ការដ្ឋានដាក់លូទំហំ១ម៉ែត្រកន្លះនៅភូមិប៉ប្រ៉កខាងជើង ខណ្ឌពោធិ៍សែនជ័យ និងភូមិរោងចក្រខណ្ឌសែនសុខ បានបញ្ចប់១០០ភាគរយហើយ
ភ្នំពេញ ៖ ការដ្ឋានដាក់លូទំហំ១ម៉ែត្រកន្លះនៅភូមិប៉ប្រកខាងជើង សង្កាត់កាកាប ខណ្ឌពោធិ៍សែនជ័យ និងភូមិរោងចក្រ សង្កាត់គោកឃ្លៀង ខណ្ឌសែនសុខ គិតមកដល់ថ្ងៃទី០៧ ខែសីហា ឆ្នាំ២០១៨នេះ បានបញ្ចប់១០០ភាគរយហើយ ដើម្បីរំដោះទឹកជូនប្រជាពលរដ្ឋនៅតំបន់នេះ។
មន្ត្រីនៃមន្ទីរសាធារណការ និងដឹកជញ្ជូនរាជធានីភ្នំពេញបានឱ្យដឹងថា អនុវត្តតាមការបញ្ជាដឹកនាំពីលោកឃួង ស្រេងអភិបាលរាជធានីភ្នំពេញ មន្ទីរសាធារណការនិងដឹកជញ្ជូនរាជធានីភ្នំពេញ បានបើកការដ្ឋានដាក់លូមួយខ្សែ ដោយចាប់ពីភូមិប៉ប្រកខាងជើង ស្របផ្លូវរថភ្លើងបត់កាត់ផ្លូវរថភ្លើងតាមផ្លូវបេតុ៤២Pឆ្ពោះមកប្រឡាយអូរអាគុជ ហើយមកដល់ថ្ងៃនេះ ការដ្ឋានដាក់លូទំហំ ១.៥ម៉ែត្រភ្ជាប់ពីប្រឡាយស្របផ្លូវរថភ្លើងនៅភូមិប៉ប្រកខាងជើងដោយឆ្លងកាត់ផ្លូវរថភ្លើង ទៅភ្ជាប់ប្រឡាយអូរអាគុជក្នុងខណ្ឌសែនសុខនេះ បានបញ្ចប់ ១០០%ហើយ។ សង្ឃឹមថា តំបន់សង្កាត់កាកាបទី១ដែលធ្លាប់រងការលិចលង់ដោយទឹកភ្លៀងកន្លងមក នឹងកាត់បន្ថយបានការលិចលង់បានយ៉ាងច្រើន។
មន្ត្រីដដែល បានបញ្ជាក់ថា ការដ្ឋាននេះ បានចាប់ផ្តើមកាលពីថ្ងៃទី២១ ខែមិនា ឆ្នាំ២០១៨ ហើយគ្រោងបញ្ចប់នៅខែសីហា២០១៨។ អត្ថប្រយោជន៍នៃគម្រោងនេះ គឺពិតជាបានកាត់បន្ថយទឹកជំនន់ទឹកភ្លៀង និងទឹកកខ្វក់នៅភូមិបប្រ៉កខាងជើង សង្កាត់កាកាបនៃខណ្ឌពោធិសែនជ័យ និងភូមិរោងចក្រសង្កាត់គោកឃ្លៀងនៃខណ្ឌសែនសុខ៕
Source: Kampuchea Thmey Daily
0 Comments