ណា​ម​ម៉ូ​រ៉ា​ក់ ​និង​កូយ​ឡាយ​ជ្រុះ​ធ្លាក់ ខណៈ​ពុទ្ធ​សំបូរ​និង​លិញ​ភា​រម្យ​ឡើង​ទៅ​ជុំ​ទី​៣

ណា​ម ម៉ូ​រ៉ា​ក់ អ្នក​ប្រដាល់​ក្លិប​ពន្លឺ​សាមគ្គី​ខេត្តបាត់ដំបង​និង​កូយ ឡាយ អ្នក​ប្រដាល់​ក្លិប​កងពលតូច​ទ័ព​ឆ័​ត្រ​យោង​៩១១ បាន​ជ្រុះ​ធ្លាក់​ហាលអាវ​ត្រឹម​ជុំ​ទី​២ បន្ទាប់ពី​ប្រកួត​ចាញ់​ក្នុង​ជម្រុះ​ជុំ​ទី​២​ដណ្តើម​ពាន​រង្វាន់​ជើងឯក​TV5 Knock Out Series by K.Cement ទម្ងន់​៦០​គីឡូក្រាម កាលពី​យប់​ថ្ងៃទី​២៥​សីហា​២០១៨។

​ម៉ូ​រ៉ា​ក់ គេ​វាយ​ចាញ់​ពុទ្ធ សំបូរ អ្នក​ប្រដាល់​ក្លិប​ពុទ្ធ​សេរី​វង្ស​កីឡា​ដោយ​ពិន្ទុ ហើយ​កូយ ឡាយ គេ​វាយ​ចាញ់​លិញ ភារ​ម្យ អ្នក​ប្រដាល់​ក្លិប​ភារ​ម្យ​គុន​ខ្មែរ​ដោយ​ពិន្ទុ​ដូចគ្នា​ដែរ ។
​នៅក្នុង​ការប្រកួត​ដែលមាន​តែ​បី​ទឹក​នោះ ណា​ម ម៉ូ​រ៉ា​ក់ គេ​ចាញ់​កម្ពស់​ពុទ្ធ សំបូរ ដោយ​មិនអាច​ចូល​ជិត​សំបូរ​បាន ហើយ​វាយ​ប្រយោល ក៏​ពុំ​អាច​វាយ​ដល់​ដែរ ហេតុនេះហើយ ទើប​ចប់​ការប្រកួត​ម៉ូ​រ៉ា​ក់ ចាញ់​ពិន្ទុ សំបូរ ។

គួរ​បញ្ជាក់ថា ការប្រកួត​ជម្រុះ​ក្នុង​ដំណាក់​ទី​២​នេះ ការប្រកួត​គឺមាន​តែ​បី​ទឹក​ដូច​ក្នុងដំណាក់កាល​ទី​១​ដែរ ។ ដូច្នេះ ណា​ម ម៉ូ​រ៉ា​ក់ គេ​ត្រូវ​ជ្រុះ​ធ្លាក់​ចេញពី​ការប្រកួត​ដណ្តើមពាន​រង្វាន់​ជើងឯក​TV5 Knock Out Series by K.Cement ទម្ងន់​៦០​គីឡូក្រាម​ត្រឹម​ជុំ​ទី​២​នេះ ។ ឯ ពុទ្ធ សំបូរ គេ​នឹងត្រូវ​នៅ​បន្ត​ការប្រកួត​ក្នុង​ជុំ​ទី​៣​ទៀត ។​
​
ចំពោះ​កូយ ឡាយ ក្នុងការ​ប្រកួត​មួយ​ទឹក​ដំបូង គេ​បាន​វាយ​សម្រុក​ខ្លាំង​ទៅលើ​លិញ ភារ​ម្យ ប៉ុន្តែ​មិនអាច​ផ្តួល​ភារ​ម្យ​បានឡើយ ដោយសារ​ការ​វាយ​សម្រុក​របស់គេ​មិន​ចំ​គោលដៅ ។ ហើយ​ការប្រកួត​ពីរ​ទឹក​ចុងក្រោយ កូយ ឡាយ​មិន​ត្រឹមតែ​វាយ​លែងកើត​ទេ គឺ​អស់​ស៊ុ​ហ្វ​ថែមទៀត ដែល​ធ្វើអោយ​លិញ ភា​រម្យ​ដណ្តើម​ប្រៀប​ឈ្នះ​វិញ ។ ចប់​ប្រកួត​ភា​រម្យ​ឈ្នះ​កូយ ឡាយ​ដោយ​ពិន្ទុ ។ ដូច្នេះ​កូយ ឡាយ ត្រូវ​ជ្រុះ​ធ្លាក់​ត្រឹម​ជុំ​ទី​២​នេះ ចំណែក​លិញ ភារ​ម្យ គេ​នៅ​បន្ត​ការប្រកួត​ក្នុង​ជុំ​ទី​៣​ទៀត ។​
​
គួរ​បញ្ជាក់ថា នៅក្នុង​ការប្រកួត​ជុំ​ទី​២​នេះ អ្នក​ប្រដាល់​ទាំង​១៦​នាក់ ដែល​ចំ​រ៉ា​ញ់​បាន​ក្នុង​ជុំ​ទី​១​នោះ នឹងត្រូវ​ជួប​ប្រកួត​គ្នា​ជម្រុះ​ចោល​៨​នាក់ ទុក​៨​នាក់ ដែលជា​អ្នកឈ្នះ​សម្រាប់​បន្ត​ការប្រកួត​ក្នុង​ជុំ​ទី​៣ ដែលជា​ការប្រកួត​វគ្គ​ពាក់កណ្តាល​ផ្តាច់ព្រ័ត្រ និង ផ្តាច់ព្រ័ត្រ ដើម្បី​ដណ្តើម​ពានរង្វាន់​ជើងឯក​TV5 Knock Out Series by K.Cement ទម្ងន់​៦០​គីឡូក្រាម ។​
​
មកដល់ពេលនេះ ការប្រកួត​ចម្រាញ់​បាន​៦​នាក់​ហើយ សម្រាប់​ឡើងទៅ​ជុំ​ទី​៣​នោះ គឺ​លាភ រដ្ឋា ក្លិប​ដី​ឡូ​រិ៍​មាន​រិ​ទ្ធ​,​កំពែង ខ្មៅ សមាគម​កីឡាប្រដាល់​ក្រសួងកសិកម្ម​,​វុត្ថា លាន់​លិញ ក្លិប​អង្គរ​ធំគុន​ខ្មែរ ,​ឡុង រ៉ា​មី ក្លិប​ខ្លារខិន​មាន​រិ​ទ្ធ ហើយ ២​នាក់​ចុង​ក្រោយនេះ គឺ ពុទ្ធ សំបូរ​និង​លិញ ភា​រម្យ​នេះ ។​
​
ដោយឡែក ចំពោះ​ការប្រកួត​ជា​លក្ខណៈ​មិត្តភាព​អន្តរជាតិ​មួយគូ​នោះ ពុ​យ វ​ណ្ណះ អ្នក​ប្រដាល់​ក្លិប​ឃ្លាំងមឿង​កីឡា​ខេត្តពោធិសាត់ បាន​វាយ​ចាញ់​អ្នក​ប្រដាល់​មកពី​ប្រទេស​ថៃ​Kev Kangvan ដោយ​ពិន្ទុ បន្ទាប់ពី​ប្រកួត​គ្នា​៥​ទឹក​ពេញ​នោះ ។​
​
ពុ​យ វ​ណ្ណះ ប្រកួត​ពីរ​ទឹក​ដំបូង គេ​វាយ​ចេញចូល​បានល្អ និង​មាន​សភាព​គ្រោះថ្នាក់​សម្រាប់ Kev Kangvan ប៉ុន្តែ​ចូលដល់​ទឹក​ទី​៣​ទី​៤​និង​ទឹក​ទី​៥ Kev Kangvan បាន​ដណ្តើមយក​ប្រៀប​ឈ្នះ​បាន​វិញ ធ្វើអោយ​ចប់​ការប្រកួត​ពុ​យ​វ​ណ្ណះ​ចាញ់​Kev Kangvan ដោយ​ពិន្ទុ​៕



Source: Kampuchea Thmey Daily