យោងតាមលទ្ធផលនៃការស៊ើបអង្កេតឯករាជ្យ ដែលគេរង់ចាំជាយូរយារមកហើយរបស់រដ្ឋាភិបាលព័រតូរីកូបានឲ្យដឹងថា ព្យុះសង្ឃរា Maria បានសម្លាប់មនុស្សចំនួន២,៩៧៥នាក់នៅក្នុងដែនដីកោះរបស់សហរដ្ឋអាមេរិកមួយនេះ។
បន្ទាប់ពីមានភាពចម្រូងចម្រាសជិតមួយឆ្នាំលើចំនួនអ្នកស្លាប់ពិតប្រាកដនៃព្យុះបិសាចឆ្នាំ២០១៧មួយនេះ អភិបាលកោះព័រតូរីកូបាននិយាយថា ការប៉ាន់ស្មានថ្មីនេះឥឡូវនេះនឹងត្រូវបានគេចាត់ទុកថាជាចំនួនអ្នកស្លាប់ផ្លូវការ។
លោកអភិបាល Ricardo Rossello បាននិយាយនៅក្នុងសន្និសីទសារព័ត៌មានមួយថា “ខ្ញុំបានបញ្ជាឲ្យធ្វើបច្ចុប្បន្នភាពចំនួនអ្នកស្លាប់ផ្លូវការដល់២,៩៧៥នាក់”។
ចំនួនអ្នកស្លាប់ជាផ្លូវការរបស់រដ្ឋាភិបាលព័រតូរីកូពីព្យុះ Maria មានត្រឹមតែ៦៤នាក់ប៉ុណ្ណោះ។
ដើម្បីទទួលបានការវាយតម្លៃត្រឹមត្រូវជាងនេះ លោក Rossello បានទទួលការសិក្សាឯករាជ្យពីសាកលវិទ្យាល័យចចវ៉ាស៊ីនតោន (GWU) ។
ការសិក្សានេះបានធ្វើការតាមដានអំពីមរណភាពហួសកម្រិតទាក់ទងនឹងព្យុះសង្ឃរា Maria ចាប់តាំងពីខែកញ្ញាឆ្នាំ២០១៧ដល់ខែកុម្ភៈឆ្នាំ២០១៨ហើយបានរកឃើញថា អ្នកស្លាប់មានចំនួន២២ភាគរយខ្ពស់ជាងចំនួនមរណភាពដែលត្រូវបានគេរំពឹងទុកក្នុងអំឡុងពេលនោះ។
លោក Carlos Santos-Burgoa សាស្ត្រាចារ្យផ្នែកសុខភាពពិភពលោកនៅ GWU បាននិយាយថា “លទ្ធផលនៃការសិក្សាស្រាវជ្រាវរបស់យើងបានបង្ហាញថា ព្យុះសង្ឃរា Maria បាននាំឲ្យមានការស្លាប់ច្រើនលើសលប់នៅទូទាំងកោះនេះ”។
ការសិក្សាមួយផ្សេងទៀតដោយសាកលវិទ្យាល័យ Harvard កាលពីដើមឆ្នាំនេះបានប៉ាន់ស្មានថា មនុស្សប្រហែល៤,៦០០នាក់បានស្លាប់ក្នុងរយៈពេល៣ខែបន្ទាប់ពីព្យុះនេះ។
ព្យុះសង្ឃរា Maria បានវាយប្រហារកោះព័រតូរីកូនៅខែកញ្ញាឆ្នាំ២០១៧ដោយបង្កឲ្យមានការបំផ្លាញយ៉ាងធំធេងហើយបណ្តាលឲ្យខូចខាតគិតជាទឹកប្រាក់អស់ចំនួន៩០ពាន់លានដុល្លារអាមេរិក។
វាត្រូវបានគេចាត់ទុកថាជាព្យុះស៊ីក្លូនដែលបំផ្លាញអស់ទឹកប្រាក់ច្រើនបំផុតលំដាប់ទីបីនៅក្នុងសហរដ្ឋអាមេរិកចាប់តាំងពីឆ្នាំ១៩០០មក៕ AFP
Source: Kampuchea Thmey Daily
0 Comments