សួង សាខារ៉ានីត រីកមុខដូចគ្រាប់ជី នាឱកាសថ្ងៃខួបកំណើតលើករាសី

ភ្នំពេញ ៖ តារាសម្ដែងសម្តីផ្អែមមានមន្តស្នេហ៍កញ្ញា សួង សាខារ៉ានីត កាលពីរាត្រីថ្ងៃទី០៦ ខែសីហា ឆ្នាំ២០១៨ កន្លងមកនេះ បានរៀបចំពិធីជប់លៀងអបអរថ្ងៃខួបកំណើត និងមួយផ្នែកទៀតក៏ដើម្បីលើករាសីរបស់ខ្លួនផងដែរ។ ខណៈអាជីពសិល្បៈសព្វថ្ងៃកំពុងទទួលបានការចាប់អារម្មណ៍ និងគាំទ្រច្រើនពីមហាជន។

ពិធីជប់លៀងខួបកំណើតរបស់តារាសម្តែងរូបស្រស់កញ្ញា សួង សាខារ៉ានីត នេះបានធ្វើឡើងនៅឯភោជនីយដ្ឋានវីហ្វ្រេន ដែលមានទីតាំងម្តុំបឹងត្របែក ដោយមានការអញ្ជើញភ្ញៀវចូលរួមពីសំណាក់តារាចម្រៀងនិងសម្តែងល្បីៗជាច្រើនបង្កឲ្យមានភាពសប្បាយរីករាយខ្លាំង។ មិនតែប៉ុណ្ណោះគេក៏សង្កេតឃើញសាមីខ្លួនកញ្ញា សួង សាខារ៉ានីត បង្ហាញពីទឹកមុខញញឹមស្ទើរបិទមាត់មិនជិតទៀតផង។

តាមការកត់សម្គាល់វត្តមានភ្ញៀវសិល្បៈដែលបានបង្ហាញវត្តមានចូលរួមអបអរថ្ងៃខួបកំណើតស្រីស្រស់ សួង សាខារ៉ានីត រួមមាន ៖ តារាកំប្លែងនាយ ពែកមី ,លោក ប៉ែន ចំរ៉ុង ,លោក រតនៈ ពិសិដ្ឋ ,កញ្ញា ថន លក្ខិណា ,កញ្ញា សាន សុម៉ាលី ,កញ្ញា គង់ ចាន់រដ្ឋា ,តារាកូនភ្លោះលោក ស៊ិន សុភា ,លោក សាយ សៀរ៉ា,លោក ប៊ី អាយជី ,លោក អ៊ឹម ជីវ៉ា ,លោក ម៉ា ដូណា រួមនឹងវត្តមានតារាសិល្បៈល្បីៗមួយចំនួនទៀត។

បើតាមការប្រាប់ឲ្យដឹងពីសំណាក់សាមីខ្លួនតារាសម្តែងស្រីកំពុងច្បាមបានឱកាសសម្តែងលើទីផ្សារសិល្បៈកញ្ញា សួង សាខារ៉ានីត បានលើកឡើងទាំងទឹកមុខញញឹមថា ចំពោះការរៀបចំធ្វើពិធីជប់លៀងខួបកំណើតរបស់នាងឆ្នាំនេះគឺតាមគម្រោងបានអញ្ជើញភ្ញៀវត្រឹមតែ១៨តុតែប៉ុណ្ណោះ។ប៉ុន្តែបើតាមការសង្កេតជាក់ស្តែងចំនួននេះ អាចកើតឡើងរហូតដល់ជាង២០តុដោយហេតុថាភ្ញៀវដែលបានអញ្ជើញគឺបង្ហាញវត្តមានចូលរួមច្រើន។

កញ្ញា សួង សាខារ៉ានីត បានបន្ថែមថា ពិធីជប់លៀងអបអរខួបកំណើតនេះគឺធ្វើឡើងក្នុងគោលបំណងដើម្បីលើករាសីហើយម្យ៉ាងវិញទៀតក៏ដើម្បីជាការជួបជុំបង្កើនមិត្តភាពសប្បាយរីករាយរវាងមិត្តភក្តិនិងអ្នកសិល្បៈរួមអាជីពការងារជាមួយគ្នា។ ដោយឡែកចំពោះការចំណាយអស់ចំនួនទឹកប្រាក់ប៉ុន្មាននោះមិនត្រូវបានសាមីខ្លួនកញ្ញា សួង សាខារ៉ានីត បញ្ជាក់ឲ្យដឹងនោះទេ៕