ភ្នំពេញ ៖ ក្រសួងអប់រំយុវជននិងកីឡា បានព្រមានចាត់វិធានការច្បាប់ចំពោះម្ចាស់ទំព័រ Facebookទាំងឡាយ ណាដែលបន្តបង្ហោះវិញ្ញាសា និងអត្រាកំណែនៃការប្រឡងសញ្ញាបត្រមធ្យមសិក្សាចំណេះទូទៅ និងបំពេញវិជ្ជា នៃសម័យប្រឡងកាលពីថ្ងៃទី២០ ខែសីហា ២០១៨ឬបាក់ឌុប។
ការព្រមានរបស់ក្រសួងអប់រំនេះ បានធ្វើឡើង បន្ទាប់ពីនា ពេលថ្មីៗនេះ មានទំព័របណ្ដាញសង្គម Face book និងអ្នកប្រើប្រាស់គណនីឯកជនមួយចំនួន បានបង្ហោះ ចែករំលែកវិញ្ញាសា និងអត្រាកំណែមុខវិជ្ជានៃការប្រឡងសញ្ញាបត្រមធ្យមសិក្សាចំណេះទូទៅ និងបំពេញវិជ្ជា នៃសម័យប្រឡងកាលពីថ្ងៃទី២០ ខែសីហា ២០ ១៨។
យោងតាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡាចេញផ្សាយកាលពីថ្ងៃទី២៧ ខែសីហា ឆ្នាំ២០១៨បានឲ្យបញ្ជាក់ថា ការបង្ហោះ និងចែករំលែកវិញ្ញាសា និងអត្រាកំណែនេះ បានជះឥទ្ធិពលយ៉ាងធ្ងន់ធ្ងរដល់ដំណើរប្រព្រឹត្តទៅ នៃការប្រឡង ដែលកំពុងប្រព្រឹត្តិទៅយ៉ាងរលូន ដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
ក្រសួងអប់រំ បានអំពាវនាវដល់ម្ចាស់ទំព័រ Facebook ដែលកំពុងធ្វើសកម្មភាពនេះ ត្រូវបញ្ឈប់ជាបន្ទាន់នូវទង្វើរបស់ខ្លួន។ ក្រសួងអប់រំ បានព្រមានថា ប្រសិនបើសកម្មភាពចែករំលែករាល់វិញ្ញាសា និងអត្រាកំណែនៅតែបន្ដក្នុងរយៈពេលដំណើរកំណែ ការស្រង់ បូកពិន្ទុដោយកុំព្យូទ័រ ផ្ទៀងផ្ទាត់ពិន្ទុ មុនការប្រកាសលទ្ធផលផ្លូវការ មិនទាន់ត្រូវបានបញ្ចប់ ក្រសួង និងសហការជាមួយស្ថាប័នមានសមត្ថកិច្ចពាក់ព័ន្ធ ក្នុងការស្វែងរកម្ចាស់ទំព័រ ឬគណនីហ្វេសប៊ុកទាំងនេះ មកទទួលខុសត្រូវនូវទង្វើរបស់ខ្លួនតាមផ្លូវច្បាប់យ៉ាងតឹងរ៉ឹងបំផុត។
ការប្រឡងសញ្ញាបត្រមធ្យមសិក្សាទុតិយភូមិឬបាក់ឌុបនៅឆ្នាំនេះបានប្រព្រឹត្តិទៅកាលពីថ្ងៃទី២០និង២១ ខែសីហា ដោយមានបេក្ខជនចូលរួមប្រឡងចំនួន១១ ៥២៦៨នាក់ស្រី ៥៨ ១៥៨ នាក់ក្នុងនោះមានបេក្ខជនអវត្តមានចំនួន១៨៩៩នាក់ស្រី៧៤៤នាក់ស្មើនឹង១.៦៥ភាគរយ។
បេក្ខជនមានបញ្ហាសុខភាពមានចំនួន៦៤ករណីដូចជាវិលមុខ ខ្យល់គ ខ្សោយកម្លាំងដោយសារការទទួលទានអាហារ និងសម្រាកមិនបានគ្រប់គ្រាន់ ប៉ុន្តែអាចដំណើរការប្រឡងបន្តទៀតបាន បន្ទាប់ពីទទួលបានការសង្គ្រោះបឋមក្នុងនោះមានបេក្ខជន៥នាក់មិនអាចបន្តការប្រឡងបានដោយសារស្ថានភាពសុខភាពធ្ងន់ធ្ងរ។មានបេក្ខជនមានកំហុសឆ្គងចំនួន៧ករណីក្នុងនោះមាន៥នាក់យកទូរស័ព្ទដៃចូលនិង២នាក់ទៀតយកឯកសារចូល។ចំណែកគណៈមេប្រយោ គមានកំហុសឆ្គងដោយមានទុកជាប់ខ្លួននិងប្រើទូរស័ព្ទដៃនៅក្នុងមណ្ឌលប្រឡងចំនួន៥ករណី។
ការប្រឡងនេះ ត្រូវបានក្រសួងអប់រំ និងអង្គភាពប្រឆាំងអំពើពុករលួយវាយតម្លៃថា រៀបចំដោយរលូន និងមានលក្ខណៈល្អប្រសើរជាងបណ្តាឆ្នាំមុនៗទៅទៀដោយសារតែមានការសហការបានយ៉ាងល្អពីគ្រប់ភាគីពាក់ព័ន្ធទាំងអស់រួមមានក្រសួងអប់រំ អ្នកសង្កេតការណ៍ អង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា និងអាជ្ញាធរមានសមត្ថកិច្ចពាក់ព័ន្ធពិសេសបេក្ខជនប្រឡងបានបំពេញភារកិច្ចនិងគោរពតាមបទបញ្ញត្តិរបស់ក្រសួងបានល្អ។
ជាមួយគ្នានេះដែរ នៅតាមមណ្ឌលប្រឡងនីមួយៗ បានដំណើរការដោយភាពស្ងប់ស្ងាត់ និងមានរបៀបរៀប រយល្អដោយពុំមានឃើញនាំមកជាមួយនៅសំណៅឯកសារ ឬឧបករណ៍ហាមឃាត់ឡើយចូលនៅក្នុងមណ្ឌលប្រឡងឡើយ ដែលទាំងនេះដោយមានការយកចិត្តទុកដាក់ និងទំនួលខុសត្រូវខ្ពស់ពីគណៈកម្មការមេប្រយោគគ្រប់លំដាប់ថ្នាក់ដែលបានខិតខំបំពេញកិច្ចការងាររបស់ខ្លួនបានល្អប្រសើរ។
គួរបញ្ជាក់ថា លទ្ធផលប្រឡងនឹងត្រូវប្រកាសនៅតាមមណ្ឌលប្រឡងក្នុងរាជធានីភ្នំពេញ និងខេត្តកណ្ដាល នារសៀលថ្ងៃទី១១ ខែកញ្ញា ឆ្នាំ២០១៨ និងនៅតាមមណ្ឌលប្រឡងក្នុងខេត្តផ្សេងទៀត នាថ្ងៃទី១២ ខែកញ្ញា ឆ្នាំ២០១៨ ព្រមទាំងផ្សព្វផ្សាយតាមបណ្ដាញទំនាក់ទំនងសង្គមផ្លូវការរបស់ក្រសួងអប់រំ យុវជន និងកីឡា faceboo k.com/ moey s.gov.kh៕
Source: Kampuchea Thmey Daily
0 Comments