សកម្មជននិងក្រុមគ្រួសាររបស់ជនរងគ្រោះ៨នាក់នៃ “សង្គ្រាមប្រឆាំងគ្រឿងញៀន” របស់ហ្វីលីពីនបានដាក់ពាក្យបណ្តឹងនៅថ្ងៃអង្គារទៅតុលាការឧក្រិដ្ឋកម្មអន្តរជាតិ (ICC) ដែលនេះជាញត្តិទី២ហើយដែលចោទប្រកាន់លោកប្រធានាធិបតី Rodrigo Duterte ពីបទមនុស្សឃាតនិងឧក្រិដ្ឋកម្មប្រឆាំងមនុស្សជាតិ។
ពាក្យបណ្តឹង៥០ទំព័របានអំពាវនាវឲ្យមានការប្តឹងចោទប្រកាន់លោក Duterte ចំពោះអ្វីដែលខ្លួនពិពណ៌នាថាជាការសម្លាប់ក្រៅប្រព័ន្ធតុលាការលើមនុស្សរាប់ពាន់នាក់ដែលរួមទាំងការសម្លាប់ដោយប៉ូលិសដែលធ្វើសកម្មភាពដោយគ្មានការទទួលខុសត្រូវផងដែរ។
ពាក្យបណ្តឹងនេះបានឲ្យដឹងថា អ្នករិះគន់យុទ្ធនាការប្រឆាំងគ្រឿងញៀនរបស់លោក Duterte ត្រូវបានគេធ្វើទុកបុកម្នេញហើយករណីដែលប្តឹងដោយគ្រួសារជនរងគ្រោះបានបាត់សូន្យឈឹង។
ញត្តិទៅ ICC បានធ្វើឡើងបន្ទាប់ពីមានពាក្យបណ្តឹងស្រដៀងគ្នាមួយដែលបានដាក់នៅក្នុងខែមេសាឆ្នាំ២០១៧ដោយមេធាវីជនជាតិហ្វីលីពីនមួយរូបដែលក្នុងនោះ ICC បានចាប់ផ្តើមធ្វើការពិនិត្យជាបឋម។
ញត្តិចុងក្រោយបំផុតនេះត្រូវបានដឹកនាំដោយបណ្តាញសកម្មជន អាចារ្យនិងសមាជិកសហគមន៍ក្រីក្រដែលបានរងគ្រោះដោយការបង្ក្រាបរបស់លោក Duterte ។ ពាក្យបណ្តឹងនេះរួមមានការផ្តល់សក្ខីកម្មពីសាច់ញាតិ៦នាក់នៃអ្នកទាំង៨ដែលត្រូវបានសម្លាប់ដោយប៉ូលិស។
លោក Neri Colmenares មេធាវីតំណាងក្រុមនេះបានប្រាប់អ្នកយកព័ត៌មានថា “លោក Duterte ត្រូវតែទទួលខុសត្រូវដោយខ្លួនឯងចំពោះការបញ្ជាឲ្យប៉ូលិសរដ្ឋធ្វើការសម្លាប់រង្គាល”។ លោកបាននិយាយបែបនេះបន្ទាប់ពីពាក្យបណ្តឹងត្រូវបានបញ្ជូនទៅកាន់តុលាការ ICC។
លោក Duterte បាននិយាយថា លោកបានប្រាប់ប៉ូលិសឲ្យសម្លាប់តែពេលណាដែលជីវិតរបស់ពួកគេស្ថិតនៅក្នុងគ្រោះថ្នាក់ប៉ុណ្ណោះ។
ប៉ូលិសបាននិយាយថា មនុស្សជាង៤,៤០០នាក់ដែលត្រូវបានសម្លាប់ក្នុងអំឡុងពេលនោះគឺជាអ្នកជួញដូរដែលពួកគេទាំងអស់បានប្រឆាំងនឹងការចាប់ខ្លួនហើយបានបដិសេធការចោទប្រកាន់របស់សកម្មជនអំពីការបិទបាំងនិងការសម្លាប់អ្នកប្រើប្រាស់គ្រឿងញៀន។
អ្នកនាំពាក្យប្រធានាធិបតីលោក Harry Roque បាននិយាយកាលពីថ្ងៃអង្គារថា ញតិ្ត ICC ចុងក្រោយបំផុតនេះគ្មានប្រសិទ្ធភាពទេហើយនឹងមិនរីកចម្រើនឡើយព្រោះហ្វីលីពីនបានដកសមាជិកភាពរបស់ខ្លួននៅ ICC រួចទៅហើយ៕ REUTERS
[caption id="attachment_968342" align="alignnone" width="700"]
FILE PHOTO[/caption]Source: Kampuchea Thmey Daily
0 Comments