រតនគិរី ៖ កម្លាំងនគរបាលប៉ុស្តិ៍ស្រែអង្ក្រង បានដេញតាមចាប់បុរសម្នាក់សង្ស័យលួចម៉ូតូរបស់គេដាក់ក្រោមផ្ទះ ជិះរត់គេចខ្លួន តែត្រូវម្ចាស់ដែលកំពុងរវល់បោកខោអាវ ឃើញទាន់ស្រែកផ្អើលឆោឡោឡើង។
ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង៨និង៣០នាទីព្រឹក ថ្ងៃទី២៨ ខែសីហា ឆ្នាំ២០១៨ នៅចំណុចផ្ទះឈ្មោះ រស់ ឡុន ស្ថិតនៅភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី។
អធិការរងនគរបាលស្រុកកូនមុំទទួលបន្ទុកព្រហ្មទណ្ឌលោកជា សារិត បានឲ្យដឹងថា មានករណីចោរកម្មលួចម៉ូតូ១គ្រឿងម៉ាកហុងដាឌ្រីម c១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខរតនគិរី 1C- 8344 ខណៈដែលម្ចាស់ម៉ូតូ ឈ្មោះវ៉ា សុផុន ភេទស្រី អាយុ ៤៣ឆ្នាំ ទីលំនៅភូមិ៣ ឃុំត្រពាំងក្រហម ស្រុកកូនមុំ ដែលកំពុងបោកខោអាវនៅក្រោយផ្ទះ ហើយទុកកូនសោម៉ូតូនៅលើគ្រែក្រោមផ្ទះ។
លោកជា សារិត បន្តថា ជនសង្ស័យ បានចូលយកសោចាក់ម៉ូតូជិះយកចេញទៅ ប៉ុន្តែក្រោយមក ម្ចាស់ម៉ូតូឃើញទាន់ ហើយក៏ស្រែកផ្អើលឆោឡោ នាំគ្នាដេញតាម និងប្តឹងនគរបាលមូលដ្ឋានដេញតាម និងសហការជាមួយកម្លាំងជំនាញនគរបាលស្រុក និងប៉ុស្តិ៍ ឃុំស្រែអង្គ្រង ស្ទាក់ចាប់បានទាំងម៉ូតូ និងជនសង្ស័យតែម្តង។
លោកថា ជនសង្ស័យឈ្មោះ លី ហេង ភេទប្រុស អាយុ១៩ឆ្នាំ ជនជាតិខ្មែរ មានទីលំនៅភូមិស្រែត្រែង ឃុំក្បាលដំរី ស្រុកសំបូរ ខេត្តក្រចេះ ។
បច្ចុប្បន្ន កម្លាំងជំនាញបានឃាត់ខ្លួនជនសង្ស័យបណ្តោះអាសន្ននៅអធិការដ្ឋាននគរបាលស្រុកកូនមុំ ដើម្បីបំពេញសំណុំរឿងបញ្ជូនទៅអយ្យការអមសាលាដំបូងខេត្តចាត់ការតាមនីតិវិធីច្បាប់៕
Source: Kampuchea Thmey Daily
0 Comments