរឿងបញ្ជូនឡើងតុលាការ ដោយឡែកស្ត្រីរកស៊ីបម្រើផ្លូវភេទ៣នាក់ ត្រូវបានដោះលែង។
ការបញ្ជូនខ្លួនជនសង្ស័យទាំង០៥នាក់ឡើងតុលាការ ពាក់ព័ន្ធនឹងគ្រឿងញៀននេះ ធ្វើឡើងនៅព្រឹកថ្ងៃទី០៧ ខែសីហា ឆ្នាំ២០១៨ ដោយកម្លាំងនគរបាលការិយាល័យប្រឆាំងគ្រឿងញៀនក្រោយពីការចុះបង្ក្រាបបាន កាលពីប៉ុន្មានថ្ងៃមុននៅស្រុកសំរោង។
លោកវរសេនីយ៍ទោ ម៉ាក់ សេរីវឌ្ឍនា នាយការិយាល័យប្រឆាំងគ្រឿងញៀន បានឲ្យដឹងថា ដោយអនុវត្តន៍តាមការណែនាំនិងបញ្ជាផ្ទាល់ពីសំណាក់លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវនិងមានការសម្របសម្រួលពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ កាលពីនៅថ្ងៃអាទិត្យថ្ងៃទី០៥ ខែសីហា ឆ្នាំ២០១៨ វេលាម៉ោង១៥និង២០នាទី កម្លាំងជំនាញប្រឆាំងគ្រឿងញៀននៃស្នងការដ្ឋាននគរបាលខេត្តតាកែវ សហការជាមួយកម្លាំងជំនាញអធិការដ្ឋាននគរបាលស្រុកសំរោង បានចុះបង្ក្រាបមុខសញ្ញាជួញដូរសារធាតុញៀន និង ទីតាំងបម្រើសេវាផ្លូវភេទនៅចំណុចផ្ទះឈ្មោះ ប៉ូ សុខលី ភេទស្រី ស្ថិតនៅក្នុងភូមិពោធិ៍ ឃុំខ្វាវ ស្រុកសំរោង ខេត្តតាកែវ។ ទីតាំងទី១ក្នុងកិច្ចប្រតិបត្តិការនេះ សមត្ថកិច្ចឃាត់ខ្លួនជនសង្ស័យបានចំនួន០៦នាក់ ដែលមានឈ្មោះ ទី១.ឈ្មោះ ប៉ូ សុខលី ភេទស្រី អាយុ៦០ឆ្នាំ រស់នៅភូមិពោធិ៍ ឃុំខ្វាវ ស្រុកសំរោង ខេត្តតាកែវ ដកហូតបានម្សៅក្រាមពណ៌សថ្លាចំនួន១៤៥កញ្ចប់តូច។ ទី២.ឈ្មោះ កុយ វណ្ណៈ ភេទប្រុស អាយុ៣៥ឆ្នាំ រស់នៅភូមិ៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ និង៣.ឈ្មោះ សាន់ ស្រីគុន ភេទស្រី អាយុ១៥ឆ្នាំ រស់នៅភូមិ៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ព្រមទាំងដកហូតបានម្សៅក្រាមពណ៌សថ្លាចំនួន១៤កញ្ចប់តូចនិងឃាត់ខ្លួនស្ត្រីរកស៊ីបម្រើសេវាផ្លូវភេទចំនួន០៣នាក់។
លោកវរសេនីយ៍ទោបន្តថា បន្ទាប់ពីធ្វើការសាកសួរកម្លាំងជំនាញបានឈានទៅបង្ក្រាបទីតាំងទី០២នៅវេលាម៉ោង១៦និង៥០នាទី នៅចំណុចផ្ទះឈ្មោះ ស៊ុំ បុល ស្ថិតនៅភូមិស្វាយរុន ឃុំជំរះពេន ស្រុកសំរោង ខេត្តតាកែវ និងឃាត់ខ្លួនបានជនសង្ស័យបានចំនួន០២នាក់បន្ថែមទៀត ដែលមានឈ្មោះ ៖ ទី១.ឈ្មោះ ប៉ូ សុខលីម ភេទស្រី អាយុ៤០ឆ្នាំ រស់នៅភូមិស្វាយរុន ឃុំជំរះពេន ស្រុកសំរោង និងទី២.ឈ្មោះ ស៊ុំ បុល ភេទប្រុស អាយុ៤៣ឆ្នាំ រស់នៅភូមិស្វាយរុន ឃុំជំរះពេន ស្រុកសំរោង ខេត្តតាកែវ ព្រមទាំងដកហូតបានម្សៅក្រាមពណ៌សថ្លាចំនួន២០កញ្ចប់តូច ជញ្ជីងសម្រាប់ថ្លឹងថ្នាំញៀន០១ និងម៉ូតូ០១គ្រឿងផងដែរ។
លោកវរសេនីយ៍ទោបានបញ្ជាក់ថា ក្នុងកិច្ចប្រតិបត្តិការបង្ក្រាបករណីខាងលើនេះកម្លាំងជំនាញបានឃាត់ខ្លួនជនសង្ស័យចំនួន០៨នាក់ ដកហូតវត្ថុតាងម្សៅក្រាម ពណ៌សថ្លា បានសរុបចំនួន១៧៩កញ្ចប់តូច ម៉ូតូ០១គ្រឿង និងជញ្ជីងសម្រាប់ថ្លឹងថ្នាំញៀន០១។
បច្ចុប្បន្នជនសង្ស័យជាប់ពាក់ព័ន្ធនឹងថ្នាំញៀនចំនួន០៥នាក់ និង វត្ថុតាងត្រូវបានកម្លាំងជំនាញបញ្ជូនខ្លួនទៅសាលាដំបូងខេត្តតាកែវចាត់ការតាមនីតិវិធី ចំណែកស្ត្រីរកស៊ីបម្រើសេវាផ្លូវភេទចំនួន០៣នាក់ ដោយយោងតាមការស្តាប់ចម្លើយឃើញថា ពុំមានការពាក់ព័ន្ធជាមួយបទល្មើសគ្រឿងញៀន និង មានការឯកភាពពីលោកឧត្តមសេនីយ៍ទោ ស្នងការនគរបាលខេត្ត ព្រមទាំងបានការអនុញ្ញាតិពីលោកព្រះរាជអាជ្ញា ផងនោះក៏បានដោះលែងឲ្យវិលត្រលប់ទៅលំនៅឋានវិញហើយ៕
Source: Kampuchea Thmey Daily
0 Comments