ភ្នំពេញ ៖ ក្រសួងអប់រំយុវជន និងកីឡាសហការជាមួយក្រសួងការងារ និងបណ្តុះបណ្តាលវិជ្ជាជីវៈក្រោមជំនួយឧបត្ថម្ភបច្ចេកទេស និងថវិកាពីអង្គការយូណេស្កូ និងក្រុមហ៊ុនស្មាត បានបង្កើតកម្មវិធីសមមូលអប់រំកម្រិតមូលដ្ឋានដើម្បីផ្តល់ការអប់រំនិងបណ្តុះបណ្តាលមុខជំនាញផ្សេងៗដល់យុវជនដែលបោះបង់ការសិក្សានៅកម្រិតអនុវិទ្យាល័យទទួលបានជំនាញនិងបំណិនជីវិត។
ថ្លែងនៅក្នុងពិធីដាក់ឲ្យអនុវត្តសាកល្បងគម្រោងកម្មវិធីសមមូលអប់រំកំរិតមូលដ្ឋានកាលពីព្រឹកថ្ងៃទី៨ ខែសីហា ឆ្នាំ២០១៨ នៅសណ្ឋាគារភ្នំពេញ លោក ចឹក លីម អគ្គនាយករងយុវជននៃក្រសួងអប់រំយុវជននិងកីឡាបា នមានប្រសាសន៍ថា គម្រោងកម្មវិធីសមមូលអប់រំកម្រិតមូលដ្ឋាននេះ គឺតម្រូវឲ្យយុវជនសិក្សាតាមរយៈថេបប្លែកដែលមានបញ្ចូលកម្មវិធីសិក្សារួចជាស្រេចដែលមានមុខវិជ្ជាចំនួន១១ក្នុងនោះមានមុខវិជ្ជាគោលសំខាន់ពីរគឺគណិតវិទ្យាកម្រិតទី១ និងភាសាខ្មែរដោយរៀនមិនកំណត់ម៉ោងនិងពេលវេលានោះទេគឺអាស្រ័យទៅលើសិស្សម្នាក់ៗប៉ុណ្ណោះ។
លោកបានបន្តទៀតថា ក្រៅពីនេះយុវជនអាចសិក្សាទៅលើមុខវិជ្ជាឯកទេសមួយចំនួនទៀតផងដែរដូចជាទេស ចរណ៍ សហគ្រិនភាព ភាសាអង់គ្លេសនិងបច្ចេកវិទ្យាព័ត៌មាន។បន្ទាប់មកយុវជនក៏អាចបន្តការសិក្សាមុខវិជ្ជារូបវិទ្យា គីមីវិទ្យា គណិតវិទ្យាកំរិតទី២ និងមុខវិជ្ជាទាក់ទិននឹងឥរិយាបថនៅក្រសួងការងារផងដែរ។
តែយ៉ាងណាក៏ដោយលោកបានឲ្យដឹងទៀតថា កម្មវិធីនេះទាមទារឲ្យសិស្សធ្វើតេស្តប្រឡងជាមុនសិនមុននឹងទទួលបានសញ្ញាបត្រកំរិតថ្នាក់ទី៩។
លោក ចឹក លីម បានអំពាវនាវឲ្យយុវជនដែលបោះបង់ការសិក្សា ដែលមានបំណងចង់ចូលរួមការសិក្សានៅក្នុងកម្មវិធីនេះអាចមកចុះឈ្មោះដោយឥតគិតថ្លៃនៅមជ្ឈមណ្ឌលយុវជនជាតិសម្រាប់ខេត្តសៀមរាបនិងវិទ្យាស្ថានបច្ចេកវិទ្យាកម្ពុជាសម្រាប់ភ្នំពេញ។
លោកសាន់តូសតំណាងអង្គការយូណេស្កូប្រចាំនៅកម្ពុជាបានគាំទ្រចំពោះកម្មវិធីនេះព្រោះថា នឹងជួយឲ្យយុវជនដែលបោះបង់ការសិក្សាអាចទទួលបាននូវឱកាសការសិក្សាបន្តនៅកម្រិតវិទ្យាល័យក៏ដូចជាសិក្សាជំនាញផ្សេងៗដើម្បីទទួលបានចំណេះដឹង ឥរិយាបថនិងសមត្ថភាពគ្រប់គ្រាន់ក្នុងការមានការងារធ្វើនៅពេលរៀនចប់។
លោក ហង់ជួនណារ៉ុន រដ្ឋមន្ត្រីក្រសួងអប់រំយុវជន និងកីឡាបានមានប្រសាសន៍ថាកម្មវិធីនេះគឺជាការផ្តល់ឱកាសលើកទី២ដល់យុវជនដែលបានបោះបង់ការសិក្សាសម្រាប់បន្តការសិក្សាហើយអាចបន្តទៅថ្នាក់បណ្តុះបណ្តាលបច្ចេកទេសនិងវិជ្ជាជីវៈ ដែលនឹងជួយពួកគេក្នុងការបង្កើនសមត្ថភាពក៏ដូចជាប្រាក់ចំណូល។
លោករដ្ឋមន្ត្រីបានជំរុញឲ្យអគ្គនាយកដ្ឋានយុវជនត្រូវសហការជាមួយក្រសួងការងារ និងបណ្តុះបណ្តាលវិជ្ជាជីវៈអង្គការយូណេស្កូ និងក្រុមហ៊ុនស្មាតឲ្យបានល្អដើម្បីអភិវឌ្ឍន៍សមត្ថភាពនិងឱកាសជាថ្មីកាន់តែសម្បូរបែបដែលជាតម្រូវការរបស់យុវជនក្រៅសាលានៅទូទាំងប្រទេសបន្ថែមទៅលើឱកាសដែលមានស្រាប់។
គួរបញ្ជាក់ថាកម្មវិធីសមមូលអប់រំកំរិតមូលដ្ឋាននេះនឹងចាប់ផ្តើមអនុវត្តពីពេលនេះរហូតដល់ឆ្នាំ២០១៩ខាងមុខនេះដែលជំហានដំបូងអនុវត្តនៅខេត្តសៀមរាបនិងភ្នំពេញ៕
Source: Kampuchea Thmey Daily
0 Comments