ការស៊ើបអង្កេតទៅលើក្មេងអត់អាហារមួយក្រុមដែលត្រូវបានគេរកឃើញនៅលើវាលខ្សាច់មួយក្នុងរដ្ឋ New Mexico បានបង្ហាញរឿងមួយផ្សេងទៀតកាលពីថ្ងៃអង្គារនៅពេលអaជ្ញាធរនិយាយថា ពួកគេបានរកឃើញសពក្មេងប្រុសម្នាក់នៅឯអចលនទ្រព្យដ៏កខ្វក់មួយ។វាមិនទាន់ច្បាស់នៅឡើយទេថាតើសពនោះគឺជាកុមារ Abdul-ghani Wahhaj ដែលចូលដល់អាយុ៤ឆ្នាំនៅថ្ងៃចន្ទមែនឬក៏មិនមែន។
ប៉ុន្តែតម្រួតតំបន់ Taos County លោក Jerry Hogrefe បាននិយាយថា សពនោះហាក់ដូចជាក្មេងប្រុសម្នាក់ដែលមានអាយុស្រដៀងគ្នាទៅនឹងកុមារ Abdul-ghani ដែលមានរោគប្រគ្រីវកាច់ហើយត្រូវបានគេរាយការណ៍ថាបានបាត់ខ្លួនកាលពីខែធ្នូបន្ទាប់ពីឪពុករបស់គាត់និយាយថា គាត់បាននាំគាត់ទៅសួនមួយក្នុងទីប្រជុំជន Jonesboro នៃរដ្ឋ Georgia។
អាជ្ញាធរបាននិយាយថា ឪពុកឈ្មោះ Siraj Ibn Wahhaj បានប្រាប់ប្រពន្ធរបស់គាត់ថា គាត់ចង់បណ្តេញខ្មោចអារក្សចេញពីកូនរបស់គាត់។ លោក Hogrefe បាននិយាយថា “យើងបានរកឃើញសាកសពកាលពីថ្ងៃអង្គារចំថ្ងៃខួបកំណើតគម្រប់បួនឆ្នាំរបស់ Abdul”។
ការស្វែងរក Abdul-ghani បាននាំក្រុមអាជ្ញាធរទៅកាន់បរិវេណដែលការពារដោយសំបកកង់ឡានចាស់ៗ បន្ទះឈើនិងជញ្ជាំងដីដែលមានដាក់ជាមួយអម្បែងកែវ។ វាមានទីតាំងស្ថិតនៅជាយក្រុង Amalia ដែលជាទីក្រុងដាច់ស្រយាលតូចមួយជិតព្រំដែនរដ្ឋ Colorado។
ក្រុមអ្នកស៊ើបអង្កេតបាននិយាយថា ពួកគេបានរកឃើញលោក Wahhaj មានប្រដាប់អាវុធរួមជាមួយមនុស្សពេញវ័យបួននាក់ផ្សេងទៀតនិងកុមារដែលអត់ឃ្លានចំនួន១១នាក់ដែលកំពុងរស់នៅក្នុងស្ថានភាពកខ្វក់។
អាជ្ញាធរបានត្រឡប់ទៅរកបរិវេណនោះបន្ទាប់ពីការសម្ភាសកាលពីថ្ងៃសុក្រនិងថ្ងៃសៅរ៍បាននាំឲ្យពួកគេជឿថា ក្មេងប្រុសរូបនេះនៅតែស្ថិតក្នុងអចលនទ្រព្យនោះ។
ដីកាចាប់ខ្លួនរដ្ឋ Georgia បាននិយាយថា ក្មេងប្រុសរូបនោះទទួលរងបញ្ហាវេជ្ជសាស្ត្រធ្ងន់ធ្ងររួមទាំងការខ្វះអុកស៊ីសែននិងលំហូរឈាមនៅអំឡុងពេលសំរាលផងដែរ។ ម្តាយរបស់គាត់និយាយថា គាត់មិនអាចដើរបានទេនិងទាមទារឲ្យមានការយកចិត្តទុកដាក់។
នៅឯសន្និសីទសារព័ត៌មានមួយក្នុងតំបន់ Taos, លោក Hogrefe បានរៀបរាប់អំពីកិច្ចខិតខំប្រឹងប្រែងឃ្លាំមើលរបស់ FBI ក្នុងរយៈពេលប៉ុន្មានខែថ្មីៗនេះដែលរួមមានទាំងរូបថតនៃបរិវេណនោះនិងការសម្ភាសន៍ផងដែរ។
លោកបាននិយាយថា មន្ត្រី FBI ត្រូវបានគេអញ្ជើញឲ្យចូលរួមក្នុងសន្និសីទសារព័ត៌មានប៉ុន្តែបានបដិសេធចូលរួម។ អ្នកនាំពាក្យរបស់ FBI ម្នាក់មិនបានផ្តល់សេចក្តីអត្ថាធិប្បាយភ្លាមៗទេ។
គួរបញ្ជាក់ជាថ្មីថា កុមារដែលមានអាយុពី១ឆ្នាំទៅ១៥ឆ្នាំត្រូវបានជួយសង្គ្រោះពីបរិវេណមួយដែលស្ថិតក្រោមការស៊ើបអង្កេតអស់រយៈពេលជាច្រើនខែមកហើយ។ តម្រួតបាននិយាយថា ក្មេងៗទាំងនោះហាក់ដូចជាមិនបានបរិភោគអស់រយៈពេលជាច្រើនថ្ងៃមកហើយ៕ AP
Source: Kampuchea Thmey Daily
0 Comments